KOMUNIKADU BA IMPRENSA : FRETILIN HUSU KOMANDANTE GERAL PNTL ATU LABELE HALO POVO ERMERA TAUK TAN

FRETILIN – BANCADA PARLAMENTAR

KOMUNIKADU BA IMPRENSA

Dili, 28 Maiu 2010

FRETILIN HUSU KOMANDANTE GERAL PNTL ATU LABELE HALO POVO ERMERA TAUK TAN

Deputado Jose Teixeira husi Bancada FRETILIN no membru Komissaun Seguransa, Defesa no Negocios Estrangeiros  Parlamento Nasional nian, ohin deklara dehan katak nia lamenta ba deklarasoens alarmistas husi Komandante Geral PNTL nian, Longuinhos Monteiro kona ba situasaun seguransa Ermera iha fulan liu ba nee, no husu Komando Geral atu sukat sira nia lia fuan hodi labele halo deklarasaun neebe bele hamosu preokupasaun no tauk iha komunidade nia leet.

“Ami neebe ba ona too fatin neeba no iha kontaktu ho Povo iha neeba, ho PNTL iha neeba, no agentes seguransa no defesa estadu RDTL nian, hamutuk ho ema seluk hahu kestiona  deklarasoens neebe Komandante Geral fo sai iha Timor Post iha 19 Maiu 2010 katak grupu ‘organizado halao aktividade terror, terrorizmu neebe ameasa komunidade….lori kilat iah sira nia kilat’ no katak iha insidente ‘tiru malu horas rua’ iha fatin balun iha distritu Ermera.  Deklarasoens hirak nee halo komunidade sira iha neeba tauk. Halo mos deputada husi bloko AMP, Maria Exposto mos hakfodak no fo sai nia no povo nia preokupasaun iha parlamento nasional, maske laos nia mak sala, tamba komandante geral PNTL rasik mak deklara buat hirak nee, neebe hamosu tauk iha povo nia leet. Maibe agora ema balun desmente fali katak koalia hirak neeba la los,” Teixeira dehan.

Ohin jornal nasional Timor Post publika entrevista ho Komandante PNTL iha distritu Ermera, Mariano Martins Soares, deklara katak “ilegal sira oin mos hau seidauk hare too ohin loron, tiru malu mos laiha. Keta kama mak nakdoko mak ema iha kapital dehan kilat mak tarutu fali iha Ermera nee.”

“Ami no ema seluk barak konkorda totalmente ho elementu responsavel PNTL nian iha distritu rasik nia konfirmasaun katak notisia uluk nee exagerado no alarmista liu.  Ita tenke fiar Komandante PNTL ditritu nian bainhira nia rejeita totalemente rumores no boatus katak la iha kilat illegal espalha namkari iha distritu Ermera hanesan uluk ema komando geral dehan, no simu nia esklaresimentu katak populasaun keixa deit mak ema lori katana halo intimidasaun.  Informasaun neebe Komandante Geral koalia afinal la akontese tuir nia komandante iha kampu rasik nia esklaresimentu.  Elementus husi orgaun seguransa no defesa estrutura RDTL nian mos konfirma nunee duni ba ami tuir sira nia observasaun iha kampu. Nee hatudu attitude ida neebe ami la hein husi ema neebe lolos tenke responsavel ho informasaun, neebe labele exagera, no tenke sukat lia fuan atu halo povo hakmatek,” hatutan Teixeira.

Teixeira deklara katak nia ho nia partidu preokupa katak alarmismo hanesan ita hotu hare ona kona ba invensaun kazu “ninja” iha distritu Bobonaro no Covalima, neebe hetan kritikas makas husi ONG direitus humanus nian no Provedor Direitus Humanus no Justisa kona ba violasaun ema nia direitus humanus, bele repete fila fali iha Ermera.

“Ami preokupa makas ba ida nee, tamba maske uluk sira hakilar makas ninja namkari hodi justifika operasaun boot no karun tebes iha neeba, resultadu investigasaun no prosesu iha tribunal hatudu katak alarmismo no invensaun ba situasaun inseguransa mak barak liu.  Kriminalidade nee ita tenke hasoru ho lei, maibe kria fali paniku boot entaun ita tenke kestiona tamba motivo saida? Ami sei propoen ba Komisaun B katak tenke solisita presensa membru governu de facto no komando geral mai esplika ba Komisaun situasaun iha distritu Ermera.  Too agora ami la kontente ho gestaun ba assuntu ida nee,” Teixeira taka.

Ba informasaun tan favor dere mai Deputado Jose Teixeira iha +670 728 7080