MENSÁJEN NATAL NO TINAN FOUN NIAN HUSI SEKRETÁRIU-JERÁL FRETILIN DR. MARI ALKATIRI

MENSÁJEN NATAL NO TINAN FOUN NIAN HUSI
SEKRETÁRIU-JERÁL FRETILIN
DR. MARI ALKATIRI

Maluk sira!
Buiberes!
Mauberes!


Loron balun ta’a ita tama ( Ita besik tama ona????) iha kuadra festa Natal nian no hakotu tinan 2010.

Hau hein katak tempu ida ne’e sei rame tebetebes no katak tinan foun tuir mai ne’e sei nakloke ba esperansa foun no hahalok ne’ebé halo ita hotu-hotu laran metin.

Tuir siklu bainbain vida nian, tinan ida ta’an mak liu ba ita ida-idak.

Tinan 2011 atu besik hahú ona( Ita atu besik tama ba tinan 2011) . To ona tempu atu tetun ita nia hahalok ho laran kamán, ho brani no dignidadi atu ita bele simu ita nia frakasu nu’udar frakasu, ita nia susesu nu’udar susesu. Lalika ta’an ona buka taka/súbar problemas ka bóbar malu . Lalika tortura a’an maibé hahú hanoin sériu no klean kona ba buat ne’ebé ita seidauk halo ka halo tiha ona ba hadia ita ita nia povu nia moris, ba ita nia família sira no ba sosiedade tomak .

Ba ita Timor oan sira, tinan 2011 sei nakonu ho dezafiu bo’ot tebetebes. Tinan foun mai ne’e mak sei lao uluk molok ita hakat ba 2012, tinan ne’ebé ita sei halao eleisaun ba Prezidente no ba Parlamentár sira.

Nune’e, iha tinan 2011nia laran, ita timor oan hotu-hotu tenke harii ambienti konfiansa nian,
katak ita tenke hodi biit fiar malu atu bele haklean ita nia relasaun diak. Ita tenke fiar valór sira mai husi Libertasaun Nasionál nian – Pátria no Povu nian - , ita tenke fó fiar ba ita nia Sistema Polítiku no Knstitusionál, fó fiar ba prosesu demokrátiku no ninia valór sira.

Ita tenke iha kbi’it atu harii Paktu Estabilidade ida ne’ebé metin duni no Plataforma Unidade Nasional foun ida.

Mai ita hakoak lesuk Konstituisaun RDTL nian no tanen hamutuk ninia prinsípiu no valór sira.

Mai ita hamutuk tanen Estadu Direitu Demokrátiku no tatoli dala ida ta’an katak ita hakarak defende buat sira ne’ebé ita manán tiha ona.

Mai ita hamutuk hasoru violénsia nu’udar instrumentu ba hadau podér polítiku.

Mahatma Gandhi dehan uluk tiha ona no hau hatete tuir: “ Bainhira ita ita seidauk hatene loloos ema ida nia intensaun no ita la fiar nia ho laran tomak, biar nia halo buat barak ka buat ruma diak, ita la fiar nafatin”.

Nune’e, ita nia povu hein husi Líder sira atu leno dalan diak liu, iha liu maturidadi polítika, integridadi makás, moris loron-loron ho étika, la foti a’an no hatudu katak hatene respeita ema seluk. Povu eziji katak líder sira hatene foti desizaun ida ne’e ka ida ne’ebá no sukat desizaun ne’ebé sira halo iha momentu ida-idak. Povu hein katak líder sira hatene oinsá halo no halo saída atu manán sira nia fiar. Povu hein katak líder sira sei halo buat hotu-hotu atu povu labele sente laran namlele ka nakadoko, tamba ida ne’e halakon dadauk sira nia fiar no hado’ok sira ba bei’beik.

Ita Timor oan hadomi pás, no hakarak hametin ida ne’e ba bei’beik. Ita hakarak ita nia rai iha estabilidade nafatin atu ita bele halao dezenvolvimentu nasionál ba oin ho laran kamán no hakmatek.

Ita nia povu sei vota fila fali iha 2012. Nune’e, tinan foun tuir mai importante tebetebes tamba durante tinan ida ne’e ita sei harii ambienti konfiansa atu eleitór/votante timor oan ida-idak bele fiar prosesu ne’ebé sei lori ita ba tau ita nia votu iha urna eleisau nian.

Importante katak atór polítiku prinsipál sira simu ho laran kamán prinsípiu alternánsia nu’udar prinsípiu sagradu ida, katak ohinloron líder ida ne’e mak ukun maibé abanbairua ema seluk mak kaer fali kuda talin rai ida ne’e nian ka poder polítiku. Alternánsia ba ukun rai ida ne’e determina husi mo’os rezultadu votu sekretu, universal no livre no ida ne’e mak konsekuénsia lójika no normal iha sosiedade ne’ebé demokrátika. Iha sistema demokrasia nia laran, podér mai husi povu tuir Konstituisaun no Leis sira seluk.

Nune’e importante tebetebes katak Líder polítiku hotu-hotu hatene fó kontribuisaun ba harii ambienti konfiansa atu prosesu tomak bele hetan susesu. Ita hotu iha obrigasaun atu hametin Estadu Direitu Demokratiku atu Povu mesak mak bele fó lejitimidade ba buat hotu-hotu.

ITA HOTU-HOTU SEI HASE’ES A’AN HUSI DESKONFIA MALU NO SEI HAKOAK 2011 NU’UDAR TINAN IDA NE’EBÉ ITA TIMOR OAN FÓ FIAR BA MALU NO NU’UDAR TINAN BA HALAO SOLIDARIEDADE NASIONÁL.

MAI ITA HAMUTUK PROKLAMA NO TANEN DÉKADA 2010- 2020 NU’UDAR DÉKADA BA PÁS, ESTABILIDADE NO DEZENVOLVIMENTU.

ITA KORE ONA ITA NIA RAIN HUSI DOMINASAUN ESTRANJEIRA. ITA SEI KORE ITA NIA POVU HUSI KIAK NO DEPENDÉNSIA EKONÓMIKA, SOSIÁL NO POLÍTIKA.

A LUTA CONTINUA!

Ba maluk sira hotu-hotu, hau ható hau nia votus ba NATAL KMANEK NO KATAK TINAN 2011 SEI NAKONU HO SUSESU.

FELIZ NATAL E
UM 2011 PRÓSPERO.

Hakoak boot
Dili, 15 Dezembru 2010