JDN: Loke Auto-Estrada Com-Mota Ain: PR Horta Rejeita Assina MoU Ho Kuwait

Jornal Diario Nacional 

Loke Auto-Estrada Com-Mota Ain

PR Horta Rejeita Assina MoU Ho Kuwait

2 Junhu 2010

Presidente Repúblika (PR), José Ramos Horta rejeita totalmente katak, nia parte assina nota  Memorandum of Understanding (MoU) ho nasaun Kuwait kona ba atu loke auto Estrada komesa husi Suku Com, Distrito Lospalos to’o Mota-Ain, Distrito Bobonaro.

PR Horta hato’o lia hirak ne’e ba Jornalista sira iha Aeroportu, Nicolau Lobato Dili, Kuarta, (1/6), hafoin fila husi vizita estado ba estrangeiro ao mesmo tempo halo check up ba nia Saude iha Singapura.

“Uluk iha Primeiro Governo konstitusional, Dr. Mari Alkatiri nudar Primeiro Ministro, Kuwait rasik mak selu so para halo deit Previgibility study ida atu lori hare Estrada husi Lospalos to’o Mota-Ain. Sira (Kuwait nia ema) halo hotu tia estudu ida ne’e sira aprezenta ba Konselho Ministro, depois se Governo hakarak duni, tenki halo vigibility study. Entaun se Governo hakarak duni, entaun Governo rasik mak loke konkursu internasional e halo projektu ne’e,”

“Maibe, se Governo lakoi tau osan, hakarak husu osan Kuwait e Kuwait mak fo karik osan ne’e, entaun Kuwait mak depois sei halo konkursu internasional, para sira mak deside fo ba se, nemak sistema Kuwait nian. Maibe ne’e nungka aprovadu husi Konselho Ministro iha Primeiro to’o Segundo Governo konstitusional,”dehan Xefi estado ke hetan akompanha husi Major General F-FDTL Taur Matan Ruak.

Pre-vigibility study kona ba projektu Auto-Estrada nebe tuir planu atu halo husi Com, Lospalos to’o Mota Ain ne’e, Kuwait rasik mak finansia, laos estado Timorense.

“Se Primeiro Ministro (Xanana) iha karik dadus kona ba ne’e, aprezenta provas. Maibe hau uluk hanesan Ministro Negosiu Estrangeiro, hau hatene Kuwait mak fo US$1 millaun ital atu selu previgibility study ne’e, ke kompanha boot ida mak halo pois hatudu ba Governo katak, imi haretok ne’e imi gosta ka lae, se projektu ba oin orsamentu mak ida ne’e. maibe ne’e la konsege avansa,”haktuir PR Horta.   

Tuir PR Horta, uluk nia kaer pasta nudar Primeiro Ministro iha Segundo Governo Konstitusional, nia parte la assina akordu ida ho Kuwait atu halo Auto-Estrada husi Com, Lospalos to’o Mota-Ain, Bobonaro. Tanba ne’e, sira hirak ne’ebé hateten PR Horta assina akordu ho Kuwait ne’e bosok, e ne’e akuzasaun ba nia.

“Hau Primeiro Ministro iha krizi nia laran, fulan 10 deit. Se ita boot sira hanoin Primeiro Ministro iha krizi nia laran atu assina akordu para lao tinan lima nia laran, hau hanoin hau laos aventureiro para halo buat ne’e,”afirma PR Horta.

Lauriado Nobel da paz ne’e akresenta, kona ba projetu refere, primeiro Governo mos iha dúvida itoan tanba TL nia osan seidauk maka’as atu finansia nomos seidauk iha planu estrategiku ida atu define Estrada ida ne’ebe mak prioridade.

“Portanto buat sira ne’e ita bele hatete, akontese deit iha surat, iha mehi deit. Se mak hatete halo akordu, hau hanoin diak liu hatudu akordu ne’e para ita hot-hotu hare,”sadik PR Horta tan.