JDN: Estrada Com Ba Mota Ain; Alkatiri : "Tamba Xanana Lahatene"

Jornal Diario Nacional, 2 Junhu 2010

Estrada Com Ba Mota Ain,

Alkatiri : ‘’ Tamba Xanana Lahatene’’

Eis Primeiru Ministru Mari Alkatiri fo perdaun ba Primeiru Ministru Kay Rala Xanana Gusmão, tamba nia (Alkatiri) hare Xanana halo konfuzaun hodi kahur projetu, estudu, planu no programa hanesan deit konaba estrada Com ba Mota Ain. 

“Dehan estrada Com ba Mota Ain ne’e projetu ida, ba Xanana projetu, programa no estudu sira ne’e hanesan hotu i la iha diferensia ba nia, pakotes ka, projetus ka, programas ka no planus ka sira hanesan deit, tamba ne’e hau fo deskulpa ba nia, tamba nia halo konfuzaun bo’ot tamba Xanana lahatene,”koalia eis Primeiru Ministru Mari Alkatiri ba Jornalista sira, Segunda (1/6) iha sala bankada Fretilin Parlamentu Nasional, relasiona ho deklrasaun Primeiru Ministru Xanana ne’ebe dehan nia kansela projetu estrada Com ba Mota Ain tamba iha indikasaun korupsaun ne’ebe mak Governu Anterior asina ho Kuwait.

Tuir Mari Alkatiri, Xanana Gusmão la komprende saida mak projetus, estudus, planus no programas i sira ne’e nia (Xanana) kahur hamutuk.

“Iha hau nia tempu estrada Com ba Mota Ain nunka sai projetu i too terserio Governu mos la sai projetu, maibe ne’e estudu previo ne’ebe halo la gasta nen doit ida Timor nian, i ida ne’e hahu iha hau nia tempu duni, kuandu hau ba Kuwait, hau la asina buat ida, hau rekuja atu asina tamba seidauk iha konkluzaun,”koalia eis PM Mari Alkatiri.

Afirma Alkatiri, bainhira nia sai tiha husi Governu, Jose Ramos Horta mak sai Primeiru Ministru i nia mak ba fali Kuwait atu hatutan servisu.

“Horta husu hau nia openiaun, hau dehan labele asina lai buat ida, tamba presisa halo avaliasaun ba estudus ba estrada Com ba Mota Ain i buat ida la asina,”katak Mari Alkatiri.

Sublinha Mari Alkatiri, nia parte rona katak, Primeiru Ministru mak asina duni iha Kuwait, maibe asina saida, asina dokumentu ida, maibe nia (Alkatiri) lakohi bosok, soke iha Kuwait atu asina dokumentu ida, tenki asina  dokumentu iha lian Ingles no mos lian Arabi, ne’ebe se la asina dokumentu rua ne’e hotu, entaun la iha balidade i Xanana komu la komprende lian arabi entaun nia asina deit lian Ingles.

“Hau la asina nar-naran, tamba ne’e projetu estrada Com ba Mota Ain la iha, maibe so iha estudu ida, ne’eduni Xanana halo konfuzaun entre estudu ho projetu, entaun ne’e konfuzaun iha Xanana nia ulfatuk i laos iha hau nia ulfatuk, ne’eduni hau husu atu labele provoka hau,”hateten Mari Alkatiri.

Alkatiri koalia, Xanana bele tuda fatuk nia (Alkatiri)  uma kakuluk bele tuda, maibe nia uma la iha vidru i tuda mos sei la nakfera, se fatuk tuda sala mos nia la iha picina atu monu iha be’e laran.

Iha sorin seluk, deputadu Estanislau da Silva nudar mos eis Primeiru Ministru terseiro iha terseiro Governu konstitusional hateten, sira iha primeiru Governu too terseiro Governu konstitusional la asina buat ida no la foti osan doit metan ida husi Kuwait.