Kandidatu PR Lu-Olo Partisipa Marcha Jornada Da Paz

Jornal INDEPENDENTE

Kinta, 23 Fevereiru 2012

Kandidatu PR Lu-Olo Partisipa Marcha Jornada Da Paz

“Bispo Dili Oferese Pas ba Eleisaun Jeral”

Igreja katolika husi Dioseze Dili, hamutuk ho Universitariu, Juventude, Estudante Pre-Primaria, lideransa Partidu, Membru Governu, PN, Tersa (21/02) halao jornada da pas 111 hahu husi Igreja Ai-Mutin to’o Lisidere hodi reza ba eleisaun jeral 2012.

Marca Jornada da Pas ne’e, organiza husi komisaun justica no paz Dioseze Dili, ne’ebe hetan partisipa husi Bispo Dioseze Dili, Dom. Alberto Rikardo da Silva, Membru do Governu, Embaixador Estadus Unidus da Amerika Judith Fergin, Presidenti Partidu FRETILIN atual kandidatura Presidenti Republika periode 2012-2017 Francisco Guterres ‘Lu-olo’ membru Parlamentu Nasional no konvidados seluk tan.

Jornada da Pas ne’e, hetan lansamentu husi Bispo Dioseze Dili iha loron 21 fulan Fevereiru no sei remata iha loron 10 Fulan Junu tinan ida ne’e.

Marca husi igreja Ai-Mutin Komoro hahu tuku 02:00 otl no remata iha Jardim Lecidere kuaze tuku 06:00 lokraik.

Iha eventu ne’e, ema nain 12, inklui Bispo, Embaixador Estadus Unidus, Kandidatu PR Francisco Guterre Lu-Olo, membru governu, membru PN, loder partidus politiku husik pombu ho sinal katak, atu garante pas, unidade no demokrasia iha eleisaun mai.

Bispo Dioseze Dili, Dom. Alberto Ricardo dehan ho maromak nia grasa sei apoiu Timor oan sira atu hala’o eleisaun ho Pas, unidade no progresu ho prosprioridade.

“Timor oan hotu moris iha uma kain ida de’it, familia ida de’it, husi Tutu-ala to’o Wekusse, husi tasi mane to’o Tasi Feto ida deit, tamba ne’e tenki fo liman ba malu atu hala’o susesu eleisaun ida ne’e ho pas, hakmatek, unidade, progresu atu hetan prospriodade hodi haburas no hariku Timor Leste, atu nune’e hatudu bam undo katak, Timor mos iha dignidade,” dehan Amo Bispo Ricardo.