GOVERNU TENKE HATUDU SERIEDADE KONA BA DESIZAUN ATU TAKA JOGOS “BOLA GULING”

REPUBLICA DEMOCRATICA DE TIMOR-LESTE
PARLAMENTO NACIONAL
BANCADA PARLAMENTAR DE FRETILIN

KOMUNIKADU BA IMPRENSA


Dili – 1 Julho 2011

GOVERNU TENKE HATUDU SERIEDADE KONA BA DESIZAUN ATU TAKA JOGOS “BOLA GULING”

Depois de legaliza jogos hanesan “bola guling”, “Kuru Kuru” no seluk tan iha Agostu tinan 2010, sem iha consulta publika ho grupos sosiai no partidus opozisaun, agora tuir comunicado imprensa husi governu rasik no comunikasaun social, governu RDTL halo desizaun iha Konselhu Ministro hodi taka fatin jogos “Bola Guling” tamba tuir membrus governu “kria fali problema social” no “nebee ita dehan katak, ba tempu naruk ladun diak, nee ita taka.”

Vice Chefe Bancada FRETILIN no membru Comissaun Ekonomia, Fiancas no Anti-Corrupsaun, Deputado Francisco Branco, deklara katak desizaun nee husi governu diak ba sosiedade Timorense, maibe la kompletu tamba sei husik jogos balun loke hela, hanesan “Kuru-Kuru” no seluk tan.

“Ami mos duvida seriedade husi membru governu no nia funsionariuspublikus nebee responsavel atu implementa desizaun ida nee, tamba tuir informasaun nebee ami rona iha interesse privadu nebee hamusu conflitu ho desizaun ida nee. Tamba ne mak ami hakarak atu revoga lei ida nee totalmente, no Parlamentu Nasional maka tenke halo lei foun ida kona ba regulariza jogos hirak nee, tamba nia impaktu social makas tebes no klean tebes ba tempo naruk,” affirma deputado Branco.

Nia realsa katak hodi uluk kedas maka Bancada FRETILIN deklara nia contra lei ida nee, tamba legaliza, em ves de controlla jogos hirak nee. “Durante debate orsamentu rectificativu iha tinan 2010, Bancada FRETILIN deklara katak lolos lei nee parlamentu mak aprova, laos governu nia kompetensia, maibe governu la rona. Ami mos rekursu la too atu lori kazus hotu ba Tribunal Rekursu. Maibe agora tempo too atu governu hatudu nia seriedade atu hakotu problemas nebee comprova tiha ona katak mosu husi existensia jogos hirak nee,” hatutan Branco.

Branco dehan katak primeiru Bancada FRETILIN sei fo oportunidade ba governu atu hakotu jogos nebee legalisa hotu iha fulan ida nia laran, se lae FRETILIN sei lori asaun ba Parlamentu Nasional.

“Ba ami problema nee seriu. Ami congratula governu nia medidas, maibe hanoin katak la too, tamba ami la fiar jogos sira nee sei taka, no sira sei halo nafatin. Tamba impaktu nebee jogos nee bele iha kona ba familias, tamba osan nebee lolos gasta atu selu hahan ba familia, escola no nesesidade seluk familia nian ba habokur ema gupo kiik ida deit. Ida nee FRETILIN labele concorda tamba ami nia missaun desde 1974 mak LIBERTA NASAUN NO LIBERTA POVO, liliu liberta husi kiak. Existensia jogos nee la tulun ita nia missaun ida nee,” Branco taka.

Ba Informasaun klean liu tan dere ba Deputado Francisco Branco iha 723 7124