GOVERNU TENKE HATUDU SERIEDADE KONA BA DESIZAUN ATU TAKA JOGOS “BOLA GULING”

REPUBLICA DEMOCRATICA DE TIMOR-LESTE

                 PARLAMENTO NACIONAL

            BANCADA PARLAMENTAR DE FRETILIN

                DEKLARASAUN POLITIK

GOVERNU TENKE HATUDU SERIEDADE KONA BA DESIZAUN ATU TAKA JOGOS “BOLA GULING”

Sr Presidente Parlamento Nacional

Ilustres Deputados

Iha semana liu ba Deputadus Bancada FRETILIN no povo rona no lee iha jornais katak governu de facto RDTL nian depois de legaliza jogos hanesan “bola guling”, “kuru kuru” no seluk tan iha Agostu tinan 2010, nebee la hetan consulta publika ho grupos sosiais iha ita nia sosiedade, hanesan Igreja, partidus opozisaun no NGOs, Organisasaun Feto, agora tuir comunicado imprensa governu nian liu husi comunikasaun social hateten, Governu RDTL halo desizaun iha Konselhu Ministro hodi taka fatin jogos “Bola Guling” tanba tuir membrus governu “Bola Guling” kria fali problema social” no “nebee ita dehan katak, ba tempu naruk ladun diak, tanba nee ita taka.” Maibee tuir ami nia hanoin la kompletu tanba sei husik jogos balun loke nafatin, hanesan “kuru-kuru” no jogos seluk tan.

Ami mos duvida seriedade husi membru governu no nia

Funsionarius nebee responsavel atu implementa desizaun ida nee, tamba tuir informasaun nebee ami rona, iha interesse privadu nebee hamusu conflitu ho desizaun ida nee.  Tamba nee maka ami hakarak atu revoga lei ida nee totalmente, no Parlamentu Nasional maka tenke halo lei foun ida kona ba regulariza jogos hirak nee, tamba nia impaktu social makas tebes ba familia sira no klean tebes ba tempo naruk iha ita nia sosieadade tomak.

Uluk kedas, bainhira Governu de facto aprova Decreto Lei ida nee, no bainhira Governu buka aprovasaun ba osan ida nee iha Orsamentu Geral Estado, Bancada FRETILIN deklara contra lei ida nee, tamba legaliza, em ves de controlla jogos hirak nee.  Durante debate Orsamentu Rectificativu iha tinan 2010, Bancada FRETILIN deklara katak lolos lei ida nee Parlamentu maka tenke aprova, laos governu nia kompetensia atu aprova, maibee governu la rona. Iha Parlamento mos Deputados sira nebee apoiu governu, vota a favor hodi aprova orsamentu ba aktividade ida nee.  Ami, tanba rekursu la too ami la lori kazu ida nee no kazu sira seluk ba Tribunal Rekursu.  Maibe agora tempo too ona atu Governu hatudu nia seriedade politika atu hakotu problema nebee comprova tiha ona katak hamosu problema social husi existensia jogos hirak nee.

Bancada FRETILIN hakarak deklara katak ami sei fo oportunidade ba Governu atu hakotu jogos hotu nebee hetan legalisasaun iha fulan ida nia laran, se lae FRETILIN sei lori asaun mai iha Parlamentu Nasional hodi hakotu Decreto Lei ida nee nebee foo impaktu negativu ba familia sira iha ita nia sosiedade.

Iha semana kotuk mos, Komunikadu Imprensa ida mosu iha internet husi companhia jogos telemoveis husi Filipina naran “FilWeb”, Corporasaun nebee nia Presidente Dennis Valdes hateten katak iha loron 22 Junhu 2011, Governu RDTL fo licensa ba sira atu servisu hamutuk ho operador telekomonikasoens  hodi loke jogos liu husi telemovel iha Timor-Leste.  Companhia nia representante dehan sira sei fo naran “Mobile Osan Mean”.

Bancada FRETILIN hetan informasaun husi media, maibee ami duvida Deputados hotu iha Uma Fukun ida nee hatene, maske iha Deputado ida ka rua hatene kleur ona, no iha informasaun mos  katak ita nia diplomata balu no funsionariu publiku nivel aas balu nebee apoia makas programa ida nee hodi hatama kompanhia ida nee iha ita nia rain hodi mai explora ita nia povo liu husi jogos hirak nee.  Situasaun foun ida nee sei halo oan sira agora laos deit  husu atu “haruka pulsa mai lae”, maibee ho programa ida nee sira mos sei ejiji mos, haruka “Osan Mean mai lai”.

Ba ami contrato jogos liu husi telemovel ida nee  no problema jogos em geral, seriu tebes ba desenvolvimentu humanu iha ita nia sosiedade.

Sr Presidente

Jogo “Bola Guling” ho jogos seluk tan tama iha ita nia sosiedade iha tempu resistensia nebee konjuntura politika iha tempu neba tama ona iha pontu aas liu iha decade 90 post Massakre Santa Cruz, nebee hahu hetan partisipasaun maxima husi populasaun tomak ba resistensia klandestina liuliu jovens sira, tanba nee autoridade okupante Indonesio preokupadu ho situasaun foun ida nee sira hahu implementa politika alienasaun hodi buka desvia hodi distrai atensaun povu nian ba jogos, tanba nee ami kongratula desisaun Governu nian taka jogos sira nee, tanba  see lae maka ita rasik maka iha tempu independensia ida nee hakarak halo politika alienasaun ba ita nia povu.

Ami deklara congratula ho governu tanba toma medidas kona ba “Bola Guling”, maibee ami hanoin katak nee la too, tanba ami la fiar jogos sira nee sei taka, no sira sei halo nafatin.  Tanba impaktu nebee jogos sira nee sei halo ba familias sira, tanba osan nebee lolos gasta atu sosa aihaan ba familia, selu escola no ba nesesidade basikus seluk familia nian, ba fali joga hodi habokur ema gupo kiik ida deit.  Ida nee FRETILIN labele concorda tamba ami nia kompromissu desde 74 atu LIBERTA NASAUN NO LIBERTA POVO, liliu liberta povu husi kiak. Existensia jogos sira nee sei la mai tulun povu Maubere atu liberta nia aan husi kiak, maibee kontrariu sei lori nia ba situasaun kiak rabat rai liu tan.

Bancada FRETILIN hein medidas firmes no desisaun nebee lolos husi Governu nebee agora mos concorda ho ponto de vista katak jogos sira nee iha impaktu

negativu ba ita nia sosiedade tomak.

Dili, 5 Julho 2011

Bancada Parlamentar de FRETILIN