Komunikadu ba Imprensa: Coordenador Manufahi Ezigi STL Ajuda Hametin Nasionalismu no Patriotismu.

Komunikadu ba Imprensa

FRETILIN

Dili, 27 Maiu 2010

Coordenador Manufahi Ezigi STL Ajuda Hametin Nasionalismu no Patriotismu.

Eis Secreatrio Estado Regiaun 2 iha primeiro governo constitucional, Adriano Corte Real, neebe husi kleur ona mak coordenador partidu historiku FRETILIN nian iha distritu Manufahi, deklara katak iha artigo ida neebe ohin publika iha STL, neebe dehan katak nia nudar “Lider FRETILIN balun iha Manufahi hakbesik ba Xanana,” nee exagerasaun boot no notisia falsu.

“Hanesan ema barak hau mos hare ona tendensia STL nian hakerek oioin deit, sem iha relasaun ho realidade.  Los katak hau hasoru malu ho Sr Xanana, maibe laos atu habesik aan politikamente.  Sr Xanana mak husu atu hau bele hasoru malu ho nia atu diskuti assuntu assosiasaun empresarial iha distritu Manufahi, neebe hau mak coordenador.  Nia husu mos hasoru hau tamba nia rekonhese hau nudar figura historiku Luta Libertasaun Nasional no FRETILIN nian hori 1974.”

“Hau desde 1974 iha partidu ida deit too ohin loron.  FRETILIN mak nee, no hau metin ba FRETILIN nia Comite Central no lideransa.  Hau laos atu tuir ema seluk hanesan jornal nee hakarak halo ema hanoin fali. Maibe hau mos husu, tamba sa mak ita labele hasoru malu?  Tamba partidu ka posisaun politika la hanesan  deit?  

Nee la los.  Ita nee compatriota Timor Oan mesak deit neebe uluk hamutuk luta ba ukun rasik aan.  Ita laos inimigo ba malu. Conseitu inimigo nee aplika ba ema seluk neebe contra ita nia ukun rasik aan, no conseitu uluk tempo funu nian, neebe la iha fatin ohin loron.  Ita atu lori rain nee ba oin ita tenke hatek ba oin, no rona malu tamba laos ema ida deit mesak mak sei lori rain nee ba oin.  Tanba nee mak ita bele tur koalia ho malu no rona malu, maske ikus mai ita la konkorda malu. Liliu tamba governu de facto nee ukun la los ona, problema barak, no FRETILIN forte ba bebeik,” dehan Coordenador FRETILIN neebe mos veterano luta ukun rasik aan hori 1974.

“Hau ho Sr Xanana laos foin dadaun mak konhese malu.  Konhese malu kleur ona.  Kontra malu politikamente mos hori uluk kedas.  Maibe laos dehan fali ita labele koalia ho malu kona ba assuntu importante.  Ita bele no tenke koalia malu liliu kona ba assuntu ida assosiasaun empresario Manufahi nian neebe hau mak coordena no representa.  Laos fali katak agora hau atu tuir nia ka simu nia hanoin kona ba PEDN ka politika seluk.  Nee la los.  Se PEDN nee diak ba Povo Maubere no nasaun nee ka lae partidu FRETILIN mak sei analisa no desidi tuir mai nia posisaun oinsa.  Tamba nee mak hau dehan jornal STL hakerek dehan hau hakbesik aan fali ba Sr Xanana nee nakar mak barak.  Sira halo ona politika.  Nee hau husu sira labele halo. Diak liu sira reporta deit notisia, lalika manipula ba objectivu politiku,” dehan Adriano Corte Real. 

  

Nia dehan katak STL mos la buka konfirma ho nia rasik kona ba proposito encontro ho Sr Xanana, no ezigi STL atu hola sentidu de responsabilidade nudar nasionalista no patriota ba RDTL.   Nia hatutan katak nia dere ba STL atu esklarese ida nee ohin no atu husu sira hakerek notisia lolos.

BA INFORMASAUN TAN DERE BA FRETILIN MEDIA IHA 728 7080