DEKLARASAUN IHA KONFERENSIA DA IMPRENSA HUSI CPD BAUCAU
Bazeia ba deklarasaun ne’ebé fo sai hosi notisia rttl iha’a dia 4 de Abril de 2012 hosi ekipa sucesso Sr Taur Matan Ruak ne’ebé relata konaba akontesimento iha’a Suco Buruma, Sub-Distrito Baucau Vila, Distrito Baucau, iha’a dia 2 de Abril de 2012, liu tiha loron ida husi loron bosok ten nian, katak Militante FRETILIN halo ataka ka halo agressaun fisika hasoru ekipa suceso Taur Matan Ruak, maibe Ami (CPDB) desmente katak deklarasaun ne’e falsa no ami hakarak hateten lolos ba publiku tomak kronologia akontesimentu hanesan tuir mai ne’e:
Horas
09 : 00 – Komitiva Taur Matan Ruak liu husi Buruma ba Quelikai ho objetivo atu ba kampanha
09 : 05 – Kareta Pajero mutin risku verde ho (No. Policia 11-733) TLS nebe Sr. Nazario (ekipa sucessu Lugu iha kampanha I ronda) maka hodi rasik ba tolok / Trata Populasaun/ no komunidade iha area suco Buruma nebe entusiasmo hare no partisipa iha Festa demokrasia.
09 : 20 - Liu tiha akontesimentu ne’e, husi Secretariado CPD Baucau Informa kedas ba komandante PNTL Distrito Baucau katak presiza halo patrulhamentu iha area entre Suco Buruma ho Suco Seical bainhira komitiva ekipa suseso Sr.Taur Matan Ruak fila husi Quelicai iha loraik.
19 : 02 - Informasaun husi Buruma iha kontinuasaun no provokasaun husi Sr. Nazario ( Les Foto Kandidatu Presidente Lu-Olo no halo insultos iha fatin publiku wainhira liu )
19 : 12 - Estrutura Partido iha Suku Buruma Informa mai CPD Baucau (liu husi Telefone ), katak hahu baku malu entre grupo Sr. Nazario ekipa susesu LUGU ho Joven no komunidade Suco Buruma.
19 : 17 - Nune’e ami CPD / Baucau kontaktu kedas ba PNTL husu hodi atua atu bele akalma situasaun nebe mosu tiha ona.
19 : 22 - Informasaun komunidade Suco Buruma katak Sr. Nazario halai, no tuir mai ami kontaktu kedas ba Policia atu ba kaer Sr. Nazario. Komunidade informa mos katak Nazario halai ba nia uma Surya Timor Kota Baru Baucau Vila.
19 : 30 - Ami kontaktu Policia atu kaer Sr. Nazario para evita labele iha problema no hodi normaliza fali situasaun no prevene konflitu labele mosu.
19 : 35 - Komunidade Suco Buruma informa katak, Sr. Beredu’u envolve mos iha akontesimentu ne’e.
19 : 42 - Ami Telefone Policia atu atua lalais hodi akalma situasaun no resolve konaba asidente ida nee.
20 : 00 - Ami CPD / Baucau (Talik – Jorge Gama) ba esquadra Policia fo hatene atu ba kaptura Sr. Nazario, maibe to’o iha fatin, Policia ba hotu ona fatin akontesimentu iha Suco Buruma.
21 : 00 - Policia kaptura Sr. Nazario no lori ba iha esquadra Policia nian hodi tuir prosesu de investigasaun.
Konklusaun katak : kazu ne’e submete ba investigasaun, no ekipa susesu kandidatu Taur Matan Ruak no CPD / Baucau halo akordu ida katak ba oin bainhira problema ruma akontese fali ekipa rua nee maka sei tun no tur hamutuk atu rezolve kazu ne’e no sei envolve mos mebrus Instituisaun PNTL, nune garante Paz no Estabilidade ba sucesso iha Eleisaun 2012..
Tuir deklarasaun Sr. Berdu’u katak Militante FRETILIN baku Sr. Berdu’u nia kareta ne’e SALA I LA LOS, tamba populasaun militante FRETILIN tomak iha Distrito Baucau respeita no hadomi Sr. Berdu’u no veteranos tomak, hanesan mos respeita no hadomi kandidatu nain rua Sr. Taur ho Camarada Lu-Olo, tamba sira hotu produtu FRETILIN nian. Atu hato’o tenik katak Militantes FRETILIN la halo asaun hasoru Sr. Berdu’u ho razaun katak militantes tomak tane as tebes orientasaun Lideransa Partido nian: katak LAKOHI ASAUN VIOLENTA iha ita nia Rain. Nune’e atu bele estabelese Paz no estabilidade ba Povo no rai doben Timor Leste nebe ita hotu hadomin.
Tamba ne’e ami nudar jerasaun nebe maka atu hatutan knar Veteranus Libertasaun Nasional nian, husu ba ami nia aman sira hotu hatudu HONESTIDADE LIA LOS NO LARAN MOS atu Povo labele sofre konsequensia dala ida tan, hanesan saida maka akontese iha Primeira Luta Libertasaun. Ita nia relasaun ho Povo bazeia ba konfiansa no ba Justisa.
Husu mos ba ema hotu nudar sidadaun Timor Leste nian atu hakribit asaun provokante no violento, buka hadomin lia Los, hakribit mos politika foer nebe la relevante, liu liu promesas falsas nebe mosu nafatin durante iha kampanha. Tamba ho karakteristika hirak ne’e sai sinal nebe forte tebes ba provoka no kria instabilidade ba Povo no rai doben ida ne’e.
Hato’o mos katak. Povo no Rai lulik ida ne’e merese atu hetan moris diak no iha Paz no estabilidade nia laran no ema hotu presiza foti no kaer metin dignidade Povo Mau Bere tomak, RDTL no Estadu de direito demokratiko Povo ida ne’e nian.
Baucau, 5 Marsu de 2012.
Talik Reis
Coordenador CPD Baucau
No comments:
Post a Comment