LU OLO NO MARI ALKATIRI ELEITU LIDER FRETILIN HO 95,87% VOTOS; HETAN LEGITIMIDADE DEMOKRATIKA LIU LIDER PARTIDU POLITIKU SELUK IHA TIMOR-LESTE

FRENTE REVOLUCIONARIA DO TIMOR-LESTE INDEPENDENTE

KOMUNIKADU BA IMPRENSA

Dili, 4 Setembru 2011

LU OLO NO MARI ALKATIRI ELEITU LIDER FRETILIN HO 95,87% VOTOS; HETAN LEGITIMIDADE DEMOKRATIKA LIU LIDER PARTIDU POLITIKU SELUK IHA TIMOR-LESTE

Iha loron 20 Agosto 2011 partidu FRETILIN, comprova katak nia mak bo’ot liu no demokratiku liu partidu politiku seluk, ho eleisaun directa neebe fo militante FRETILIN hotu hotu iha Timor-Leste tomak oportunidade atu hili sira nia presidenti partidu no secretariu geral, deklara Adjuntu Secretariu Geral no presidenti Komissaun Nasional Preparasaun no Organizasaun FRETILIN nian Jose Reis iha eventu bo’ot iha sede CCF nian iha Comoro ohin.

“Lider partidu iha legitimidade liu bainhira bele hatudu katak militante mak fo fiar directamente ba sira.  Eleisaun directa mak dalan atu hetan legitimidade ida nee. FRETILIN deit mak konsegue halo ida nee iha Timor-Leste nia historia, maibe iha regiaun Asia Pasifiku tomak, no sei iha partidu rua ka tolu deit iha mundu neebe halo hanesan,” dehan Jose Reis.

Jose Reis tatoli ba audiensia bo’ot neebe marka presensa katak militante FRETILIN nain165,570 mak tuir eleisaun iha loron 20 Agosto 2011, ho militantes nain 147,064 (neebe representa 95,87% husi votos validos) mak vota ba candidatos Francisco Guterres Lu Olo bb Presidenti no Mari Alkatiri ba Secretariu Geral partidu FRETILIN nian.  Iha deit militantes 6,338 (ka 4,13% husi votos validos hotu) mak vota contra candidato nain rua nee.  Iha mos votos nulu 4,21% no branco 3,13%.

Horseik no ohin Comite Central FRETILIN simu relatoriu husi KNPO kona ba prosesu eleitoral ba lideransa partidu, no ohin halo anusniu formal katak candidato Francisco Guterres Lu Olo mak eleitu nudar Presidenti no Mari Alkatiri mak eleitu ba Secretariu Geral partidu FRETILIN ba tinan 2011-2016.

“Militantes nain 165,570 ba vota iha sentro votasaun 600 iha suco hotu hotu, sub distritu hotu hotu no distritu hout hotu.  Kuadrus no militantes FRETILIN liu nain 4,000 mak partisipa iha funsaun oioin atu assegura katak porsesu eleitoral ida nee konsegue lao ba oin.  Nee hatudu sentidu pertensa no dedikasaun militantes FRETILIN nian ba nia partidu.  Nee hatudu mos kumprimissu bo’ot tebes ba demokrasia.  Resultadu mak prosesu tomak nee hametin FRETILIN no hametin demokrasia iha Timor-Leste tomak,” Jose Reis realsa.

“Maske eleisaun liu tiha ona, loroloron militantes tama mai nafatin iha sede CCF iha Comoro atu halo cartaun militantes.  Nee mak dinamismu forte neebe domina FRETILIN agora dadaun nudar partidu politiku.  Resultadu eleisaun directa indikador ida kona ba dinamismu ida nee,” affirma Jose Reis.

Prosesu apuramentu husi KNPO depois de eleisaun iha 20 Agosto 2011, no tuir mai validasaun husi Kommissaun Nasional Jurisdisaun neebe remata horseik, hatudu nivel transparensia no legalidade demokratika aas tebes neebe prosesu eleitoral ida nee konsegue atingi.  Kualidade prosesu eleitoral nee verifika mos husi observadores independents neebe inklui mos partidus politikus externos no interno balun, Nasoens Unidas, ONGs no STAE no CNE.  Media nasional no internasional mos hetan asesu ba prosesu tomak hodi respeita prinsipiu transparensia.

“FRETILIN hatudu katak nia hadomi, nia kompreende no nia hatene implementa demokrasia iha nia nivel aas liu.  Nee mak sei sai desafiu ba partidu seluk aban bainrua,” nia dehan.

Tuir mai iha loron 8 fulan Setembru semana oin mai, lider nain rua nee sei simu tomada posse molok Terseiru Congresso FRETILIN halau too loron 11 Setembru. 

Terseiru Congressu FRETILIN iha loron 8-11 Setembru 2011 mak sei hili lider seluk, Comite Central no orgaun seluk partidu FRETILIN nian.

BA INFORMASAUN KLEAN KA SELUK TAN TAN DERE BA JOSE TEIXEIRA IHA 728 7080