BIOGRAFIA SUADOSA CAMARADA ILIDIA GUTERRES NIAN: HUSI NIA OAN NO FAMILIA

Biografi Badak Mãe Nian

Ilidia Da Silva Guterres (Lilita/Dinakai), oan husi matebian Claudino da Costa Guterres e Maria Boavida, moris iha Venilale, Waimua, iha loron 26 de Marçu de 1954, feto mesak hosi maun alin nain hitu.

Hahu nia escola Pré primária iha Venilale iha tinan 1962, maibe iha tinan 1965, husik hela nia knua atu ba kontinua nia estudo iha Baucau, ramata nia Curso iha 1975.

Iha 1975, golpe hahu, iha tempo hanesan (invasão) Dina tenki moris nudar oan kiak ho 21 anos de idade tamba lakon Inan Aman nebe mate hotu iha tempo neba!

Evacua ba ailaran, iha parte Matebian, hahu actividade nudar membro OPMT, iha baze de apoio Centro Leste. Iha Situação dilema e la hatene eskolha, maibe atu hatutan nia moris, liu husi José Dias (Loimali), Dinakai Coenhece Mauhodu Ran Kadalak, e simu Mauhodu nudar nia companheiro atu moris hamutuk.

União ida neebe legaliza tuir Ukun FRETILIN  nian iha fulan Fevereiro, 1978, iha Zona 15 de Agosto, Oça Mesa, Waida-Suco Bualale.

Hosi união ida ne, hetan oan Mane ida Ivo José (Mau-Mean) 1979.

Atraves difikuldades oioin, nudar kaben husi guerrelheiro ida, idade nurak tebes atu simu realidade nudar kabe-nain iha situaçao moris iha funu nia laran!

Nudar lider nia kaben, nia suporta nafatin nia kaben oin sa nia bele halão nafatin nia knar nudar membro Comissão Politico Permanente. Nia fo edukação ba jovens sira, no iha uma ka abrigo, sempre Halão discussão actual iha tempo neba!

Tamba circunstancias funo nian, Dinakai ho Ivo José tenki haketak an hosi Mauhodu, tun mai vila iha 1991.

Iha tinan 2980, dala ida tan Dinakai tenki lakon nia oan mane Ivo Jose, nebe fila hikas ba Aman Maromak.

Ikus mai iha 1991, nudar sarani, Dinakai ho Mauhonu (iha subar nia laran), simu Sakramentu kaben hosi Amo Alberto Recardo (actual Bispo de Dili) iha Cámara Eclesiástica-Dili, iha tuku 8 kalan. Laiha festa husi casamento ida ne, tamba tenki fila hikas ba sira nia subar fatin (tia Anto nia uma Vilaverde), fahe malun fila fali, iha Janeiru dia 23, maka hamutuk fila fali depois de Mauhodu hetan Capturação husi military Indonesia. Husi Cassamento ne hetan oan Mane rua, Pepito e Marco.

Dala ida tan, Dinakai tenki simu realidade ida atu moris mesak nudar faluk, hahu tinan 1999, embora to’o nia taka matan no hakotu is, sei iha nafatin esperança katak loron ida nia kaben “Mauhodu” sei fila hikas mai hamutuk ho nia, oan sira, inan faluk, no familia tomak!

Nudar kaben, nudar Inan, nudar Feto foun (Inan Banin sei Moris), la’os fácil atu moris iha Situação nebe nia enfrenta!

Hahu ita hetan libertação ba rai doben ida ne, nia dedika nia moris, nafatin nudar Educadora ida, no mós Chefia ba escola Primária no.5 Comoro, to’o nia hakotu nia moris.

Educadora iha Escola, mos Educadora iha familia!

Inan ida nebé, ami nunka hare katak nia susar ka nia terus!

Sempre buka halibur hamutuk familia, parentes, amigos no oan sira!

Sempre iha tempo atu rona no partilha ema seluk nia halerik!

Dala barak nia so bele rona, nia so bele fo konselho tuir faluk kbit laek

Mãe, o moris nudar faluk, mas uma laran sempre nakonu, nakonu ho ema, ema oan kiak no feto faluk!

Karik ida ne, Mãe nia kruz!

Faluk, oan kiak, faluk, oan kiak maka hamutuk iha mahon ida ne!

Mahon ida nebe baa mi, nakonu ho domin, nakonu ho ksolok, embora dala barak, laiha duni atu han tuir oan ami nia hakarak, mas ami lasenti hamlaha, tamba ami nia inan sempre alimenta ami ho nia domin, nia ksolok, nia hamnasa!

Halao nia moris nudar feto faluk, iha medos 2005, mosu belun diak ida, hahu hari uma nebe ami nia inan hatoba ba!

Iha fin de 2005 (Novembro), Comesa sente ona moras, maibe oan ami nunka hatene mae moras sa’ida?

Fevereiro 2006, hakat ba Hospital Guido Valadares, hodi buka hatene mãe nia moras! Ikus mai iha fulan hanesan, consege halo operação ba cancró iha mãe nia isin.

Junhu 2006, ita hotu hasoru crise, maibe ami nia inan hasoru crisi bot liu tamba precisa osan ho valor nebe bot atu ba halo chemotherapy iha Australia (Melbourne)? Crise nebe ita hasoru, la taka governu iha altura neeba nia conciencia, e tulun duni ami nia inan ba hala’o tratamentu durante fulan 6 nia laran!

Dezembro 2006, Mae fila husi Melbourne/Australia ho condiçao saude nebe diak liu!

Dezembro 2007, graça maromak nian, mãe simu pai nia pensão veteranu nian.

Esforços dentro de limitação oioin nebe mãe enfrenta, tulun husi maluk barak, no mos hosi 4. Governu. Mãe hakaas an hodi apronta uma neebe ohin ami temi iha leten.

Hahu simu pensão nia kaben nian, bele hakma’an nia todan, bele fo biban ba oan kiak sira nia moris, faluk lubun ida nia moris, infelizmente, kma’an nebe nia sente la lão ba oin, buat hotu tenki fila fali ba kotuk, hahu Dezembro 2009!

Nia tenki hatutan nia moris, liu-liu oan kiak no feto faluk lubuk ida nia moris ho kbit professora ida nian! Kbit laek tebes, tamba kredito nebe nia foti iha Banco, halo nia dada is la to’o!

Hakat liu susar no difikuldade oin-oin, oan mane boot “Pepito” consege acaba nia estudo secundario e felizmente admitido mos iha Bolso de Estudo ba Hongkong, nebe sei hahu iha Setembro2010.

Nudar Inan, nia Preocupação boot liu, mak oinsa atu prepara e forma nia oan sira atu hasoru desafios ba sira nia futuro, ho nune, oan mane pepito, nia haruka ba tuir curso ingles iha Bali durante fulan nen.

Ba oan nia curso ne, dala barak nia tenki recorre ba maun-alin, familias, amigos, husu apoiu atu hatutan oan nia moris durante hala’o nia curso! Graça Aman Maromak, oan mane remata nia curso, maibe iha tempo hanesan, nai hatun mos planu seluk ba oan ami, no baa mi nia inan!

Oan mane fila hikas iha dia 2 de Julhu, fila iha momentu nebe inan doben começa moras fali ona, Moras iha nia silencio nia laran, recorre ba familias kbit laek, hein, karik tulun bele mosu, ikus liu iha loron 25 de Julho, tuku walu kalan, familia forçado atu lori ami nia inan ba HNGV.

Inan, tan sá o tenki nonok?

Inan, tamba sá labele fahe o nia moras, labele fahe terus neebe o sente?

Iha mãe nia matan, ami hare terus nebe o tahan,

Ami hare preucupação nebe o sente,

Ami hare todan nebe o lori!

Karik Cruz ida nee mak Mãe hakarak lori!

Cruz ba lakon ami nia aman,

Cruz ba oan ami nain rua,

Cruz ba Avozhina faluk, Pai nia Mãe,

Cruz ba faluk no oan kiak nain hat, nebe Mãe nia alin matebian (tio Tino) hela iha Mãe nia liman.

Cruz ba maluk hotu nebe tau neon no tau laran ba Mãe atu hatutan ba sira nia halerik… Cruz nebe todan Mãe, maibe Mãe hakarak simu, e mae halua tia mae nia moras, mae halua tia katak rico soin no murak rai nebe ami iha mak o, Mãe???

Mãe hatene katak ami nain rua, avozinha, alin sira, tia faluk, depende ami nia moris ba o, Mãe?

Mãe, ami labele simu, o atu lão fila kotuk baa mi, maibe tuir aman Maromak, na’in ba moris, dalan ida ne mak diak liu ba o, Inan Doben!

Atu hakmaan o nia terus, atu hakotu o nia moras, lori o ba deskansa iha Aman nia sorin!

Embora todan, todan tebes Mãe, mas ami tenki simu, tamba ami hadomi ho Inan Doben!

Ami fiar tuia fiar nebe o sempre hanorin mai ami, akatak ho hetan fatin diak atu deskansa iha Aman Maromak nia kaduna, mas karik, ami bele hatene Mãe, hatudu netik sinal ruma, roman ruma, ami nia aman Mauhodu iha nebe?

Inan, Hodu Ran Kadalak, o nia kaben, ami nia Aman, Avozinha nia oan, mas ami bele husu, nia ne se los?

Ema hotu koalia, ema barak koalia, katak nia ne, lider ida mos, funu nain ida mos, sera ke ida nee los, Mãe? Se los duni, sasin mak saida Mãe?

Dala ruma tio Ma’huno bele explica buat ruma, kona ba se mak Mauhodu Ran Kadalak, maibe ida nee mo ami sei labele hetan resposta, tamba tiu Ma’huno mos moras e labele koalia?

Ida nee mak realidade, ida ne mak moris, iha Nação foun, katak ita tenki hatene terus, hatene Sacrifica an, atu bele hetan ksolok iha loron hikus.

Nação foun, ho nia estoria rasik, ami fiar Mãe, katak historia sei haklaken buat los, embora buat los balun bele hakanek ema nia fuan ka laran.

Ami la halua, lori ami nia Inan Doben nia naran, familia tomak, parentes amigos, hato’o agradecemento boot, ba esforço, apoiu moral e financeiro husi governo, iha ultímos momentos iha ami nian inan moris to’o nia taka matan!

Nia hakarak tebes atu lori sai nia ba konsulta iha rai liur, e ba duni iha 4h20 madrugada dia 28, to’o iha Singapura, nia taka matan, nia is hakotu iha tuku 8 horas Singapura.

Oan kiak ami lori familia, parentes tomak nia naran, so iha lia fuan murak “Obrigado no agradecemento wain” ba laran luak nebe halo mai ami nia Inan durante nia moris, to’o ba halot nia isin.

Ami husu deskulpa bas alah hotu nebe ami nia inan halo durante nia moris.

La halua, ami hakarak iha momentu ida ne, hato’o ami nia agradecemento rohan laek ba tio Ali, ba rai rohan nebe oras ne dadaun ami hela ba.

Mãe ami senti nafatin o nia domin iha ami nia moris, e ami nia domin no oração hamutuk nafatin ho Mãe to’o rohan laek.

Tebes duni Mãe, fiar ba nain nia tulun, fiar ba Mãe nia liman fuan sanulo, fiar mos ba oan ami nebe bot dadaun, Mãe la senti faluk, Mãe halão funsaun nudar inan, nudar aman ba oan ami, Mãe senteforte no laran luak atu simu susar hotu, atu hatutan ami nia moris, força no coragem nebe Mãe iha, nia abut nak mãe nia FIAR.

Mãe ba ona, fila ba Aman Maromak nia Kaduna, keta halua tau matan nafatin ba oan ami Mãe, ami nia Forca mak Mãe nia domin, atu nune, bele hakman ami nia hakat ba oin, hakat nebe ami mos lahatene atu bele to’o rohan ka lae? tamba Inan Aman, imi husik hela ami, mesak tebes, oan kiak kbit laek, ba inan laek ba Aman!

Obrigado Mãe…………………………………

Adéus Mãe……………………………………

Ami fiar metin nafatin katak Na’i iha Leten ás ba, iha planu nebe diak liu ba oan ami nia moris.

Descansa em paz Mãe, ho nune habadak o nia terus, Amen!!!!