KOMUNIKADU BA IMPRENSA
Dili, 12 Janeiru 2010
SG FRETILIN koalia ho Ian Martin no Xefe UNMIT kona ba paz, estabilidade no dezenvolvimentu iha TL
Ohin dader, loron 12 fulan Janeiru, tinan 2010, Eis Primeiru Ministru no Secretariu Geral FRETILIN nian, Dr. Mari Alkatiri halao enkontru formal ho ekipa teknika ONU nian, nee-be lidera husi Sr. Ian Martin, hamutuk ho Xefe UNMIT foun Sra Ahmeera Haq no ninia adjuntu, no elementus seluk ONU nian. Ekipa nee mai Timor-Leste atu halao dialogu ho lideransa no elementus sosiedade sivil Timor-Leste nian kona- ba futuru misaun nasoens unidas iha Timor-Leste.
Iha entrevista ho jornalista sira bainhira enkontru ramata tiha, Dr. Alkatiri hatete ba jornalista sira katak enkontru nee pozitivu no produtivu tebes, tanba oportunidade diak ba nia nudar eis-primieru no governante ho experiensia maka'as, no mos nu’udar sekretariu jeral partidu FRETILIN, neebe partidu historiku iha rain nee no partidu ida neebe bo’ot liu hotu iha Timor-Leste, atu kontribui tan ba prosesu harii, paz, estabilidade no dezenvolvimentu iha rain Timor-Leste.
“Ekipa ida nee liderada husi ema ida neebe ita hotu hatene, Sr. Ian Martin, belun diak Timor-Leste nian hori uluk kedas, mai foti ita Timor oan nia hanoin no vizaun kona-ba oinsa’a Nasoens Unidas bele tulun Timor-Leste tinan oin mai no tinan hirak tuir mai atu hetan paz, estabilidade no dezenvolvimentu. Ekipa nee mak sei lori relatoriu ba Sekretariu Jeral ONU nian, neebe sei lori rekomendasaun ba Konselhu Seguransa ONU nian atu desidi UNMIT nia knaar ba tinan hirak tuir mai nee atu la'o oinsa'a. Tanba nee mak importante ita fo ita nia hanoin ba sira atu bele tulun ita nia rain no Povo diak liu tan no hetan duni benefisiu iha futuru," Alkatiri dehan.
Dr. Alkatiri hatutan katak, "FRETILIN sempre prontu atu kolabora ho
komunidade internasional tomak, liliu ONU, atu buka mekanizmu oinsa'a sira bele kontinua fo tulun neebe ita presiza atu harii paz no estabilidade, maibe hau dehan ba sira mos katak importante ita buka dalan atu labele hamosu fali dependensia psikolojika Povu nian ba tulun hosi komunidade internasional. Sira bele fo tulun atu
dezenvolve ita nia instituisoens no ema Timor-Leste ninia kapasidades, nunee aban bairua ita bele moris ho paz, ho estabilidade no bele halau programa dezenvolvimentu neebe hasai lalais ita nia Povo hosi kiak.”
Dr. Alkatiri informa mos ba jornalista sira katak, nia ho ninia
komitiva, neebe komposta mos husi Vice-Presidenti Partidu FRETILIN
nian, Deputadu Arsenio Bano, no Deputadu Jose Teixeira, no Sr.
Filomeno Aleixo Assesor ba Eis-Titular/Eis PM, diskuti mos kona- ba
reforma ba sektor seguransa no defeza, justisa, kombate kontra KKN,
dezenvolvimentu umanu, desentralizasaun, eleisoens munisipais nian, no oinsa'a atu evita konflitu no harii dame no estabilidade.
“Ami fo FRETILIN nia hanoin kona ba assuntu barak no oinsa'a ONU bele fo tulun atu hadiak sektor balun no atu garante governasaun ida neebe diak tebes. Hau hatete ba sira katak ita presiza hetan consensus nasional kona ba area balun hanesan divizaun administrativa, reforma sektor defeza no seguransa, no sektor justisa, hodi harii no hametin instituisoens neebe Povo tomak bele fiar no neebe neebe halao sira-nia knaar ho respeitu ba estadu de direitu demokratiku. Hau dehan katak hau preokupadu tebes ho situasaun neebe orgaun soberania la hatudu respeitu ba malu no halo interferensia oioin ba malu. Nee tenke iha mudansa.”
“Kona ba ONU nia mandatu, ami FRETILIN mos konkorda kata presiza duni hanaruk tan mandatu ba tinan ida, no too tinan 2012 ita sei presiza atu hare ho diak, ho kuidadu situasaun seguransa no estabilidade iha rai laran, no depois mak ita sei halo avaliasaun fali atu hare se ita presiza sira nia prezensa nafatin ka lae," Alkatiri deklara.
BA INFORMASAUN TAN, FAVOR DERE BA SR. FILOMENO ALEIXO IHA 734 038
No comments:
Post a Comment