FRETILIN.Media

FRETILIN

KOMUNIKADU BA IMPRENSA

Dili, 3 Maiu 2010

Alkatiri: Media balun manipula hau nia lia fuan: Laiha aliansa ho Xanana enkuantu nia ko’us grupu illegal neebe sai husi FRETILIN.

Sekretariu Geral partidu historiku FRETILIN, Dr. Mari Alkatiri, eziji media nasional balun, liliu Jornal Diario Nasional atu hapara kedas manipulasaun neebe sira halo husi konferensia imprensa neebe nia halo iha loron 26 Abril 2010 too agora dadaun, katak nia dehan “2012 FRETILIN-CNRT Hamutuk Kaer Ukun”.  Tuir Dr. Alkatiri, ida nee lia fuan falsu husi media tamba nia nunka deklara ida nee.

Maske Jornal Diario Nasional “hadi’a fali” iha edisaun 28 Abril 2010 katak Dr Alkatiri la deklara lia fuan hirak nee, iha edisaun sexta feira loron 30 Abril liu ba, no iha edisaun Portugues iha Jornal Semanario iha Sabadu liu ba, sira nafatin hakerek katak Dr Alkatiri

hakarak halo koaligasaun ho Sr. Xanana.

“Nee la los.  Nee lia fuan falsu tebes.  Hau bele dehan katak agora dadaun la iha koaligasaun no sei la iha koaligasaun ho partidu se se deit molok eleisaun geral.  Liliu se nunka iha dalan atu halo koaligasaun, ka aliansa, ka buat seluk hanesan, ho Xanana nia partidu enkuantu nia ko’us nafatin iha nia le’et grupu illegal ‘mudansa’ neebe liderado husi Sr Jose Luis Guterres, neebe uluk sai husi FRETILIN,” nia deklara.

“Dalan ikus hau eziji media balun atu hadi’a a’an, foti etika jornalistiku no profesionalismu no hapara manipula hau nia lia fuan kona ba koaligasaun ka aliansa ho Xanana.  Ohin Jornal Diario Nasional hakerek artigu ida tan neebe temi katak se FRETILIN hakarak koaligasaun.  Nee falsu no sira dishonestu bainhira hakerek kona ba

posibilidade koaligasaun ka aliansa entre FRETILIN ho Xanana, tamba hau nunka temi ida nee.  Sira rasik rekonese ida nee maibe hakerek nafatin notisia ho tendensia ida nee,” Alkatiri hatutan.

Dr. Alkatiri deklara mos katak nia iha respeitu ba media hotu iha rai Timor-Leste, inklui Jornal Diario Nasional, maibe iha okaziaun ida nee sira tenke hadi’a sira nia lalaok ho lia los, no nia hein katak aban bainrua sira sei hakerek deit tuir deklarasoens neebe nia halo sem manipulasaun ba nia deklarasoens.

Ba informasaun tan dere ba Sr. Filomeno Aleixo iha 734 0383.