RETIRO DA LIDERANSA DA FRETILIN COM EMPRESARIOS NACIONAIS SOB O TEMA: “O PAPEL DO SECOTR PRIVADO NO DESENVOLVIMENTO NACIONAL”

RETIRO DA LIDERANSA DA FRETILIN COM EMPRESARIOS NACIONAIS SOB O TEMA: “O PAPEL DO SECOTR PRIVADO NO DESENVOLVIMENTO NACIONAL”

KONKLUZAUN:

Iha loron 20 no 21 fulan Marsu tinan 2010, iha Com, Lautem, Lideransa Partidu Historiku FRETILIN halau retiru ho empresarius nasionais, ho tema “Papel Sector Privadu Nian ba Desenvolvimentu Nasional”, neebe hetan partisipasaun husi Presidenti FRETILIN, Camarada Francisco Guterres Lu Olo, no Camarada Secretario Geral, Dr. Mari Alkatiri, hamutuk ho empresarius nasionais husi distritu 13.

Lideransa FRETILIN iha intensaun katak retiro ida nee sai hanesan loron uluk prosesu dialogo entre partidu maioritario no sector privadu atu hametin papel sector privadu iha dejenvolvimentu nasional. 

Surumutuk nee loke ofisialmente husi Presidenti Partidu Camarada Francisco Guterres Lu Olo.  Nia realsa ba empresariu sira neebe partisipa katak importante liu ba partidu FRETILIN mak sira no partidu bele hanorin malu oinsa empresariu bele sai parseiru ba estadu atu fo kontirbuisaun ida neebe diak no sustentabilidade iha prosesu dezenvolvimentu nasional.

Iha nia intervensaun orador uniku iha surumutuk ida nee, Dr. Mari Alkatiri, fo nia hanoin kona ba oinsa nudar partidu ida neebe sei ukun fali FRETILIN nudar governu bele tulun harii kondisoens ba empresariu nasional atu bele kompete,  hodi sai ponte importante ba estadu atu halo investimentu iha dezenvolvimentu nasional maibe la sai dependente ba poder politiku hanesan politika governu de facto AMP nian halo dadaun.

Iha nia intervensaun nia koalia mos detalhadu kona oinsa politika AMP koalia barak kona ba desentralisasaun aprovisionamentu, maibe iha realidade em ves de desentralisa, “desagrega” (ka sobur) deit.  Nia tatoli nia preokupasaun ho falhansu AMP nian atu avansa ho politika FRETILIN nian uluk atu harii kompanhia de segurus ho partisipsaun husi estadu, falhansu aprova lei banco sentral nian, no medidas seluk neebe bele tulun empresarius nasional atu hetan sistema bancario no segurus neebe sira presiza atu halau sira nia negosio ho competitividade no seguransa.  Nia kritica sentral mak AMP nia politika la preokupa ba harii sistema neebe transparente no responsavel, maibe halau hanesan estadu social neebe fahe deit tuir poder politiku nia hakarak. Estadu iha dever atu harii kondisoens nune sector privadu bele buras no la depende total ba estadu ka poder politiku.

Diskusaun:

Depois de intervensaun iha diskusaun no dialogo entre empresarios ho lideransa, liliu orador.

Tuir mai iha diskusaun espesifiku ba tema tolu:

1.             Mekanismu atu aselera prosesu aporvisionamentu no ajudikasaun;

2.    Enkudramentu legal ba actividades empresario sira nian, hanesan garantias bancarias no sistema de segurus;

3.             Sistema bancariu.

Husi diskusaun no dialogo nee, too ba iha konklusaun hanesan tuir mai:

1.     Sistema actual aprovisionamentu governu de facto AMP nian la serve.

2.     Tenke harii sistema ida neebe professional no transparente, neebe loke oportunidade ba ema hotu.

3.     Habadak tempo prosesu tender nian.

4.     Estimasaun ba porjectus tenke iha base teknika.

5.      Proposta tender (tekniku no finanseiru) tenke loke iha proponentes sira nia oin, nunee garante transparensia.

6.     Dokumentus tender nian tenke usa lian neebe hotu kompreende, labele iha Ingles deit.

7.     Presiza iha politika ida neebe regula partisipasaun empresa estrangeiras iha areas neebe kapasidade nasional iha ona, maibe la taka odomatan ba teknologia neebe presiza atu dezenvolve ekonomia Timor-Leste nian.

8.     Harii database atu labele admite ema ida harii kompanhia barak hodi hetan kontratu barak no halo klasifikasaun ba empreza hotu hotu.

9.     Estadu tenke harii no tau kapital ba kompanhia segurus publika privada nudar prioridade dahuluk.

10.  Bainhira FRETILIN kaer fali ukun, nudar prioridade harii leis kona garantias bancarias neebe empresariu presiza atu halau sira nia servisu.

11.  Transforma Autoridade Bancaria Pagamentus nian ba Banco Central.

12.   Harii banku investimentu nacional, ho politika incentivos especiais ba investimento iha areas rurais.

13.  Sistema seguru tenke lao hamutuk ho sistema bankariu.

14.  Partidu FRETILIN sei organiza reuniaun bot liu tan ho emprezariu nasional hotu hotu, husi kiik ba too bot.