ELETRISIDADE RIIN TOHAR NO MONU IHA AREIA BRANCA: PRESIZA INVESTIGA TAMBA CONSTRUSAUN FRAKU

FRETILIN.Media Flash


Dili, 1255 horas, 15 Agostu 2010

ELETRISIDADE RIIN TOHAR NO MONU IHA AREIA BRANCA: PRESIZA INVESTIGA TAMBA CONSTRUSAUN FRAKU

Ohin dader kareta ida hakiduk no xoke kona poste EDTL nian ida iha luron ninin iha Areia Branca.  Ida nee halo poste semento nee tohar besik nia hun no monu ba fiu eletrisidade nian no iha dalan neebe trafiku liu.

Deputadu Inacio Moreira husi FRETILIN foti ona kestaun kona ba instalasaun linha distribuisaun foun nee hoid harii ho sementu riin neebe kleuk no neebe hetan sunu tamba instalasaun la los.

Tuir observasaun FRETILIN nian, liu husi deputadu Jose Teixeira neebe hare ho matan rasik no koalia ho populasaun iha fatin, sementu riin nee tohar maske hetan deit xoke kiik husi kareta.  Maluk sira bele hare foto neebe haruka hamutuk ho ida nee neebe hatudu katak riin nee iha deit besi kiik rua iha sementu nia laran.

Ba FRETILIN nee grave tebes tamba hautudu katak poste ka riin nee fraku tebes iha nia desenho no produsaun.  Entaun ita presiza dei mak husu, poste ka riin hira iha Dili mak iha defecto (ka iha Bahasa: cacat) hanesan ida nee?

Riin nee todan tebes, no se dala ruma monu entaun bele sai perigu boot ba maluk ruma neebe iha okos.

Favor ida maluk Jornalista sira investiga diak tan kestaun ida nee tamba presiza assegura katak la iha perigu tan ho riin seluk iha Dili laran neebe kompanhia ida neebe harii hanesan riin ida neebe tohar no monu iha fatin barak iha Dili laran.

Fotografia hamutuk ho email ida nee.

(Ba informasaun seluk tan dere ba deputadu Jose Teixeira iha 728 7080)