Deklarasaun Politika : Desastre Infraestruturas AMP Nian

FRETILIN - BANCADA PARLAMENTAR

Declaração Politica

Dili, 25 de Maio de 2010

DESASTRE INFRAESTRUTURAS AMP NIAN

Nai  Presidente Parlamento Nacional

Fernando de Araújo – Lasama

Ex.Cias

Atu hamentin ita nia Independência hau hanesan Deputado  membro Parlamento Nacional no representante Povo nia, iha dever hodi haburas, no hamentin uma fukun ne’e nia knaar, hodi tatoli Povu nia preocupação ba Governo, no sai Povu nia lian, Povu nia isin, no materializa povo nia mehi.

Nudar Deputado hussi bancada FRETILIN hanesan oposição iha knaar no iha competência tomak atu tatoli Povu nia lian no hussu ba Governo, tuir art. 9°, alinea h, no artigos 137° e  138° tuir Rejimento haruka.

Halo requerimento ida ne’e hau hakarak hussu ba Governo atu bele hatan resposta ho escrito tuir Konstituição da República artigo 101° no. 2  e artigo 107°. Atu nune’e ita hotu bele hakruk ka halo tuir lei nebe iha.

Declaração Politica.

► Ohin Bancada Fretilin hakarak koalia kona Construções Projectos Físicos nebe halo hussi Ministérios GAMP em geral e em particular Ministério Educação. Ami hanoin GAMP ne’e laiha duni sentido de estado, laiha sentido patriotismo tamba desenvolvimento ida ne’e halo la tuir plano desenvolvimento nebe integrado ho efectivo no eficiente.

Tinan Infrastruturas hahu hanaran iha 2008, continua mai iha 2009, osan tokon ba tokon aloka atu halo desenvolvimento maibe realidade la acontece buat ida. Electricidade mate lakan to’o oin loron, Estradas
koak ba koak mai taka mos lahatene. Orçamento nebe aloka ba construção Óleo pesado mos la realiza tamba laiha plano. Osan ne’e mak aloka fali ba iha pakote referendum, maibe realidade hatudo momos katak osan ne’e
lakon mak barak la halo buat ida ho diak.

Dader san kmanek ida ne’e, Fretilin halo declaração politica atu hatete sai ba ema hotu katak ME laiha capacidade halo gestão ba Ministério nebe refere.

Escolas iha fatin barak to’o oin loron laiha condições, caretiras escola balu laiha, curso intensivo ba professores mos lao, nakonu ho manipulação ba osan nebe aloka, hanesan hakerek iha petição hussi Sindikato Professores sira hussi Baucau.

Iha inicio 2008, ME racik mai iha uma fukun ida ne’e canta, atu loke tan Escola Politicnica rua. Maibe ita iha ona 2010 la acontece buat ida. Hanoin hakarak halo barak maibe la sukat nia an. Hakarak halo barak maibe escolas nebe Técnico hanesan EPB ignora tiha. Crise 2006 escola nebe refere hetan estragos, maibe to’o oin loron la fo atenção, halo finge haluha tiha.

Depois de hetan estragos, to’o oin loron equipamentos laboratorium laiha, estudantes sira ne’e halo praktek fali iha DIT. Hahalok hanesan ne’e Fretilin considera iha “Conflict of Enterest”. Ita hotu hatene katak Shr. João Cancio hanesan eis Reitor DIT. Professores hussi EPB hanesan orientadores ba sira nia estudantes ba halao praktek hirak ne’e mos la hetan osan ruma, to’o oin loron.

Tinan tolu nia laran Fretilin hakilar atu bele rehabilita no cria fali condições ba escola nebe refere, maibe la fo atenção máximo, foin lalais ne’e mak iha orçamento $ 300 000 e tal mil atu hadiah escola ne’e ho escola secundário ida iha Becora.

Maibe, tamba Irresponsabilidade, Incapacidade ME, EPB horseik iha sala ida nebe rehabilitado hetan desastre, Forro/Plafon sala ne’e nia monu no halo kanek estudantes lubuk ida, Professor no estudante ida lori kedas ba Hospital ho ambulância. (Hare fotografias)

Fretilin considera hanesan “Kelalaian”  la fo atenção/interesse hussi ME no Companhia nebe halo rehabilitação ne’e. Fretilin hussu atu halo investigação urgente ba assunto nebe refere.

Ministério Educação aloka osan iha pacote referendum rihun ba rihun halo escolas emergências, hanesan Distintos Deputados barak mos lamenta katak la iha qualidade. Escolas iha fatin balu to’o oin loron escola oan sira sei tur iha rai, tamba Carteiras la iha. Halo mos escolas emergências nebe halo arbiru deit, la halo plano ho diak.

Nain Presidente no maluk Deputados sira.

GAMP ida ne’e, hakarak halo buat hotu hotu hanesan mehi, maibe lakohi sukat nia capacidade. Se halo deit rehabilitação ba escola ida mos la consegue controla supervisiona ho diak, oin sa hakarak halo projecto ho valor osan nebe boot?

Piur liu tan começa halo campanha atu muda Lei Fundo Petrolifero liu 3%? Lei nebe refere la bandu atu foti osan Fundo Minarai nia liu 3%.

Maibe será que GAMP iha Plano no Capacidade atu bele executa osan nebe boot?

Osan nebe aloka ba Central electrica mos problema, aloka tan osan ne’e ba iha pakote referendum, to’o ona tina klaran seidauk iha relatorio.

Oin nusa GAMP aloka osan barak atu executa? Problema boot liu tan mak, tinan 3 nia laran GAMP aloka osan hamutuk mais menos $ 2000 milhões. Resultado?!...... Beneficio?!..........

GAMP ukun hanoin nia enteresse deit, halo decisão Politica, Social no Economia nakonu ho perseguição.

Tamba ne’e Fretilin hakarak declara katak, diak liu mandatu ukun ida ne’e fo kedas ona ba POVO MAUBERE decide atu nune’e Estado ida ne’e lao nafatin ba oin ho PAZ, ESTABILIDADE e DESENVOLVIMENTO.

Ho nune’e Fretilin hussu no exige ba Parlamento ida ne’e atu urgentemente tenke halo investigação ba assuntos sira nebe GAMP halo la tuir Constituição no leis nebe vigora iha Nação RDTL.

Ba ita boot sira nia atensaun hau hato’o Obrigado barak.


Inacio Freitas Moreira

Deputado Fretilin

Ba informsaun tan dere mai deputado Jose Teixeira iha 728 7080