Koordenador FRETILIN Covalima: “Notisia TVTL Koordenador FRETILIN distritu Covalima partisipa iha Komissaun Apoiu Xanana nee bosok”

FRETILIN

KOMUNIKADU BA IMPRENSA

Dili, 2 Junhu 2012

Koordenador FRETILIN Covalima: “Notisia TVTL Koordenador FRETILIN distritu Covalima partisipa iha Komissaun Apoiu Xanana nee bosok”

Iha Notisia RTTL/TVTL neebe fo sai iha notisiariu Kinta Kalan, loron 31 Maiu 2012 kona grupu neebe hanaran a’an “Komisaun Independente Fo Apoiu Ba Kay Rala xanana Gusmao Atu Kaer Ukun,” bainhira halau konferensia iha Bairro Pite Dili, RTTL/TVTL dehan katak: “koordenador FRETILIN Distritu Covalima” mos partisipa konferensia ida nee no apoia objectivu grupu nee nian.  Ema neebe partisipa no neebe TVTL dehan Koordenador FRETILIN iha distritu Covalima, mak ema ida naran Antonio Alves, neebe iha realidade laos Koordenador FRETILIN iha Covalima, ka iha fatin seluk.

Notisia ida nee fo sai mos iha jornal balun neebe temik katak Antonio Alves nee “koordenador FRETILIN”, maske nee bosok.

Relasiona ho notisia falsu ida nee kordenador Partidu FRETILIN nian iha Distritu Covalima Fransisco de Andrade desmente kedas iha conferensia imprensa neebe realisa iha Sede Comite Sentral FRETILIN, Comoro, Dili iha Sabado, loron 2 fulan Junhu dadaun.

Hatan ba notisia neebe fo sai, Francisco de Andrade deklara: “Ida nee’e, hau hateten los, la los. Tamba nia laos koordenador. Tamba ema ne’ebe temi dehan katak Antonio Alves ne’e, nia la activu Partidu FRETILIN iha Suai kleur ona. Kuaza tinan ida liu ona, nia abandona Partidu ne’e tamba nia lakohi servisu ba Partidu ne’e.  Antes ne’e nia hanesan segundo secretario Partidu FRETILIN nian iha Covalima, maibe hanesan ohin hau temi ba ne’e, nia abandona servisu Partidu nian iha 2010, no nia la servisu ou la activu kleur tiha ona.”

Koordenador FRETILIN nian iha distritu Covalima nee mos deklara katak ema neebe refere la iha influensia ida ba kuadrus no militantes FRETILIN, no realsa katak kuadrus no militantes FRETILIN metin nafatin ho partidu FRETILIN.

“Ema nee la iha influensia. Durante ne’e nia la iha influensia, tamba hau hatene los se mak nia. Nia ne’e hanesan ne’e karik ita temi katak Ai-kakeu ida. Nia la iha influensia bo’ot ida iha Suai ne’eba. Hau nu’udar kordenador Distritu Covalima ho militantes tomak iha Covalima sei metin nafatin iha FRETILIN, ohin no ba oin. Nem ida atu muda ami nia posisaun iha Partidu FRETILIN,” deklara koordenador FRETILIN nian iha Covalima nee.

Koordenador nee mos lamenta katak, maske responsaveis CCF FRETILIN convida RTTL/TVTL neebe fo sai informasaun falsu nee katak koordenador FRETILIN nian iha Covalima partisipa iha konferensia imprensa neebe refere, RTTL/TVTL la mosu iha konferensia imprensa ohin dadersan hodi bele tau fila fali lia los kona ba sira nia reportagem. 

BA INFORMASAUN SELUK FAVOR DERE MAI FRETILIN.Media (Jose Teixeira) iha +670 728 7080