Sekretariu Geral FRETILIN nian fo benvindas ba Xefe UNMIT foun

FRETILIN

KOMUNIKADU BA IMPRENSA

Dili, 7 Janeiru 2010

Sekretariu Geral FRETILIN nian fo benvindas ba Xefe UNMIT foun

Horseik loron 6 Janeiru 2010 Secretariu Geral FRETILIN nian simu Representante Especial Secretariu Geral Nasoens Unidas iha Timor-Leste foun, bainhira nia halo visita kortesia ba residensia ofisial Dr. Alkatiri nian iha Farol. Senhora Ahmeera Haq foin kona ain iha rain Timor-Leste hodi bainrua no horseik hasoru malu kedas ho Presidente da Republika Ramos Horta no tuir mai kedas hasoru malu ho Dr. Mari Alkatiri nudar Secretario Geral FRETILIN nian.

Maske ida ne’e visita kortesia SRSG foun ne’e ho Dr Alkatiri koalia kona ba asuntu balun ne’ebe importante ba nasaun no povu Timor-Leste.

“Ami koalia kona ba assuntos neebe bele lori paz, estabilidade no desenvolvimentu iha rai Timor-Leste, liliu oinsa partidu historiku no maioritariu FRETILIN sempre pronto hodi uluk kedas atu fo kontribuisaun ba pas, estabilidade no desenvolvimentu iha ita nia rain,” temi Dr. Alkatiri.

Durante reuniaun Senhora Ahmeera Haq hatete ba Dr. Alkatiri katak “povu no nasaun Timor-Leste iha sorte bo’ot tanba iha partidu hanesan FRETILIN nu’udar oposisaun no lider oposisaun ida hanesan Dr. Alkatiri, tanba FRETILIN hatene no hatudu ona halo oposisaun ho pas no sem kaer violensia”, katak FRETILIN laos hanesan oposisaun balun iha rain seluk ne’ebe nia servisu molok mai Timor-Leste.

Dr Alkatiri reforsa nia mensagem katak FRETILIN sempre iha konviksaun atu harii pas, estabilidade no desenvolvimentu iha nasaun Timor-Leste, no sempre laran nakloke ba no hakarak servisu ba pas, estabilidade no desenvolvimentu povu Timor-Leste nian.

“Hau repete ba nia katak FRETILIN sei halo buat hotu atu dekada 2010-2020 sai dekada ba pas, estabilidade no desenvolvimentu ba povu no nasaun Timor-Leste tomak. Sra Haq reforsa katak oposisaun forte no kredivel hanesan FRETILIN halo dadaun no halo hodi 2007, importante tebes atu hari sistemas no instituisaun governasaun ne’ebe forte no ne’ebe povu tomak bele fiar. Hau konkorda ho nia no hatete ba nia katak importante ita hotu servisu atu reforsa justisa no tenke hakotu sentidu impunidade atu nunee ita bele hametin pas, estabilidade no desenvoivimentu.”

“Hau mos reforsa katak FRETILIN lakoi partidu se se deit bele usa forsas armandas ka polisia nasional atu buka hetan sira nia objectivos politikus. Tanba ne’e mak prioritariu atu reforma sector seguransa no defesa. Ita presisa hetan consensus nasional atu halo reforma ba sector defesa no seguransa, maibe mos ba reforma iha sector justisa no administrasaun publiku, hodi hetan governasaun neebe diak."

Kona ba papel UNMIT nian to’o tinan 2012 hau hatete ba nia katak Timor-Leste sei presisa apoiu husi komunidade internasional, maibe tempo too ona neebe ita presisa hetan mekanismu oinsa asistensia internasional ne’e bele kontinua maibe labele hamosu fali dependensia ba komunidade internasional. Hau kontente hatene husi Sra Haq katak nasoens unidas pronto atu kontinua fo apoiu fundamental iha sector seguransa,” Alkatiri reforsa.

Lider partidu historiku FRETILIN no SRSG foun konkorda atu halao enkontru dialogu no konsulta ho malu semanalmente.

“Ida ne’e importante katak FRETILIN neebe partidu maioritariu no oposisaun de faktu tenke halo dialogu nafatin ho Xefe UNMIT hanesan ami halo uluk kedas ho Senhor Atul Kare no UNMIT. Hau hein katak FRETILIN sei kontinua fo kontribuisaun atu mantein nafatin pas no estabilidade iha Timor-Leste no atu fo apoiu ba nasoes unidas no komunidade internasional halao sira mandato iha Timor-Leste,” dehan Dr Alakatiri.

FAVOR DERE BA DEPUTADU JOSE TEIXEIRA 728 7080 SE PRESIZA INFORMASAUN RUMA TAN