KOMPROMISU ELEITORÁL
Hau, Fransciso Guterres ‘Lú Olo’
Kandidata hau-nia an atu garante katak Pás no Estabilibilidade sei hametin duni, Justisa sei haforsa duni, atu ita bele hala’o dezenvolvimentu ida ne’bé ekilibradu no sustentável.
Hafoin Restaurasaun Independénsia, liu tiha tinan balun, ita liuhosi esperiénsia sira ne’ebé halo ita moris ho laran taridu tebetebes. Ita hotu hatene katak problema boot liu ne’ebé mosu iha ita nia leet mak krizi 2006/2007 no atentadu 11 Fevereiru hasoru Prezidente Repúblika ninia vida. Ita hotu hatene katak krize 2006 - 2007 mak pontu as liu ne’ebé mosu hosi konflitu institusionál sira ne’ebé butuk hamutuk hosi 2002 to’o 2006 entre Xanana Gusmão nu’udar Prezidente Repúblika no Dr. Mari Alkatiri nu’udar Primeiru Ministru. Iha tempu ne’ebá, ita-nia Prezidente Repúblika, ne’ebé ita hotu konsidera nu’udar figura ida ne’ebé tur iha fatin ida ne’ebé as liu partidu sira no INDEPENDENTE, la konsege hametin ninia an nu’udar Xefe-de-Estadu no nune’e, la konsege servisu hamutuk ho governu ida ne’ebé iha maioria kuazi kualifikada iha Parlamentu Nasionál. Iha tempu ne’ebá, Prezidente Repúblika la hatene oinsá hala’o ninia knaar nu’udar Xefe-de-Estadu iha sistema polítiku semi-prezidensialista tuir Konstituisaun Demokrátika Timor-Leste. Prezidente la hatán sistema ne’ebé Konstituisaun adopta, Konstituisaun ne’ebé Parlamentu Nasionál aprova, Konstituisaun ne’ebé mai hosi órgaun soberania ida ne’ebé “Lu Olo”, hau rasik prezide, hafoin hau tun hosi foho no ailaran, liu tiha períodu luta armada ne’ebé hala’o durante tinan rua nulu resin hat nia laran. Iha tempu ne’ebá, povu mós iha espektativa boot katak independénsia sei hadia kedas sira nia moris no hasa’e sira nia kualidade vida. Maibé ida ne’e labele akontese kedas tanba ita ladún iha rekursus no ita mós seidauk harii/hametin didiak instituisoens Estadu nian.
Hau mós ajuda halo ita-nia Konstituisaun. Hau aprende oinsá jere posizaun oinoin atu hetan konsensus. Tan ne’e, hau, “Lu Olo”, asume tiha ona kompromisu atu defende Konstituisaun ida ne’e no, nu’udar Xefe-de-Estadu, hau sei kaer metin Konstituisaun ida ne’e. Nune’e, hau garante katak sei laiha konflitu institusionál ne’ebé bele provoka krize foun. Hau, “Lu Olo”, sei la sai Prezidente ida ne’ebé sei nakfilak an ba Xefe Opozisaun nian no hau sei la halo opozisaun ba Governu ka Parlamentu. Hau sei la ezije halo revizaun ba Konstituisaun no, liuliu, ba sistema polítiku ida ne’ebé ita iha tanba sistema ida ne’e mak di’ak liu ba ita-nia realidade polítika no sosiál. Hau sei tanen solidariedade institusionál no sei respeita órgaun soberania ida-idak ninia kompeténsias. Hau sei halo buat hotu-hotu tuir Konstituisaun Repúblika no Leis sira ne’ebé vigora iha ita nia país.
Ho konxiénsia mak hau sei asume funsaun Xefe-de-Estadu, nu’udar mós sidadaun ida ne’ebé hakarak haforsa Estadu-de-Direitu Demokrátiku, Estadu ida ne’ebé nakloke ba sidadaun sira bele partisipa ho laran haksolok iha prosesu tomak atu hala’o dezenvolvimentu polítiku, sosiál, kulturál no ekonómiku. Hau sei uza hau-nia estatutu nu’udar Xefe-de-Estadu atu sensibiliza no loke dalan ba hotu-hotu partisipa iha prosesu dezenvovimentu.
Hau sei sai Prezidente hotu-hotu nian no Prezidente ba hotu-hotu. Hau sei uza hau-nia koñesimentus kona-ba Konstituisaun no Leis atu defende kultura no vida institusionál ida ne’ebé tanen pás no estabilidade atu ita bele hala’o dezenvolvimentu inkluzivu, sustentável no ekilibradu no atu haforsa Estadu-de-Direitu Demokrátiku.
Tambasá hau, Francisco Guterres “Lu Olo”?
Kandidata hau-nia an atu garante katak hotu-hotu sei respeita di’ak liu tan Konstituisaun no Leis. Hau iha esperiénsia nu’udar Prezidente Asembleia Konstituinte nian ne’ebé adopta Konstituisaun no, ikus mai, nu’udar Prezidente Primeiru Parlamentu nian - órgaun ne’ebé aprova Leis estruturantes atu harii sistemas ba organiza no regula Estadu Timor-Leste. Hau iha mós esperiénsia moris iha terus nia laran durante períodu rezisténsia armada iha tinan 24 nia laran, períodu ida ne’ebé dignifika hau-nia vida. Liuhosi estudu teorias nian, hau hetan explikasaun sientífika ba buat hotu-hotu ne’ebé hau haree no sente iha hau-nia vida rasik no aprende hosi prátika liu tinan rua nulu. Durante tinan hirak ne’ebé hau estuda no hetan Lisensiatura iha kursu Direitu, iha Universidade Nasional Timor Loro Sa’e, hau hametin liu tan hau-nia koñesimentus iha área jurídika. Hau aprende hako’ak liutan prinsípiu legalidade iha ita-nia hahalok hotu-hotu no ekuidade no igualdade no justisa ba hotu-hotu.
Nu’udar Xefe-de-Estadu, Prezidente Repúblika iha papél ida ne’ebé importante tebetebes iha ita-nia Konstituisaun Repúblika, iha ita-nia sistema atu hala’o poder demokrátiku. Xefe-de-Estadu tenke hatene momoos ninia kompeténsias atu bele hasees krize interna no leno dalan ba país bainhira buka hela solusaun atu hapara krize rejionál ka internasionál ruma ne’ebé bele mosu iha momentu ne’ebé de’it.
Xefe-de-Estadu ne’ebé hatene ninia kompeténsias tuir Konstituisaun no ne’ebé halibur kualidade importante - simplisidade (la foti an), modéstia (la hatete sai ninia kualidades), iha formasaun di’ak iha aspetu morál, intelektuál no tékniku, aman ne’ebé hako’ak ninia família - bele hala’o ninia kbiit di’ak liu ho laran kamán maibé ho firmeza (la baku fila tun sai). Tuir Konstituisaun, Xefe-de-Estadu iha funsaun barak. Funsaun balun mak tuir mai ne’e:
1. Prezidente Repúblika mak garante unidade nasionál no unidade Estadu nian, integridade territóriu nian, indpendénsia no soberania nasaun nian. Ita-nia luta ne’ebé hala’o liu tinan rua nulu nia laran mak fó rezultadu restaurasaun independénsia. Konstituisaun Repúblika, ita-nia Lei inan, númeru 1 (ida) artigu 1 (ida) nian, hatete hanesan ne’e: “Repúblika Demokrátika Timor-Leste hametin Estadu-de-Direitu Demokrátiku, soberanu, independente no unitáriu, tuir vontade povu nian no respeita dignidade ema nian”. Númeru 1 (ida) artigu 2 (rua) nian hatete momoos katak “ soberania tau iha povu nia liman no povu hala’o ida ne’e tuir Konstituisaun”. Konstituisaun RDTL nian hatete mós katak Prezidente Repúblika iha funsaun atu halibur povu tomak no labele fihir ema tuir filiasaun polítiku-partidária, estatutu sosiál no ekonómiku, relijiaun, etnia ka rasa. Prezidente tenke garante unidade Estadu nian no karáter unitáriu Repúblika Demokrátika Timor-Leste nian.
Kona-ba aspetu kulturál, Xefe-de-Estadu tenke tanen dalan dezenvolvimentu progresista, ida ne’ebé haforsa identidade povu nian maibé la taka odomatan ba influénsia hosi modernisazaun mundu ohinloron nian no nune’e ita sei iha relasaun permanente ho povu sira seluk biar, ita Timor oan, moris iha realidade sósio-kulturál oin seluk no hakoak ita-nia oríjen milenária.
2. Prezidente reprezenta país iha rai laran no iha tasi balun. Prezidente uza ninia estatutu nu’udar Xefe-de-Estadu bainhira halo mensájen no intervensaun sira ne’ebé hanorin ka fó orientasaun ba nasaun no buka koalia tuir espektativa povu tomak nian no Komunidade Nasaun hotu-hotu nian kona-ba pás no estabilidade. Prezidente Repúblika ida ne’ebé modestu, ne’ebé iha formasaun polítika no akadémika di’ak, sei fó atensaun di’ak liu ba sosiedade, família sira, instituisaun públika, sosiál, privada no relijióza no sei hatene oinsá hamaus ema atu rona malu, bainhira presiza iha momentu ne’ebé de’it. Nia tenke hatene hako’ak ema hotu no buka dalan ba ajuda ema entende malu iha kestaun sira ne’ebé importante ba vida nasionál. Nia tenke hatudu mós integridade moral no polítika no nune’e, reprezenta ho dignidade país ida ne’e iha rai laran no iha tasi balun atu bele hetan respeitu hosi povu tomak no iha mundu tomak no hasa’e kredibilidade internasionál Timor-Leste nian no povu tomak nian.
3. Hau mós hatene katak Prezidente Repúblika mak guardiaun Konstituisaun nian. Prezidente halo juramentu ba Konstituisaun ne’ebé vigora ohinloron. Nune’e, Prezidente ninia funsaun dahuluk mak oinsá nia bele garante kumprimentu Konstituisaun Repúblika no Leis nian, no mós Tratadus Internasionais ne’ebé ita ratifika no tama iha ita-nia Órden Jurídika Nasionál. Tanba ninia funsaun nu’udar guardiaun Konstituisaun no rezerva jurídika nian, mak Prezidente iha direitu atu promulga Diplomas Lejislativus Parlamentu Nasional ka Governu nian no atu nomeia titular sira ba kargus polítikus oinoin no mós Prezidente Tribunal Rekursu ka Prokuradór Jerál Repúblika.
Prezidente Repúblika, nu’udar Xefe-de-Estadu, iha mós kompeténsia atu uza poder VETO nian ba atus lejislativus Parlamentu Nasionál no Governu nian. Nia iha mós kbiit atu halo nomeasaun ba entidade oinoin órgauns soberania nian no instituisaun sira seluk Estadu nian, bele sobu Parlamentu Nasionál bainhira ita enfrenta krize instituisionál grave no konvoka eleisoens nian.
Mai hau, “LU OLO”, Prezidente bele uza de’it ninia poder ba halo VETO bainhira haree inkonstitusionalidade ka desizaun ruma la defende interese públiku nian, hanesan pás no estabilidade nasionál. Nune’e, Prezidente bele halo veto polítiku no jurídiku. Ida ne’e importante atu garante funsionamentu sistema governu no instituisoens estadu nian. Prezidente labele uza VETO tanba hakarak hasoru Governu, sátan Governu atu labele ukun, no labele sai kúmplise Governu nian atu fasilita de’it ka husik Governu ukun arbiru de’it. Prezidente bele uza poder VETO nian ba defende bén komún, interese públiku, legalidade konstitusionál, direitus no liberdades importantes sidadaun sira nian, valores ne’ebé mundu tomak haksolok no tama iha ita- nia Konstituisaun.
4. Hau hatene momoos katak, nu’udar expresaun funsaun rezerva polítika nian, Xefe-de-Estadu iha kbiit atu sobu Parlamentu Nasionál. Hau entende katak Prezidente iha poder atu regula no kontrola prosesu polítiku maibé nia la hala’o poder ida ne’e arbiru de’it. Bainhira maioria parlamentár halo votu-de-sensura ba governu ka, vota hasoru Orsamentu Jerál Estadu dala rua tuituir malu, Prezidente Repúblika iha poder atu hatún kedas governu no iha loron neen nulu nia laran, partidus sira ne’ebé iha asentu parlamentár tenke buka halo koligasaun atu hetan maioria parlamentár no forma governu foun. Keta dalan ida ne’e la hetan susesu karik, Xefe-de-Estadu sobu Parlamentu Nasionál no konvoka eleisaun antesipada ne’ebé tenke hala’o iha loron sia nulu nia laran. Governu tun mós bainhira programa Governu nian la hetan aprovasaun hosi Parlamentu Nasionál dala rua tuituir malu. Keta kazu ikus ne’e akontese karik, hafoin Prezidente hatún desizaun, governu foun tenke forma iha loron nen nulu nia laran. Bainhira Prezidente deside sobu Parlamentu Nasional, mandatu órgaun ida ne’e nian hakotu no eleitór sira hetan direitu atu tuir fila fali eleisaun parlamentár foun ida atu eleje Parlamentu Nasional foun. Nune’e, iha Timor-Leste, Prezidente Repúblika bele de’it uza ninia poder atu halo disolusaun (sobu) governu ka Parlamentu Nasional hafoin haree kondisaun sira tuir mai ne’e:
i. Krize institusionál grave;
ii. Instituisoens demokrátikas la funsiona;
iii. Konsulta tiha ona Konsellu Estadu no rona tiha ona partidus polítikus sira ne’ebé halo parte Parlamentu Nasional;
5. Nu’udar kandidatu, hau hatene katak Konstituisaun Repúblika Demokrátika Timor-Leste fó ba Xefe-de-Estadu kompeténsias kona-ba polítika externa. Kompeténsias balun mak ne’e:
i. Nomeia no ezonera embaixadór tuir proposta governu nian;
ii. Simu akreditasaun hosi diplomata estranjeiru sira;
iii. Reprezenta país iha nível as liu iha planu internasionál;
iv. Orienta, hamutuk ho Governu, negosiasaun kona-ba tratadus internasionais ka akordus bilaterais kona-ba área defeza no seguransa nian;
6. Hau sei respeita beibeik prinsípiu sagradu ne’ebé ezije katak instituisoens estadu nian tenke halo kooperasaun no solidariedade ba malu: Importante tebetebes ba Prezidente halo kooperasaun ho órgaun soberania Estadu nian, liuliu, ho Governu no Parlamentu Nasionál. Atu garante prinsípiu ida ne’e, Primeiru Ministru iha dever atu hato’o informasaun beibeik no kompleta ba Prezidente Repúblika kona-ba assuntus polítika nasionál nian iha nível internu no internasionál. Prezidente Repúblika tenke husu uluk autorizasaun hosi Parlamentutu Nasionál molok halo viajen estadu nian ka ofisiál ba estranjeiru. Prezidente bele mós husu Parlamentu Nasionál atu hala’o plenária extraordinária atu bele hato’o lia menon ruma ba órgaun ida ne’e no mós ba Nasaun tomak.
7. Prezidente Repúblika kaer mós knaar nu’udar Komandante Supremu Forsas Armadas nian. Hau sei kaer funsaun ida ne’e ho konxiénsia tomak katak Governu mak iha responsabilidade atu prepara diploma lejislativu no define polítikas atu harii, kapasita no dezenvolve Forsas Defesa. Xefe-de-Estadu koopera ho Governu no esforsa an atu ajuda órgaun ida ne’e atu hetan solusaun sira ne’ebé bele hametin Forsas Armadas nu’udar instituisaun ida ne’ebé bele duni defende valores demokrátikus, konstitusionalidade iha atus órgauns Estadu nian, soberania no independénsia Nasaun nian. Au garante respeitu ba Konstituisaun no Leis, Xefe-de-Estadu tenke garante katak Forsas Defeza no Seguransa sai profisionál no prontu atu tanen beibeik konstitusionalidade atus públikus no privadus nian. Atu halo ida ne’e, Xefe-de-Estadu tenke akompaña didi’ak dezenvolvimentu F-FDTL no PNTL nian no mós Servisus Intelijénsia no Kontra-Intelijénsia Estadu nian.
8. Nune’e:
A. Bainhira eleitu, hau sei la tama iha disputa polítiku-partidária ne’ebé de’it no hau sei sai Prezidenti hotu-hotu nian no ba hotu-hotu, Xefe-de-Estadu ida ne’ebé la’o tuir dalan legál.
B. Nu’udar Prezidente Repúblika, hau sei sai Xefe-de-Estadu ida ne’ebé hakru’uk ba Konstituisaun no Leis ne’ebé vigora iha Repúblika Demokrátika Timor-Leste. Hau sei hala’o hau-nia kompeténsias ho autonomia institusionál no sei respeita kompeténsias órgaus soberania sira seluk nian.
C. Iha planu relasaun externa nian, hau sei fó an tomak atu haburas relasaun di’ak ho rai hotu-hotu. Timor-Leste tenke hatene sai ponte ne’ebé liga Pasífiku ho Ázia. Timor-Leste sei hatene uza ninia fronteira istóriku-kulturál atu loke dalan ba tama iha Áfrika, Europa no Amérika liuhosi Comunidade dos Países da Língua Portuguesa – CPLP.
D. Nu’udar Prezidente Repúblika, hau sei respeita maka’as independénsia Tribunais sira nian. Atu haforsa Justisa, hau sei uza hau-nia estatutu nu’udar Xefe-de-Estadu atu ajuda harii meius ne’ebé fó dalan ba instituisoens justisa nian atu kumpre sira-nia obrigasaun atu hala’o lalais justisa.
E. Nu’udar Prezidente Repúblika hau sei buka ajuda maluk sira entende malu no hetan konsensus iha sosiedade nia leet bainhira hau hala’o funsaun moderadór no árbitru sistema nian.
F. Bainhira hau hala’o funsaun ida ne’e, hau sei enkoraja ema hotu-hotu atu konsulta malu hodi bele entende malu. Nune’e, atu hasees konflitus polítikus, hau sei hatuur hau-nia an iha pozisaun ida ne’ebé maluk sira buka atu konsulta, iha posizaun ida ne’ebé maluk sira sente katak hau mós konsulta sira no fó hau-nia opiniaun ba sira, iha momentu ne’ebé de’it bainhira sira presiza hau-nia intervensaun.
G. Durante hau-nia mandatu nu’udar Prezidente, hau sei halo buat hotu-hotu atu haforsa sentidu estadu. Hau sei fó an tomak atu leno dalan ba sosiedade tomak atu haree ba objetivus nasionáis ne’ebé boot no hau sei haforsa hau-nia kooperasaun ho órgaun soberania hotu-hotu atu ita bele alkansa objetivus sira ne’e.
H. Nu’udar Prezidente, hau sei halo buat hotu-hotu atu fó-hanoin ba sosiedade sá knaar importante mak ita hotu-hotu tenke hala’o atu foti Nasaun ida ne’e. Hau sei sai ponte nesesária no importante ne’ebé tutan lejislatura uluk nian ho abanbairua nian atu garante prinsípiu katak Estadu ida ne’e sei la sobu maibé sei hametin an no hatutan ba beibeik. Hau sei bolu atensaun ba partidus polítikus hotu-hotu atu sira buka hetan solusaun estruturante sira ne’ebé rezolve problemas nasionais no Estadu-de-Direitu Demokrátiku nian.
I. Hau sei sai Xefe-de-Estadu ne’ebé hatudu solidariedade. Hau sei uza hau-nia estatutu nu’udar Xefe-de-Estadu atu sensibiliza ema hotu-hotu atu konsidera kestaun Kombatentes Libertasaun Nasionál no Veteranus Luta ba Independénsia ho respeitu no sentidu responsabilidade as liu. Hau sei halo buat hotu-hotu atu hetan solusaun sira ne’ebé fó dignidade ba benefisiárius sira.
J. Hau sei fó atensaun tomak ba situasaun katuas no ferik sira nian no populasaun sira ne’ebé iha nesesidade barak liu no mós ba faluk sira no oan kiak sira hosi períodu Luta Libertasaun Nasional nian. Hau sei aprezenta propostas sira ne’ebé fó solusaun dignifikante ne’ebé loke dalan ba sira integra iha sosiedade no hasai sira hosi estadu dependénsia. Hau sei la fihir no hasees ema ka grupu ne’ebé de’it.
K. Hau sei hatama mós kestaun ambientál iha hau nia ajenda servisu nu’udar Xefe-de-Estadu. Hau sei fó atensaun ba kestaun ambiente no sustentabilidade dezenvolvimentu nian. Nu’udar Prezidente Repúblika, hau sei halo buat hotu-hotu atu ajuda lori ba oin vida ekonómika, social, kulturál no intelektuál Nasaun nian. Nu’udar povu umilde nia oan, hau sei tau matan maka’as ba problemas sosiais iha sosiedade nia leet, sosiedade ida ne’ebé iha ema barak moris iha mukit nia laran. Nu’udar Xefe-de-Estadu, liuhosi kooperasaun ho Governu no instituisaun públika sira seluk no instituisaun privada sira, hau sei halo buat hotu-hotu atu Estadu bele hato’o benefísius ba ema hotu-hotu ne’ebé presiza ajuda. Hau sei fó atensaun liuliu ba polítikas públikas kona-ba edukasaun no formasaun profisonál, saúde, kriasaun enpregu,luta hasoru kiak, abitasaun (uma), saneamentu báziku, bee moos no eletrisidade ba hotu-hotu no, katak hau sei defende inkluzaun sosiál no ekonómika.
L. Hau sei fó mós atensaun ba Juventude no Igualdade Jéneru. Nu’udar Xefe-de-Estadu, hau sei fó hau nia atensaun tomak ba kestaun Juventude no igualdade entre feto no mane sira. Hau sei hala’o diálogu beibeik ho sosiedade sivíl no tradisionál no komunitária, ho Juventude no organizasaun feto sira nian, ho konfisaun relijióza ne’ebé de’it no organizasaun defeza direitus umanus nian atu buka hetan solusaun justa no ekilibrada ba problemas sira ne’ebé afekta ita-nia sosiedade.
M. Hau sei defende prinsípiu konstitusionál kona-ba liberdade relijiosa no hau sei garante katak prinsípiu ne’e sei la’o duni ba oin.
N. Ita-nia sosiedade tomak tenke fó atensaun ba kestaun violénsia doméstika no abuzu sekxuál, liuliu abuzu sexuál labarik sira nian no pedofilia. Nu’udar Prezidente Repúblika hau sei tau interese maka’as ba kestaun sira ne’e no sei halo beibeik diálogu ho sosiedade tomak no instituisoens públikas no privadas, relijiozas no tradisionais, hau sei buka mobiliza hotu-hotu atu luta hamutuk atu hamoos tiha buat at sira ne’e iha ita-nia país no iha mundu tomak.
O. Ita labele husik ba abanbairua kestaun espesífisa kona-ba saúde no dezenvolvimentu sosiál liuliu asisténsia materno-infantil no redusaun mortalidade no akompañamentu labarik sira nian to’o idade eskolár. Nu’udar Prezidente Repúblika, hau sei buka ajuda governu atu define polítikas no aprova programas sira ne’ebé envolve sosiedade tomak atu respeita direitus inan sira nian no labarik sira nian. Estadu tenke garante direitu labarik sira nian atu hetan ai-han ekilibradu to’o tinan lima, no sosiedade tomak tenke ajuda atu ita-nia labarik sira bele boot ho saúde di’ak. Ho interese nasaun nian no povu ninia futuru mak hau sei ezije ida ne’e.
P. Hau sei fó mós atensaun espesiál ba doensas endémikas no infekto-kontajiózas. Hau sei ezije hosi órgauns kompetentes Estadu nian no mós hosi sosiedade tomak atu fó liman ba malu atu halo kombate no prevensaun hasoru tuberkuloze, malária, dengue no liuliu, HIV/SIDA.
Q. Timor-Leste bele no tenke sai ezemplu kona-ba kumprimentu Objetivus Dezenvolvimentu Miléniu nian (ODM/MDG). Nu’udar Xefe-de-Estadu, hau sei akompaña maka’as programas Governu nian no hau sei halo intervensaun, bainhira presiza, iha nível internu ka internasionál, atu haforsa medidas ne’ebé Governu foti atu hetan Objetivus Dezenvolvimentu Miléniu nian.
R. Nu’udar Prezidente Repúblika, hau sei sai faktór estabilidade polítika nian, pás no dezenvolvimentu nian. Hau sei halo buat hotu-hotu atu ajuda Governu hala’o dezenvolvimentu sustentável, atu halakon kiak, atu halakon diferensa entre sidade no área rurál sira, atu hamenus diferensa, atu harii oportunidade hanesan ba ema hotu-hotu no atu inklui ema barak liu iha vida sosiál no ekonómika, atu hasa’e kapasidades no, atu haforsa instituisoens atu sira bele funsiona ho normalidade no hakru’uk ba Konstituisaun no Leis ne’ebé vigora iha Repúblika Demokrática Timor-Leste.
No comments:
Post a Comment