DEKLARASAUN POLITIKA
BANCADA PARLAMENTAR FRETILIN
PARLAMENTO NASIONAL
Dili, 10 de Maio de 2010
Sr Presidente Parlamento Nacional
Fernando de Araújo – Lasama
Ex.Cias
Iha semana hirak liu ba ita hotu rona deklarções barak husi Sua Ex.Cia Shr. Kairala Xanana Gusmao kona ba kampu Gas Greater Sunrise no oinsa ita nudar Estadu no povo tenke hamutuk dada kadoras nee mai Timor-leste.
Los duni, hori uluk kedas Governu FRETILIN mos iha hanoin ida deit, atu assegura katak Povo nee nia rekursus naturais tenke lori mai Timor-Leste explora no usa atu dezenvolve industria hanesan petrokimikas iha ita nia rain rasik.
Hori uluk kedas ita hasoru vizinhu ida neebe boot tebes, maibe ita konsegue hetan resultadus nebe diak. Resultados hirak ne’e ita hetan liu prosesu negosiasaun nebe iha determinasaun maka’as ho espiritu nasionalismu, nebe moris husi ita nia historia auto determinasaun ukun rasik aan. Ho nune’e ita hotu bele hetan resultado nebe diak no ida ne’e mak povo Timor hein horik uluk horik wain.
“Mate ka Moris, Ukun Rasik Aan!” Gerasaun uluk mos hakilar nune’e, ita mos agora tenke hakilar nafatin, tamba ita sei hetan obstaculos no desafios oin oin iha futuro mai, tamba nudar Povo, nudar Nação ita sei enfrenta dificuldades oin oin iha futuro.
Sr. Presidenti, maluk deputadu sira.
Kestaun rekursus mina rai nian nee kestaun interese nasional. Nasaun Australia nia politika externa mak atu kaer metin sira nian interese. Ita nia poltika externa husi ita nia politikus nain sira mak atu kaer metin ita nia nasaun nia interese.
Iha tempo hanesan agora mak ita hotu tenke iha vigilansia makas, maske ita iha mos toleransia makas ba ema hotu nebe moris iha ita nia leet.
Ohin bancada FRETILIN hakarak kestiona konviksaun nasional no patriotismu ema balun nian iha governu de facto AMP nian, tamba iha impaktu ba interesse Nasional nebe lao agora dadaun bainhira negociação ba Mina Rai no Gas iha kampu Greater Sunrise ne’e lao ho alegações katak hanesan ameasa malu deit. Ami la hatene se ameasa malu ka lae, maibe ami hatene deit katak rain visinho no amigos ita labele ameasa malu.
Ita hotu hatene katak Ministra de facto Finanças, Sra Emilia Pires, gosta fo servisu ba ema estrangeiru mak barak, no fo fiar ba sira makas liu fo fiar ba ita nia maluk Timor oan sira iha nia ministeriu. Ita hare deit kontratu servisu neebe nia fo ba assessores ho nasionalidade seluk, inklui sira nebe la iha kualkifikasaun atu halau servisu, maibe manan osan boot e boot liu.
Ita la hakfodak karik bainhira ita rona katak nia iha pensamentu kona ba “Sentidu Nacionalismu” ba nasaun ita nian nebe la kondis ho pensamentu nebe ita hein husi ema ida nebe kaer pasta nudar ukun nain ida.
Hau deklara katak bancada FRETILIN hetan provas, liu husi email ida nebe Sra Emilia Pires haruka ba ema ida nebe activista husi NGO Internasional ida, tuir nebe nia hakerek katak, nia la fiar Nasionalismu ba Timor-Leste.
Iha loron 16 fulan Junhu 2006 nia hakerek nune:
I do not buy this rhetoric of nationalism to the point where people continue to be poor.....that does not mean we have to nationalize everything..... it meant we had to know how to negotiate deals which could bring a win-win situation for everyone.....
“hau la fiar ba retorika nasionalismu too hare hau nia povo kiak nafatin……ita la presiza nasionalisa buat hotu…….ita presiza halo negosiasaun neebe hetan situasaun win-win (manan manan) ba ema hotu.”
Iha email nee la klaru nia refere ba win win saida, ka negosiasaun saida, maibe nia contextu mak nee, nia la fiar katak Timor-Leste nia interese bainhira Sr Mari Alkatiri kaer, nee katak ita presiza Nasionalista, no karik tamba nee mak ita nudar nasaun hetan reasaun husi rain seluk hasai Dr Alkatiri.
Agora mak ita foin hatene Ministra nee la fiar duni ba pesnamentu Nasionalista. Nia koalia ho Banku Mundial ho FMI sira, katak oin nusa ita halo kona ba fundu mina rai nia? Ita lahatene, nia tau ita nia “nasionalismu” iha leten ka keta nia hanoin nia an tau nia enteresse pessoal ka nia karreira pessoal? Ami la fiar katak nia tau nia sentimento nacionalista hanesan nia hakerek.
Bainhira nia koalia ho consultant sira nebe mai iha semana kotuk halo seminar ida kona ba oinsa ita halo investimentu ba ita nia fundu mina rai, hanesan senhor Australiano ida husi Melbourne, hussi duni Sra Emilia nia hela fati iha Australia/Melbourne, ne’e tamba nia iha hanoin “nasionalismu” ka lae? Hau deklara katak nia la tuir duni nia liafuan rasik.
Iha mos email seluk nebe hatudu klaramente katak nia la iha sentimentu liu ba ita nia soberania Nacional no ita nia Independesia. Maske ita iha hanoin oin seluk politikamente ho deputado sira neebe tuur iha sorin neba, ita hotu fiar ita nia nasaun nee tenke independente. Ita fiar katak ita ukun rasik aan ona no la presiza
sai fali ema seluk ka rain seluk nia atan.
Povo maubere hotu sei hakfodak karik bainhira sira lê/sani email ida neebe nia hakerek ba nia kolega malai ida katak:
“Timor-Leste sei nunka hetan dame iha futuru……..entaun se ita husik rain nee iha ema hanesan Mari nia liman…..hau bele hatete ba o agora kedas……hau sei apoia integrasaun ho Australia…………pelo menus sira sei halo gestaun ba nasaun ida nee ho gestores neebe diak tebes no Aussie sira nee sei hatene oinsa atu fo an dalan tolu loro loron no sei fo uma diak……..no hau fiar metin luron ikus sei hetan estradas, komunikasaun telefones, nebe diak no ita sei hatene hakerek no lê/sani,…etc etc……biar folin ida nebe ita tenke selu mak ita laos Timor oan ona……..”
(East Timor will never have a peaceful future...... so if we are going to leave it in the hands of people like Mari..... I can tell you right now.... I would support integration with Australia.... at least the management of the country will be under some really managers and the ausies will know how to enusure our people gets their 3 feedings a day and some decent housing.... and I am sure some good roads, good telephone communications, will know how to read and write, etc...etc.... the price to pay is that you no longer call yourself East Timorese.....)
Ita rona fali, “hau sei apoia integrasaun ho Australia”!!!! Nusa? Oinsa ema ida neebe kaer pasta ministra finansas bele iha pensamentu hanesan nee? Faan nasaun no Povo nee ba rain seluk tamba la gosta deit ukun nain ida.
Maibe ita bele mos kestiona nia iha atuasaun golpe 2006 nian karik. Tamba nia hakerek nune:
“Entre ita nain rua deit…..se hau hela iha neba (Timor) hau sei hamutuk ho rebeldes sira…..hau labele koalia tan agora……”
(Between us.... one reason apart from the pragmatic one for me to get out was that if I had stayed I certainly would have joined forces with the rebels..... that is all I can say at the moment....)
Ida nee nia refere ba rebeldes grupu Alfredo Reinado nian, nebe tenta oho Sua Excelencia Presidenti Republika, hanesan provadu iha Tribunal ona. Agora mos ita husu, Sra Emilia nia numero mos mosu iha lista neebe investigadores polisia nian ba kazu 11 Fevereiru neba hetan kona ba se mak iha kontaktu ho Sr Salsinha iha loron 11 Fevereiru neba. Nia hetan investigasaun ka lae? Karik mos presiza investiga tamba email nee ami foin mak assessu.
Sr Presidenti, maluk deputadus.
Ita lakoi akuza ema arbiru deit. Tamba nee mak bancada FRETILIN la koalia temi ha provas no depois de konfirma ho fontes neebe simu email nee mak sira simu duni email nune. Ema simu mak fo sai tuir ami nia fontes. Ida nee mos laos assuntu privadu ona, tamba koalia kona ba krise nasional nebe halo ita barak terus no povo barak trauma.
Agora mak ita kompreende tamba sa mak bainhira nia tama nudar ministra de facto Australia sira fadigadu hotu halo documentarius katak ema ne’e mak diak tebes ba Timor. Sira hatene ona buat barak karik? Hatene ona katak assessor Australia ka Melbourne barak mak sei mai servisu no kaer metin diresaun rain nee nian karik.
Halok halok no hanoin hirak iha leten, hamosu dúvidas, preocupações e ita precisa questiona duni katak:
Sr Alfredo Pires hanesan Shra Emilia Pires nia alin, nebe agora dadaun lori knaar halo negociação Greater Sunrise.
Tamba saida mak Negociação Grester Sunrise to’o oin loron lao hanesan ne’e?
Tamba saida mak negociação sira ne’e koalia ba malu liu hussi media deit?
Keta halo finge hodi taka falta deit, tamba iha comprimisso ruma hanesan provas hussi email nebe ami temi iha laten?
Povo Maubere tomak precisa duni iha vigilância no controla ba ema sira nebe laiha sentido nacionalismo e patriotismo. Para bele garante Estado de Direito Democratico e Nação Timor Leste nia Soberania.
Ita hein atu hare buat hotu lao to iha neebe los?
Obrigadu ba tempo.
BA INFORMASAUN TAN DERE BA DEPUTADO JOSE MANUEL FERNANDES IHA 7752889
No comments:
Post a Comment