DR. FRANCISCO GUTERRES “LU OLO”: SERVIDOR POVO NO NASAUN

DR. FRANCISCO GUTERRES “LU OLO”: SERVIDOR POVO NO NASAUN

Dr. Francisco Guterres, koñesidu liuliu ho naran funu “Lu Olo”, moris iha Ossú, distritu Viqueque, iha 7 Setembru 1954.

Lu Olo kaben ho Cidália Lopes Nobre Mouzinho Guterres, no sira na’in rua iha oan tolu, Francisco Cidalino Guterres (Olo Kai), Eldino Nobre Guterres no Felezito Samora Guterres.

Hosi 1963 to’o 1969 Lu Olo simu edukasaun nível primáriu nian hosi Colégio de Santa Teresinha, iha Ossú.

Hosi 1969 to’o 1973 nia estuda iha eskola Liceu iha Dili. Iha 1973 nia interrompe estudus no fila fali ba Ossú no hanorin iha Colégio Santa Teresinha nu’udar monitor eskolár to’o 1974.  Iha duni tinan ida ne’e, nia fila fali ba Dili ho intensaun atu kontinua ninia estudus, maibé,  oportunidade ida ne’e la akontese tanba, entretantu,  iha tinan ne’e duni mosu golpe estadu iha Portugal ne’ebé hatún governu kolonial-fascista no situasaun polítika iha Timor-Leste muda kedas. 

Governu foun Portugal nian hahú prosesu kore ex-kolónia hotu-hotu hosi sira nia ukun no, Lu Olo, iha tempu ne’ebá, ho tinan 19 de’it hakoak kedas ideal Ukun Rasik An ne’ebé ASDT hato’o ba Povu Timor-Leste tomak. Tanba ninia envolvimentu diretu iha luta libertasaun nasional to ‘o 1999 no reorganizasaun FRETILIN nian nu’udar partidu no mós ninia partisipasaun iha primeira faze formasaun aliserses estadu Timor-Leste nian, Lu Olo labele hatutan ninia estudus to’o tinan 2005. Iha 2005 de’it mak nia hetan fali oportunidade atu hatutan ninia estudus bainhira UNTL loke kursu Direitu tanba kooperasaun nebe I Governo Constitusional liderado husi DR Mari Alkatiri hala’o ho Governo Portugés.

Kontribuisaun Lu Olo nian ba luta

Iha 1974 de’it mak primeiru movimentu organizadu hahú iha abut iha Timor-Leste atu hametin unidade nasionál no nune’e, bele haforsa povu ninia kbi’it atu lori ba oin ita nia bei’ala sira nia mehi UKUN RASIK AN.  ASDT (nu’udar Asosiasaun abut FRETILIN nian) mak hahú haburas ideal ida ne’e no hosi 11 Setembru 1975, FRETILIN hatutan to’o ohin loron. Lu Olo hakoak kedas ideal ida ne’e iha 1974 no iha 1975, nia integra iha ekipa esklaresimentu no mobilizasaun povu nian ne’ebé Bieke Sahe (Vicente dos Reis, komisáriu polítiku FRETILIN nian ne’ebé asume kargu Ministru Traballu iha primeiru governu RDTL nian) mak lidera. Lu Olo rekoñese katak Sahe mak sai ninia mentór polítiku bainhira nia hanoin fila fali ba kotuk: “Sahe, lider ida ke fó inspirasaun bo’ot mai hau” (Nakroma, númeru 003/XI/05).  

Hafoin Indonésia invade Timor-Leste iha Dezembru 1975, Lu Olo sa’e ba foho atu tuban RDTL nu’udar estadu independente (FRETILIN proklama independénsia Timor-Leste nian iha 28 Novembru 1975 no hetan apoiu hosi nasaun 14, inkluindu eis-kolónias portugezas 5) hamutuk ho povu no FALINTIL ne’ebé organiza an tuir orientasaun Comité Central FRETILIN nian.  Lu Olo hahú ninia vida guerrilheiru nian nu’udar membru pelotaun FALINTIL nian ne’ebé Lino Olokasa komanda iha foho Mundu Perdidu, iha Ossú.

Iha Jullo 1976, Lu Olo hahú ninia kargu polítiku nível médiu nian, nu’udar Vise-Sekretáriu FRETILIN nian ba zona kosteira leste, iha Matebian no nune’e, hahú iha ligasaun direta ho Komandu Luta nian. Hafoin militár indonéziu sira kaer kamarada Francisco da Silva, Sekretáriu zona kosteira leste nian, Lu Olo mak hola fali nia fatin.  

Iha 1978, Lu Olo simu fali kargu Vise-Sekretáriu ba Zona 15 de Agostu, iha Matebian. Iha  ne’ebá, Lu Olo hala’o mós knaar nu’udar “Delegado do Comissariado” ne’ebé fó apoiu politiku iha organizasaun no mobilizasaun massas nian ba hala’o produsaun no atividades polítikas.

Iha 1982, Lu Olo simu nomeasaun nu’udar Adjuntu iha regiaun Leste no halo parte mós KomanduTerseira Kompañia Guerilla nian, nu’udar responsável politiku.

Iha 1984 nia simu nomeasaun nu’udar Komisáriu Politiku no iha 1987, kontinua hala’o knaar ida ne’e iha rejiaun Cruzeiros ne’ebé integra Distritu Manufahi, Manatuto Oeste, Aileu no parte Oriental Dili nian.

Iha 1987, hafoin lideransa FRETILIN nian, iha rai laran, deside harii CNRM no despartidariza/hasees FALINTIL hosi estrutura organizasional FRETILIN nian, Xanana Gumão, nu’udar Komandante FALINTIL nian, tenke sees an mós hosi lideransa FRETILIN no asume de’it knaar nu’udar Prezidente CNRM nian. Iha kontextu ida ne’e, mak Lu Olo assume primeiru kargu politiku iha órgaun máximu lideransa FRETILIN nian: Vise-Sekretáriu Komisaun Diretiva FRETILIN nian, órgaun polítiku ida ne’ebé halo parte mós CNRM. Hafoin militar indonéziu sira kaer tiha Ma’Huno Bulerek Karataiano” Bukar” (Sekretáriu) no Hodu Ran Kadalak (Vise-Sekretáriu), CDF funsiona de’it ho Nino Konis Santana (Sekretáriu) no Lu Olo (Vise-Sekretáriu). Maibé, Nino Konis Santana mate, de repente, iha 11 Marsu 1998, iha Ermera. Lu Olo rona notísia triste ne’e liuhosi rádiu iha fatin klandestinu ida entre Laclúbar no Soibada no sente laran taridu tebetebes tanba nia mesak de’it ona mak iha responsabilidade atu kaer knaar hotu-hotu Komisaun Diretiva FRETILIN nian. Ho preokupasaun ida ne’e mak nia haruka surat ida ba Mari Alkatiri iha Moçambique no husu reajustamentu estrutural FRETILIN nian.

Entretanto, “ Convencão Timorense na Diáspora” realiza iha Peniche/Portugal, iha Abril 1998 no deside hakfilak CNRM ba CNRT.  Lu Olo simu kargu nu’udar membru Konselhu Polítiku Nasional CNRT nian (CPN/CNRT), Sekretáriu Frente Politika Interna (FPI) nian no sai mós membru Konsellu Politiku Militar iha Rezisténsia Armada, hamutuk ho Taur Matan Ruak. Sira nain rua maka forma orgaun ne’e no nia komposto husi Chefe de Estado Maior das FALINTIL no Secretariado Comissao Directiva FRETILIN iha Resistensia Armada.

Apelu Lu Olo nian hetan resposta hosi Mari Alkatiri no iha Agostu 1998, delegasaun ida hosi laran ne’ebé xefia hosi Hodu Ran Kadalak hetan malu ho delegadus FRETILIN nian hosi Mocambique, Portugal no Austrália iha Konferénsia Nasional Estraordinária FRETILIN nian, ne’ebé hala’o iha Sydney, Austrália.  Iha eventu istóriku ida ne’e, Konferensistas sira deside harii órgaun másimu foun ida ho naran Konsellu Prezidensiál FRETILIN no eleje Lu Olo nu’udar Koordenador Jeral Konselhu ne’e nian, Mari Alkatiri nu’udar primeiru Vise-Koordenador, Ma’ Huno nu’udar Segundu Vise- Koordenador no Mau Hodu nu’udar Sekretáriu ba Sekretariadu Politiku Permanente FRETILIN nian.

Iha 26 Novembru 2000 Lu Olo entrega nia kilat M-16 no kilat musan hotu-hotu ba komandu FALINTIL iha Aileu no fila ba vida sivíl.

Iha tinan 2000, hamutuk ho kamarada Mari Alkatiri, Lu Olo dirije ho susesu Konferénsia Nasional Kuadrus FRETILIN nian no iha eventu istóriku ida ne’e, konferensistas hotu-hotu deside katak iha nesesidade atu hahú kedas reorganizasaun FRETILIN nian, hosi leten to kraik, atu hamriik nu’udar partidu iha sistema demokrátiku ne’ebé sei harii iha Timor-Leste independente.

Primeiru Kongresu FRETILIN nian ne’ebé realiza iha 2001 eleje Lu Olo nu’udar Prezidente FRETILIN nian, mandatu ida ne’ebé nia hatutan dala ida tan liu hosu 2° Kongresu partidu nian iha Maiu 2006.

Ho lideransa Lu Olo/Mari Alkatiri nian, mak FRETILIN manán eleisoens legislativas iha 30 Agosto 2001 no hetan 55 assentus iha Assembleia Constitituente, órgaun ne’ebé hakfilak ba Parlamentu Nasionál tuir akordu ne’ebé UNTAET halo ho CNRT.

Ho mós lideransa Lu Olo nian, mak Asembleia Konstituinte redije no aprova Konstituisaun RDTL nian ne’ebé vigora to’o ohin loron.

Iha horas 00:00 iha loron 20 Maio 2002 nu’udar Prezidente Parlamentu Nasional nain, Lu Olo halo Deklarasaun Restaurasaun Independénsia RDTL nian no fó posse ba Sr. Xanana Gusmão nu’udar Prezidente Repúblika. 

Lu Olo lidera Parlamentu Nasional hosi 20 Maiu 2002 to’o Agostu 2007 durante períodu ne’ebé estadu RDTL foin hahú hari’i aliserses nu’udar estadu-de-direitu demokrátiku.  Ho pasiénsia no dedikasaun tomak mak nia lidera diskusaun no debates leis, ratifikasaun akordus internasionais incluindu akordu kona-ba tasi Timor ho Austrália no tin-inan, orsamentu jerál estadu nian ne’ebé reforsa estadu ninia kapasidade atu hala’o dezenvolvimentu polítiku, sosial no ekonómiku.

Iha Abril 2007, Lu Olo kandidata ba Prezidente Repúblika iha II eleisaun prezidensiál no manán votos barak liu kandidatu sira seluk iha primeira ronda maibé lakon iha segunda ronda. Biar Lu Olo lakon iha segunda ronda eleisaun Prezidensiál nian, rezultadu eleitoral hatudu katak FRETILIN iha eleitoradu ida ne’ebé forte no konsistente tanba númeru votantes ne’ebé vota a-favor kuazi hanesan iha ronda rua eleisaun prezidensial nian.

Ho lideransa Lu Olo/Mari Alkatiri nian, FRETILIN manán fila fali eleisoens lejislativas ne’ebé realiza iha Agostu 2007 maibé ho maioria simples. Biar manán eleisoens, Prezidente Repúblika lafó oportunidade ba FRETILIN forma IV governu konstitusionál.

Ho lideransa Lu Olo/Mari Alkatiri mak FRETILIN halo opozisaun de faktu ba governasaun AMP, oposizaun ida ne’ebé halo ho sentidu responsabilidade liu hosi meius legais no métodus demokrátikus.  Nune’e, FRETILIN ho lideransa Lu Olo/Mari Alkatiri, fó lisaun boot ida ba polítikus hotu-hotu oinsá halo oposizaun sein rekursu ba violénsia ka distúrbiu ne’ebé prejudika funsionamentu estadu Timor-Leste nian no afekta paz no estabilidade país nian no povu ninia vida.

Iha 20 Agostu 2011, FRETILIN fó oportunidade ba militante ida’idak atu eleje lideransa foun ba mandatu 2011-2017. 

Iha eventu istóriku foun ida ne’e, hosi total votantes 153.366, pakote lideransa Lu Olo/Mari hetan votu konfiansa hosi militantes 147.029. Nune’e, Lu no Mari sai lider politiku rua de’it iha istória Timor-Leste nian ne’ebé eleitu liu hosi votu sekretu, diretu no universal.

Iha terseiru Kongresu partidu nian ne’ebé realiza iha Setembru 2011, Lu Olo no Mari Alkatiru simu pose nu’udar Prezidente no Sekretáriu-Jeral FRETILIN nian to’o 2017.

Durante tinan 24, Lu Olo moris iha povu nia le’et no hala’o luta ho fiar metin katak FRETILIN sei kore duni povu Maubere hosi kolonizasaun no sei liberta povu ida ne’e hosi pobreza iha aspetu hotu-hotu liuhosi dezenvolvimentu ekilibradu no sustentável. Ho fiar ida ne’e mak nia hahú nu’udar militante no ikus mai lidera FRETILIN to’o ohin loron. 

Tinan ida ne’e, Lu Olo, ex-guerrilleiru no líder polítiku ida ho esperiénsia naruk tebetebes iha luta libertasaun nasional, organizasaun vida partidária iha sistema demokrátiku no konstrusaun estadu Timorense nian, sei hahú serve estadu no povu ho kapasidade intelektual iha área jurídika. Iha Abril tinan ida ne’e nian, Lu Olo sei ramata ninia lisensiatura iha Direitu. Ida ne’e susesu ida ne’ebé serve nu’udar ezemplu ba ex-guerrileiru sira, ba politiku sira, ba aman no inan sira ne’ebé iha oan kosok no mós ba timor oan en-jerál, katuas, ferik ka joven. Katak laiha buat ida taka dalan ba ita nia mehi no esforsu atu alkansa susesu!

Ida ne’e mak perfil Lu Olo nian, Prezidente FRETILIN nian! Ho orgullu no onra mak FRETILIN kandidata Lu Olo ba Prezidente Repúblika Demokrátika Timor-Leste ba mandatu 2007-2012.

Lu Olo kompromete publikamente, liuhosi Konferénsia Imprensa, iha loron 13 Janeiru 2012, katak, biar partidu FRETILIN mak aprezenta ninia kandidatura, nia sei hala’o ninia knaar nu’udar Prezidente Repúblika ba povu tomak bainhira eleitu iha eleisoens Prezidensiais 2012.

Lu Olo kompromete katak, nu’udar Prezidente Repúblika nia sei:

-  Konsolida demokrasia, konstitusionalidade no estadu-de

   direitu demokrátiku;

-  Konsolida soberania povu no estadu nian

-  Promove paz no estabilidade

-  Respeita Konstituisaun no leis

-  Sei la atua nu’udar opozisaun hasoru Governu no Parlamentu

-  Respeita opozisaun no promove polítika inkluzaun maluk timor oan sira nian iha prosesu paz, estabilidade no dezenvolvimentu

-  Respeita independénsia Tribunais no kontribui ba justisa

FRETILIN fiar katak maioria povu Maubere sei vota ba Lu Olo tanba ninia perfil preenxe kritériu hotu-hotu ne’ebé Konstituisaun ezije hosi ema ne’ebé kaer funsaun nu’udar Prezidente Repúblika.

VOTA BA LU OLO, KANDIDATU HUSI PARTIDU ATU SAI PREZIDENTE BA POVU TOMAK!