Kamaradas no Maluk sira hotu-hotu
Maubere no Buibere sira
Ita besik ona halibur - malu atu selebra Natal 2010 no Tinan Foun 2011.
Hanesan bain-bain, ita hotu-hotu hakarak halao festa sira ne’e ho laran haksolok no dame ba malu, hamutuk ho ita nia família no belun sira no moos ho ita nia Povu ne’ebé ita hotu-hotu hadomi.
Ita bele uza moos oportunidade ida ne’e atu halo reflexaun ba ita nia a’an rasik no ba hotu-hotu nia hahalok no oinsá ita moris loron-loron no sente laran haksolok. Ida ne’e bele akontese de’it karik ita sente katak ita iha nesesidade atu hadia a’an beibeik maibé ida ne’e eziji ita halo balansu ne’ebé sériu no onestu ba ita nia hahalok rasik durante tinan ida ne’e nia laran. Tamba ita ema moris kedas ona ho frakeza, nune’e nu’udar ema, ita iha nesesidade ida ne’e.
Bainhira ita halo ida ne’e, la iha ema ida sei liu fali ida seluk, maibé ita mesak hanesan de’it, no buat ne’ebé ita hotu-hotu manán mak valór nu’udar Ema ne’ebé moris iha fatin ida de’it. Ema ida ne’ebé hatudu virtude boot liu mak ida ne’ebé , biar nia sai vítima, tamba razaun ne’ebé de’it ( ka biar la iha razaun ruma), lólo ninia liman ba fó perdaun no husu dame ba ida ne’ebé halo aa’t ba nia. Maibé ema ne’e la’os lólon de’it liman ba ninia “inimigu” maibé buka moos hadia nia hahalok a’at no nune’e hadudu katak nia la sukat ka tetun ninia esforsu atu fó malu diak ho maluk sira seluk.
Tamba ita hotu hakarak dame ida ne’e, dame ida ne’e tenke mai husi esforsu ida-idak nian ne’ebé sei harii no hametin nu’udar hotu-hotu nia hakarak no atu hetan ida ne’e, ita hotu-hotu presiza respeita valór no prinsípiu ita nia sosiedade nian. Labele fó fatin ba hanoin ka hahalok a’at iha ita nia sosiedade . Ita labele moris nar’naran de’it , maibé, ita tenke moris tuir ita nia hakarak rasik.
Ita sei iha tinan ida ta’an iha oin - Tinan 2011. Iha tinan oin ne’e mak hotu- hotu sei prepara a’an ba projeta ita nia a’an. Maibé projetus ba Tinan Foun harii no hametin husi buat ne’ebé halo iha tinan kotuk. Labele harii buat foun karik la haktuur iha buat ne’ebé tuan. Iha kontraste ida ne’e, ita haree dezafiu ida, ne’ebé buat ne’ebé foun mak sei manán ida ne’ebé tuan, karik vitória ida ne’e prepara husi buat tuan. Nun’e , 2011 sei sai duni Tinan Dame no Esperansa nian.
Nu’udar sidadaun Timor oan, ita hotu-hotu tenke kaer metin ita nia responsabilidade atu tanen Estadu Direitu Demokrátiku ne’ebé foti a’as dignidade umana nu’udar faktór ida ne’ebé lenon ita nia hahalok loron-loron nian. Estadu de Direitu Demokrátiku laos estadu nebe hatur no halo tuir ema ida nia karakter no hakarak, ne’e katak Estado nebe laiha Direitu Demokratiku, ka ema ida mak Estadu.
Ita rona diskursu oin-oin kona ba Direitu Ekonómiku, Sosiál no Kultural. Lia fuan ne’ebé sira hatete kona duni ba ema moris sira. Maibé ita la hatene lolós katak lia fuan sira ne’e hatudu de’it imajen simples ida ka reprezenta duni mundu nebe ema moris.
Dignidade umanu sai direitu umanu tamba halo parte ida-idak ninia moris. Valór ida ne’e a’as tebetebes no ita hotu-hotu tenke tanen. Direitu ne’e iha ona maibé tenke akompaña beibeik ho hahalok no renovasaun.
Ita bele halo de’it ida ne’e karik iha hatuir regras no prinsípius República Democrática de Timor-Leste nian.
Ba hotu-hotu hau ható votus Natal diak no Tinan Foun nakonu ho susesus.
Hakoak boot ba maluk sira hotu !
Francisco Guterres LuOlo
Presidenti
FRETILIN
23 Dezembru 2010
No comments:
Post a Comment