Kominukadu: Acordu halau importasaun ai-ha'an tenke divulga ba publiku

FRETILIN.Media

KOMUNIKADU BA IMPRENSA

Dili, 29 Janeiru, 2010

Acordu halau importasaun ai-ha'an tenke divulga ba publiku

Detalhas kona ba kontratu importasaun ai fuan no modo husi Xina mai Timor-Leste, neebe hamosu polemica boot, tenke fo sai ba publiku tamba iha potensialidade atu fo desvantagem ba pordutores nasional, Eis Ministru Agricultura no Eis Primeiru Ministru Estanislau da Silva dehan ohin iha Dili.

Deputadu nee husi partidu boot liu no historiku FRETILIN, dehan katak kompanhia Sino Green Land deklara iha sira nia komunikadu ba imprensa neebe lansa internasionalmente iha 11 Janeiru 2010 katak sira selebra akordu ho “representantes locais iha Timor-Leste” neebe “iha ligasaun makas ho governo no iha rekursu neebe bele fo vantagem baa mi atu tama too klean iha merkadu local.”

Sr Da Silva dehan anunsiu nee husi kompanhia hautudu katak governu Timor-Leste nian fo duni apoiu ba akordu neebe selebra husi Sr Anson Fong, Presidenti Sino Green land no Sr Ted Lay, empresariu Timor oan ida neebe besik liu governu de facto Xanana Gusmao nian.  Negosiu nee hetan kritika makas husi opozisaun no ONG oioin tamba sira preokupa negosiu nee sei impata makas dezenvolvimentu setor agricultura iha Timor-Leste. 

Governu hatan iha nia komunikadu ba imprensa iha loron 14 Janeiru 2010, tuir neebe sira reklama katak: “Governu hakfodak ho deklarasoens iha imprensa neebe fahe ba mundu husi kompanhia naran Sino Green Land. La iha membru governu ida neebe autoriza, ajuda, apoia, ka aprova akordu kooperasaun entre Sino Green Land ho representantes locais.”

Maibe Sr Da Silva dehan katak delegasaun ida neebe kompostu ema nain hitu husi Sino Green Land no “China Green Food Association”, neebe lidera husi Sr Luo Xiong, halau visita ba Timor-Leste entre 14 to’o 18 Novembru 2009, hatan ba konvite ida husi Sr Antonio Maria Hung, neebe assessor especial ba Primeiru Ministru kona ba assuntus dezenvolvimentu ekonomiku.

Sr Da Silva dehan katak: “delgasaun nee nia atividades iha Dili hamosu duvidas seriu kona ba lialos iha deklarasaun iha governu de facto nia komunikadu neebe nega katak governu envolve iha negosiu nee.”

Nia dehan katak delegasaun hasoru malu dalan rua ho Secretariu Estadu Eduardo de Carvalho iha Ministeriu Agricultura, ho Vice Presidente Parlamentu nain rua, Sr Vicente Guterres no Sra Maria Paixao.  Sira hasoru malu mos ho ema boot iha administrasaun publiku hanesan: Sr Fernando Hi da Silva neebe diretor ba Ministru Ekonomia no Dezenvolvimentu nian; Diretora Geral Ministeriu Turismu, Comersiu no Industria nian, Sra Manuela Corte Real; Sr Noel Carvalho, Diretor Tradeinvest Timor-Leste nian; no Sr Paulo Remedios, assessor juridiku Presidente Republika nian.

“Se ita hare ba Sino Green Land nia enkontrus no diskussaun barak ho governu nia ema no tuir mai hetan akordu ho empresariu ida neebe besik liu governu, ita tenke duvida makas bainhira ita rona governu nega katak sira envolvidu iha negosiu ida nee.”

Da Silva dehan nia fiar katak investimentu no promosaun ba produtu agrikultura local atu bele halo sustituisaun ba importasaun tenke prioridade ba governu iha Timor-Leste nian.  Fatin barak iha foho iha Timor-Leste iha condisaun climatica neebe furak tebes atu halo produsaun ba produtus hanesan ai fuan no modo oioin.

“Governu de facto nee koalia barbarak kona ba poromosaun produtu agrikultura local maibe iha pratika sira oho fali produtor local hare nian hodi importasaun fos ho subsidiu boot neebe hatam osan barak iha sira nia maluk crony sira nia bolus,” Da Silva deklara.

Da Silva dehan katak nia sei kanaliza kazus negosiu Sino Green Land nee ba Kommisaun relevante iha parlamentu nasional hanesan kommisaun agrikultura no mos kommisaun ekonomia no finansas atu halo investigasaun no atu responsabiliza governu tamba hamosu konfuzaun boot ba setor komersiu no investimentu iha Timor-Leste neebe tenke halo klaru no hadiak.  

Ba informasaun tan contacta ba Deputadu Estanislau da Silva: +670 733 5062