“Desenvolvimentu AMP nian halo de’it ba ema balun nia kabun tamba maioria populasaun moris nafatin iha mukit”

Bankada Parlamentar FRETILIN

DEKLARASAUN POLITIKA

“Desenvolvimentu AMP nian halo de’it ba ema balun nia kabun tamba maioria populasaun moris nafatin iha mukit”

Loron 9 Janeiro 2012

Lakleur tan ita sei tama ba períodu eleisaun Prezidensial no Parlamentar. Iha 2012, AMP ramata ninia mandatu tinan lima (5),  sein hasoru manifestasaun iha liuron, sein violénsia ka distúrbiu ne’ebé de’it. Nune’e AMP koalia ho lian makaas katak sira ukun ho paz no estabilidade.

Ami haharak fo hanoin katak paz no estabilidade ida ne’e mos mai maka’as hosi partidu opozisaun - FRETILIN, partidu boot liu iha Timor-Leste, ne’ebé iha esperiénsia no kapasidade ba eduka, organiza no mobiliza povu iha momentu ne’ebé de’it.  FRETILIN la uza manifestasaun  liuron no la promove violénsia ne’ebé de’it hasoru governu ida ne’e. FRETILIN  lakoi katak krize institusionál hanesan 2006 nian atu akontese tan iha rai ida ne’e.  Nune’e, iha tinan hat nia laran FRETILIN uza de’it meiu legal no métodos demokrátikus ba bolu atensaun Governu ida ne’e nian no ezije responsabilidade atu hola medidas ba hadia povu mukit ninia moris loron-loron nian liuhosi dezenvolvimentu ida ne’ebé ekilibradu no sustentável. Ida ne’e lisaun boot ida ne’ebé FRETILIN  husik hela ba partidu sira ne’ebé abanbairua sei sai partidu opozisaun tanba rezultadu eleitoral ka   sirkuntánsias polítikas espesífikas obriga partidu ruma sai partidu opozisaun “defaktu”.

Ohin, liu hosi intervensaun ida ne’e Bankada FRETILIN nian hakarak fó-hanoin dala ida tan katak AMP hahú no kontinua ukun rai ida ne’e  ho osan barak  ne’ebé hasai hosi  Fundu Minarai, Fundu ne’ebé harii durante Governasaun FRETILIN nian. Tanba governu AMP ukun ho osan barak,  iha kapasidade finanseira atu rekruta peritus internasionais oioin atu ajuda sira halo administrasaun no jestaun di’ak,  maibé,  AMP kontinua hatudu  defisiénsias oioin. Biar iha defisiénsias oioin,  AMP mehi beibeik ho projetu boboot de’it, projetu ne’ebé sira labele ezekuta tanba laiha kapasidade jestaun no nune’e,  sira gasta arbiru de’it osan povu nian, sira haburas  KKN no loke dalan ba visius aat iha sosiedade nia leet. 

Lista defisiénsias AMP nian naruk tebetebes. Ohin ami hakarak koalia de’it  kona-ba defisiénsias iha área saúde no edukasaun nian, liuliu kona-ba prestasaun kuidadus saúde nian.

Maibé, molok koalia kona-ba asuntu espesífiku ida ne’e, ami fó-hanoin ba hotu-hotu katak Programa Governu AMP nian, ne’ebé Parlamentu Nasional aprova iha 2007 , hatete  nune’e kona ba saúde:

(…) “Kona-ba Politika Saúde,  IV Governu Konstitusional hakarak promove equidade i.e.  katak ema hotu-hotu iha direitu hanesan ba hetan asesu ba kuidadus saúde no sei define fila fali  oinsá halo kobertura ba país tomak ho servisus mínimus tuir kondisoens konkretas ita nia rain nian, sei hadia dezempeñu sistema no garante kualidade prestasaun kuidadus saúde nian iha nível hotu-hotu.

Governu kompromete hadia prestasaun kuidadus saúde nian ho prioridade ba populasaun mukit liu, tuir kritérius ekuidade nian kona-ba distribuisaun, efisiénsia no kualidade bainhira uza rekursus.  Sei garante mós efisiénsia no kualidade rekursus finanseirus nian, materiais, manutensaun infra-estruturas no ekipamentus nian atu hadia prestasaun kuidadus saúde ba populasaun no sei mantein kolaborasaun intersektorial  no dezenvolvimentu parserias nian.

Atu bele hetan objetivus sira ne’e, (Governu) presiza hadia hodi biit Servisus Saúde nian, halo dezenvolvimentu armoniozu, rede infraestruturas no rekursus umanus nian  no hadia mós kapasidade jestaun nian.”  

Buat sira ne’e hakerek iha Governu AMP ninia programa.

Maibe saída mak akontese ikus mai?

Ami sei fó de’it ezemplus balun.  Tinan kotuk Seksaun Radiolojia, RX, iha HNGV labele hala’o servisu ho diak tambá laiha reagentes. Situasaun ida ne’e preokupa ema barak,  liuliu sira ne’ebé presiza  halo ezame RX, atu ajuda médikus sira halo diagnóstiku loos  ba sira nia moras. Iha tempu ne’ebá ema barak mak foti asuntu ida ne’e no protesta hasoru situasaun ida ne’e.

Ami preokupa tebetebes ho situsasaun sira hanesan ne’e tanba afekta liluliu povu ki’ik tanba laiha kbiit atu  buka alternativa seluk. Ema sira ne’ebé iha osan ka iha maluk hodi tangu sira, bele sai aviaun  Airnorth, Merpati ka Silk Air nian ba halo tratamentu iha liur.

Ita mós hatene aimoruk  falta beibeik iha HNGV.  Dalaruma tanba abastesimentu hosi SAMES mak atraza, dalaruma SAMES laiha duni aimoruk atu fornese ba Hospital. Situasaun ida ne’e  obriga moras sira hola aimoruk iha farmásia privada hodi bele simu tratamentu iha HNGV. Ita labele tolera beibeik situasaun ida ne’e. Ita labele simu katak Hospital laiha insulina, purezemplu, atu trata moras ne’ebé tama iha banku urgénsia ho diabetes aas tebetebes tanba kondisaun ida ne’e sai  ameasa makaas ba pasiente nia vida. 

Ita hotu hatene mós katak mákina ba halo hemodiálize ka  fase-ran  to’o agora la funsiona diak ka paradu hela tanba aat.

Durante tinan hat nia laran liubá, Comisaun F halo fiskalizasaun no reuniaun barabarak ho Ministériu Saúde no Dr Nelson dalaruma partisipa mós. Iha reuniaun sira ne’e, Governu AMP promete atu hadia sistema abastesimentu medikamentus  nian no tratamentu ospitalár [maibé to’o agora seidauk iha mudansa signifikativa].

Ami rekonhese katak iha melhorias balun iha  servisu atendimentu ba pasiente sira iha HNGV. Maibé atendimentu diak de’it la’ós sufisiente tamba bainhira aimoruku no ekipamentu falta, Drs/Dras, Efermeiros/as no pessoál ospitál nian labele halo milagres!!!!

Tuir mai ami hakarak hato’o tan  buat ne’ebé foin lalais akontese ne’ebé preokupa ami tebetebes.

Iha loron 27 Dezembru 2011,  hau rasik lori moras ida ba banku urjénsia iha HNGV. Moras ne’e isin manas makaas no Dr. ne’ebé fó atendimentu,  haruka hasai kedas raan  ba halo análize. Ami hein rezultadu teste raan nian oras tolu nia laran iha seksaun emerjénsia nian. Bainhira Dr Artur [médiku timorense] tama servisu, nia haruka husu rezultadu  maibé Laboratóriu HNGV nian fó-hatene katak sira labele halo testes raan nian tanba laiha reagentes. Dr Artur mos hakfodak no husu ami lori moras nia raan ba halo análize iha laboratóriu privadu. Hau rasik mak lori ran ne’e ba laboratóriu no hein tan besik oras tolu hodi hetan rezultadu kona-ba malária no dengue. 

Ami selu $50 dólares norte-amerikanus ba teste atu detekta indikadór dengue nian (númeru plaquetas nian) iha moras nia raan no infesaun sira seluk no $3 dólares ba teste malária nian. Ba ami $53  la halo diferensa bo’ot maibé, povu ki’it no mukit selu oinsá?

Hanesan ita hotu hatene durante tempu udan nian,  moras malaria ho dengue buras makaas iha ita nia rain. Tambasá mak iha altura ida hanesan ne’e, Hospital Sentral ida ne’e laiha reajentes?

Hau haruka kedas sms ba Dr. Nelson Martins no Dra Madalena Hanjan hodi husu ba sira tanbasá mak  reajentes falta iha Hospital. Dr. Nelson la hatan hau nia sms maibé Dra Madalena hatán hanesan ne’e mai hau: “Hau sei haree, sr deputado, reagente foin tama, tan sa’a laiha e deskulpa ba inkonveniensia.”

Ami  husik hela situasaun ida ne’e ba Ita-bo’ot sira nia konsiderasaun, nu’udar reprezentante povu nian, iha Uma Fukun ida ne’e.

Hafoin akontesimentu preokupante ida ne’e,  hau simu mós informasaun hosi ema ne’ebé servisu iha ospitál  katak  ospitál laiha resipientes [botir ki’ik] esterelizadus, ne’ebé laboratóriu uza ba rekolla amostras mi, liur ka buat sira seluk hodi halo teste diagnóstiku. Hau simu  konfirmasaun ba informasaun ida ne’e hosi kolega deputadu PN ida ne’ebé ba mós ospitál.

Iha loron 5 Janeiru 2012, hau ba fila fali HNGV hodi vizita hau nia maluk ida ne’ebé baixa tanba moras diabete. Familiár sira hatete mai hau katak  enfermeiru sira  hatete katak aparellu automátiku hodi sukat glukoze ka ran-midar mos aat. Bainhira hau telefona ba médika timorense ida, nia  hakfodak no kestiona tanbasá mak bele akontese ida ne’e.

Tanba defisiénsias sira ne’e hotu,  ami konsidera katak situasaun prestasaun servisus saúde nian  preokupante tebetebes.   Nune’e, ami husu Dr Nelson Martins no nia equipa atu mai PN hodi fo esplikasaun.

Tinan-tinan ami koalia maka’as hodi hatete katak investimentu ba saúde no edukasaun ki’ik tebe-tebes iha OGE ne’ebé Governu AMP aprezenta. Ami sempre kestiona oinsá ita bele  hamenus kiak bainhira Governu la halo investimentu maka’as iha saúde no edukasaun.

Ita assiste ohin loron disparidade bo’ot entre escolas públicas no eskolas privadas. Eskolas privadas aat ba bebeik. Laiha programa jestaun konsistente ba formasaun professores sira nian  atu bele hasa’e nível ensinu iha eskolas públikas. Ensinu siénsias, matemátikas no línguas iha eskolas públikas aat ba bebeik. Ita lalika ba dook, bele  haree deit ba saída mak akontese iha Dili laran, purezemplu, iha Eskola 5 de Maio.

Program alimentasaun ka merenda eskolár, atu ajuda hamenus defisiénsia alimentar labarik sira nian, ne’ebé tuir lolos, oras ne’e hetan ona kobertura nasional,  la lao ba oin.

Governu AMP koalia maka’as katak sira halo dezenvolvimentu maibé nutrisaun krónika iha Timor-Leste aas ba beibeik, tuir estudus ne’ebé Ministerio de Saude rasik fó-sai ba públiku.  Ida ne’e hatudu katak desenvolvimentu AMP nian halo de’it ba ema balun nia kabun tamba maioria populasaun moris nafatin iha mukit.

Obrigadu ba Ita-Boot sira nia atensaun.

Deputado Estanismau da Silva