Komunikadu ba Imprensa
Dili, 19 Janeiru 2011
PARLAMENTU HASAI OSAN REDUSAUN POBREAZA HUSI PRESIDENTI REPUBLIKA; LA TUIR KNAAR KONSTITUISAUNAL PRESIDENTI NIAN
Parlamentu aprova ho votasaun bot atu hasai US$1 milhaun Fundu Redusaun Pobreza neebe iha tina kotuk aprova montante hanesan atu Presidenti Republika nian bele halau nia promesa politika atu fo liman ba kiak iha Timor-Leste.
Deputadus husi bancada oioin, inclui mos bancada partidu sira neebe apoia governu de facto, vota 44 votos a favor, 3 contra no 12 abstensaun hodi apoia porposta husi deputadu FRETILIN Arsenio Bano atu hasai osan US$1 milhaun husi orsamentu iha Gabinete Priemiru Ministru, neebe tintinan alokadu iha orsamentu maibe reservadu ka comprometido kedas ba task force ida iha gabinete Presidente Republika.
“Iha tinan 2008 bancada FRETILIN halo petisaun ba Tribunal Rekursu neebe deklara inkonstitusional fundu redussaun pobreza neebe aloka iha gabinete Presidenti Republika iha tempu neeba ho montante US$250,000. Maske hetan deklarasaun inkonstitusional iha tempu neeba, osan gasta tiha hotu. Too ohin loron la iha ema ida neebe responsabiliza ba osan neebe fakar hotu maske inkonstitusional. Ikus mai iha preokupasaun balun kona ba gestaun fundus nee, liliu iha Gabinete Presidenti Republika nian,” deklara Xefe Bancada FRETILIN nian deputadu Aniceto Guterres.
Preokupasaun neebe hamosu proposta atu elimina osan US$1 milhaun neebe PR nia gabinete usa atu nia task force halau atividade ho naran “redusaun pobreza” halau fali servisu tuir interese politiku partidu kiik balun nian.
Komissaun C Parlamentu nasional nian mos rekomenda iha numero 5, pagina 78, iha sira nia relatorio kona ba proposta OGE 2011 atu elimina montante ida nee.
Deputadus barak liu mak koalia katak maske la iha violasaun ona ba constituisaun bainhira hatama osan hirak nee iha orsamentu gabinete PM nian, no depois mak hodi selu projetus neebe hetan rekomendasaun husi gabinete PR nian, mekanismu ida nee sei viola nafatin prinsipiu separasaun poder ezekutivu neebe iha governu nia liman ho knaar presidenti nian tuir konstituisaun. Tuir konstituisaun PR la iha knaar ida ezekutivu kona ba atuasaun politika social hanesan halakon kiak.
“Bancada FRETILIn felicita deputadus hotu neebe apoia proposta eliminasaun ida nee tamba iha interese atu tau buat hotu iha ita nia estadu nia funsionamentu iha nia fatin tuir lei no konstituisaun. Ita hotu hakarak halakon kiak iha ita nia rain, maibe ita hotu hare osan neebe usa liu gabinete PR nian nunee la iha impaktu ba halakon kiak. Maibe bancada FRETILIn sei ezigi mos atu iha investigasaun se iha gestaun ba osan ida nee ema ruma envolve iha hahalok abuso poder ka ma gestaun iha tinan orsamentu rua liu ba,” informa Xefe bancada FRETILIN Aniceto Guterres ba media nasional.
BA INFORMASAUN TAN DERE BA DEPUTADU ARSENIO BANO 741 9505
No comments:
Post a Comment