INTERVENSAUN BANKADA PARLAMENTAR FRETILIN IHA ABERTURA DEBATE CONTA GERAL ESTADO 2010

INTERVENSAUN BANKADA PARLAMENTAR FRETILIN IHA                      ABERTURA DEBATE  CONTA GERAL  ESTADO 2010

Dili, 04 de Novembro   2011

Sr. Presidente Parlamento Nacional,

Sua Exelensia Sr. Xanana Gusmao ho nia komitiva,

Distintus Konvidadus hotu,

Maluk Deputadu sira,

Povo Timor-Leste tomak,

Parlamento Nacional diskuti ona ba da-uluk konta geral estadu 2009 nian iha Dezembro 2010. Ohin dala ida tan ita atu halo diskusaun konaba konta geral estadu nian ba tinan 2010, nudar dever no obrigasaun konstitusional iha Estado de Direito Democratico Timor-Leste, estadu ida ne’ebe iha konstituisaun no leis atu regula ema no orgaun ida-idak nia komportamentu.

Osan iha OGE povo nian, no tuir konstitusaun, Parlamentu Nasional mak aprova orsamentu geral estadu, atu governu ba exekuta tuir programas no plano ne’ebe governo apresenta, hodi justifika katak osan presiza duni atu hadia povu nia moris. Parlamentu nasional mak halo mos fiskalizasaun, ka halo kontrolo ba exekusaun orsamental, no halo avaliasaun ba aktividade governu nian.

Enkuantu Tribunal de Recurso, hodi Tribunal Superior Administrativo, Fiscal e de Contas nia naran, halo fiskalizasaun ba legalidade despezas publikas no halo julgamento ba constas estadu nian. Tuir kompetensia ida ne’e mak,  Tribunal de Recurso hatama  nia pareser konaba Conta Geral Estadu mai iha Parlamento Nacional, hodi esklarese teknikamente, atu nune’e Parlamento ida ne’e bele halao diak liu nia iha knaar kontrolu politiku ba governu nia lalaok no exekusaun osan povu nian.

Bankada FRETILIN apresia tetebes Tribunal Recurso nia pareser konaba konta geral estadu 2010 nian, no ami nian parabens ba Tribunal ne’e, tanba nia desempenho, maske iha limitasoens oioin no la iha meius ka rekursus sufisiente, sira hasai duni pareser ida, ne’ebe sei tulun ita deputadus sira halao ita nia knaar.

Sr. Presidente, no

Kolegas deputadu sira,

Se ita halo komparasaun ba Tribunal Recurso nia pareser konaba konta geral estadu 2009 no pareser konta geral estadu 2010 nian, ita hare konkluzaun no rekomendasoens kuaze hanesan deit, direfensa uitoan los, maske iha tan problema seluk. Ate Tribunal deklara katak Kompara ho konta Geral 2009 nian, Konta Geral Estado 2010 nian la hatudu “melhoria” iha exekusaun orsamental, no mos kontrolo ba reseitas no despezas.

Katak problema hirak ne’be tribunal de Recurso identifika no preokupa iha konta geral estadu 2009 nian, sai nafatin problema iha konta geral estadu 2010 nian.

Signifika ke, Governo de Facto la implementa ka la halo tuir Tribunal Recurso nia rekomendasoens hosi konta Geral Estadu 2009 nian, nem se ker atu entrega dokumentus ka informasoens hotu ne’ebe Tribunal presiza hetan atu bele halo analize detalhadu no verifikasaun diak ba Conta Geral Estado 2010.  Katak Governu la simu pareser no ignora totalmente rekomendasoens Tribunal nian.

Uluk kedas Governo hatudu tiha ona sinal atu la kumpri rekomendasoens, wainhira iha debate konta geral estadu 2009 nian iha uma fukun ida ne’e, Sua Exelensia Sr Xanana Gusmao iha nia diskursu halo ataka mak’as, hodi hatudu Governu nia “arogansia Institusional” hasoru Trinunal Recurso, nudar orgaun kontrolu juridico, no nia pareser. Maibe, hirak ne’e hotu hatudu katak  Governu de Facto la iha vontade no seriedade atu hadia gestaun no laiha koperasaun diak ho orgaun sira halo fiskalizasaun atu uza osan povu nian ho didiak.

Alem de problemas hirak ne’ebe identifika tiha ona iha konta geral estadu 2009 nian, Tribunal de recurso mos preokupa ho problema legalidade despeza publika  ba osan 2010 nian, ne’ebe auditoria verifika tiha ona, katak iha instituisaun barak hosi governu nian, mak selu empregadu ka funsionariu ne’ebe la existe iha kuadru pesoal. Tribunal hare katak ne’e situasaun ida ne’ebe grave no hatudu indisius ba krime.

Bankada FRETILIN mos preokupa ho situasaun ida ne’e, tanba ida ne’e hanesan forma ida tan ema halo KKN -- Korupsaun, Konluio no Nepotismu, ka “naoksaun” iha Maun Bot Xanana nia Governasaun, iha ne’ebe KKN buras nanis ona. Ema hotu hatene Membro Governo no Diretores sira bolu nia familia ka nia maluk hosi partidu hanesan, hodi emprega sira ne’e iha servisus estadu nian iha ministeriu, ka diresoens, ka institusoens, nudar asesor ka funsionariu kontratadu. Ate balu fisikamente la servisu, tau deit naran no iha dokumentu kontratu, ka hanesan fiktisiu deit. Hanesan iha kedas 2008, ita rona, ema balu hela iha Kupang tanba nia Pro-Otonomi, maibe naran iha lista empregadu Ministeriu Edukasaun, no fulan-fulan simu osan permanente.  Osan hosi Bens e Servisus, ne’ebe hanesan zaku azul tanba laiha diskriminasaun, sira uza ba selu ema sira atu hariku an no nia familia ka maluk partidu sira.

Tanba situasaun hanesan ne’e grave, laiha dalan seluk, Bankada FRETILIN husu atu enkaminha ba Ministeriu Publiku ka orgaun kompetente seluk atu halo investigasaun no halao justisa ba autor sira.

Sr Presidente,

Kumpri lei esensial ba ita nia rai nudar estadu de direitu. Nune’e ita deputadus nudar membru hosi orgaun ba atu hola desizaun politika, no Governu nudar gestor ba osan povu nian, iha dever atu halo tuir lolos lei ne’ebe iha. Maibe kumpri lei deit la to’o. Boa gestao ba osan povu nian, mak ohin loron sai nudar kestaun ida ne’ebe desizivu tebes. Povu hakarak hatene se osan ne’ebe estadu gasta hodi povu nia naran, fo ona resultadu ruma ne’ebe diak duni, ho kustu ne’ebe kiik liu, no tuir duni nesesidade povu nian, ka lae.

Tribunal recurso tuir artigu 42 Lei Orsamrntu e gestao Financeira, tribunal recurso nia knar mak atu hasai pareser konaba legalidade despezas publikas. Maibe iha pareser ida ne’e, ita hare  problemas ne’ebe tribunal idenfika kuaze hotu-hotu ligadu ho funsoens gestaun orsamental ( ne’e katak planeamentu, exekusaun no kontrolu internu), no liga mos konaba pratika boa gestao nian: ekonomia, efisiensia no efikasia.

Tinan-tinan em kada debate Orsamentu Geral Estadu, dala barak mak Bankada FRETILIN koalia hatudu Governu AMP, ne’ebe hamrok osan, no tau osan barbarak, maibe la hatene atu gasta osan ba saida, gasta oin sa, no ba resultadu saida.

Hahu’u kedas hosi programasaun ka planeamentu, durante governasaun AMP nian nunka iha Planeamentu finanseru ne’ebe diak, no saida maka temi naran orsamentu estadu falha total. Inves de halo orsamentu maibe sai fali desorsamentasaun, no harahun tiha konseitu orsamentu nian.

Wainhira halo orsamentu, sira  la halo diskriminasaun didiak ba verba idaida. Nune’e mos tau numeru ka montante ba verba ida hanesan sik deit, ka tau deit buat ruma para hetan aprovasaun husi Parlamentu, tuir metodu planeamentu foun AMP nian: “tau deit ba, osan barak, depois maka tranfere”.

Deputadus iha parlamentu mos aprova mak numeru ne’e. Osan ne’e to’o ka la to’o, atu gasta ba saida, Governu maka hatene, husik ba Governu maka halo inprovisasaun. Se hanesan ne’e oin sa maka deputadus sira bele halo fiskalizasaun?

Sr. Emilia Pires dala barak mai iha uma fukun ne’e, ka iha media hatete katak, nia gestaun ba osan povu nian mak diak liu tebes, tanba reformas no mudansas ne’ebe Governu AMP halo. Sua Exelencia Sr. xanana Gusmao iha nia karta errata orsamentu 2010 nian hatete, katak reforma Gestao Financeira mak sai hanesan “melhor prestasaun IV Governu Konstitusional”.

Maibe, realidade maka ne’e, Governu apresenta exekusaun orsamentu ne’ebe a’as, maibe la tuir planu. Tanba hanesan iha 2009 halo transferensias barbarak ba pakote referendun no sst, iha 2010 halo tan transferensias barak tetebes liu-liu iha fundu infraestrutura. Ate transferensias hirak ne’e barak los mak ultrapassa ona limite 20 %  hanesan konsagra iha artigu 38 Lei Orsamentu e Gestao Financeira  nian. Tinan-tinan Governu halo transferensias osan barbarak hosi Reserva kontingensia hodi halo despesas ne’ebe laiha karakter inprevisiveis, nem urgente, nem inadiaveis. Ne’e tanba la iha planu  ne’ebe diak.

Custo obras publikas la normal ka bot tetebes to 300 ate 500% halo ema hotu isin fulun hamrik. Tanba halo estimatimava ba kustus projetus la liu hosi estudus ka levantamentu ruma, no nunka halo kontrolu ba custo no benefisiu projetus.

Realidade mos tanba laiha planifikasaun ida diak, hanesan hari edifisiu Camra Municipais, maske iha tinan 4 nia laran seidauk konsege hasai desizaun hari’I munisipius, at liu tan konstrusaun edifisiu balu hamosu tan adisional to’o 100%, no seluk ne’ebe ramata tia ona, hanesan akontese ona ho mini merkadus no sst, sai fali fatin ba bibi, karau no fahi. Enkuantu iha fatin seluk  eskola oan sira halo izame iha lona okos, no laiha meja, kadeira. Ne’e tanba laiha definisaun klaru ba prioridades. Se hanesan ne’e, Oin sa ita koalia ekonomia, efisiensia no efikasia gestaun finanseira?

Governu AMP la hatudu disiplina orsamental tuir regras normal ejiji, tanba ita bele hare’e orsamentu ne’e mai akomoda deit despeza sira ne’ebe hakarak halo. Exemplu, hanesan ita halo lista bainhira ita ba loja atu halo kompras, to’o iha loja hare buat barak kapas desidi sosa hotu, maibe osan iha bolsu la to’o, no tenke deve hodi promete selu iha tempu seluk. Ne’e maka ezemplu desorsamentu, maibe ida hanesan ne’e difikulta fali kontrolu hosi Parlamentu Nasional.

No fim, Sua Exelensia Sr. Xanana Gusmao rasik rekonhese ona Governu nia frakeza ka failhansu hirak ne’e, wainhira koalia iha “Conselhu Ministru Aberta” iha Centru Konvensaun Dili 01 de Agostu 2011, hatete nun’e : “tinan-tinan ita tau osan karik tau lolos, se lae ita tau osan sala hotu, realidade por exemplo imi husu osan $100 mil maibe kuandu iha nia implementasaun to’o tiha fali $120 mil, tanba ne’e maka hamosu dividas, I pelo kontrariu mos imi husu osan bobot, depois to’o nia exekusaun tun tia fali, (la gasta), buat sira ne’e maka ita preziza hadia”

Iha fatin hanesan Maun Bot  Xanana hatete tan :”realidade ne’ebe ita hare katak iha exekusaun OGE tinan-tinan ita kuandu to’o Agostu, nia exekusaun tun oitoan, kuandu tama ona Outubru, exekusaun komesa sae naton, maibe kuandu tama ona fulan Novembro, ne’e haksoit maka’as los hanesan NASA, tanba dalaruma ita hakarak duni exekusaun 90% ne’e, depois ba sosa sasan arbiru, ba fahe lalais tiha para husu fali osan foun. Problema hirak ne’e tenke hadia, tanba ita laiha konsekuensia ba ita nia gastus orsamentu, ida ne’e hanesan problema gestaun finansas…… Liliu Bens e Servisus no kapital menor ita atu koalia didiak ba malu, karik ita bele dehan, bolu malu para halai lalais, ida ne’e ita bele dehan gasta arbiru…. Gasta arbiru.” Ne’e mau bot mak koalia!

Sr. Presidente,

Problema hirak ne’e mosu, tanba la iha rigor tekniku no profesionalismu iha planifikasaun no halo previzaun orsamental, ne’ebe Governu halo previzaun taka matan deit la koresponde ho realidade. Previzaun hanesan ne’e nunka iha kredibilidade no la fiavel.

Wainhira planeamentu la los ka previsaun mal feitu, maka nia exekusaun mos falha, no  la iha sentidu ka lakon utilidade. At liu tan wain hira laiha kontrolu internu. Nune maka osan mal gastu no gasta arbiru deit, loke dalan ba atu iha korupsaun barbarak no fasilita “naoksaun”. Nune’e mak, maske gasta ona osan barak, maibe resultadu uitoan liu no la lori inpaktu ba povu nia moris.

Iha situasaun seluk ne’ebe Tribunal identifika no preokupa iha Conta Geral 2010 nian, mak falta de dezagregasaun rubrika reseitas no despezas por ministeriu ka instituisaun sira seluk ne’ebe halo pagamentus, liu-liu ba despesas hosi fundus no reservas orsamentais. Situasaun ne’ebe komum iha conta  ne’e. Maibe situasaun hanesan ne’e mai kedas husi nia hun tanba wainhira halo plano no orsamentu la halo tuir loos, ka la halo kedas desagregasaun ba verba idaida. Ne’e hanesan “biasa” ona iha planu orsamentu durante AMP nia ukun. Exemplu ne’be flagrante mak hanesan verba “Bens e Servicos”, ne’ebe Bankada FRETILIN dala barak temi hanesan “Saco Azul” ba Governu atu gasta osan narnaran sem hatene atu gasta ba saida. Governu ida ne’e la transparente ho osan ne’ebe atu gasta iha fundus, hanesan Fundo Seguransa Alimentar, Fundo Kombate Pobreza, no fundu selseluk tan. Nune’e maka to’o fim do ano fiscal halo deit konta ba despeza ne’ebe halo ona ho montante global deit no labele halo duni dezagregasaun.

Tribunal iha razaun duni atu preokupa, tanba falta de dezagregasaun ne’e implika mos ba konstitusionalidade fundus no reservas orsamentais nian, hanesan esplika ona iha pareser nune’e: “Konstitusionalidade fundus no reservas orsamentais depende sempre ba konhesimentu lolos ba atu gasta osan ne’e ba saida, no konhesimentu pormenorizadu ba despezas ne’ebe selu ho osan hira ne’e, se lae, viola artigu 145 no. 2 Konstituisaun nian”.

Artigu ne’e mak bandu atu iha dotasoens sekretus iha orsamentu, no tuir artigu ida ne’e duni mos Tribunal Recurso iha 2008 deklara inkonstitusionalidade ba Fundo Estabilizacao Economico, tanba situasaun hanesan dadauk ne’e.

Situasaun hanesan ne’e mos, mak ita hare iha Orsamentu Geral Estadu 2011 nian, ne’ebe kontein fundus oioin nebe iha tiha ona, aumenta tan ho Fundos Especiais (Fundo Infraestrutura no Fundo de Dezenvolvimento Capital Humano). Ho existensia funfos espesiais ne’e, halo  situasaun grave liu tan, tanba laiha informasaun detalhu konaba atu gasta los ba saida. Ke devia Tribunal Recurso sumba tiha ka pronuncia inkonstitusionalidade Fundus hirak ne’e, wainhira simu pedidu Fiscalizacao Preventiva da Constitucionalidade ba Lei OGE 2011 nian, husi Presidente da Republica. Nune’e, karik bele evita mosu tan situasaun hanesan, iha Konta Geral Estadu 2011 nian.

Ne’e  hanesan Tribunal Recurso hatudu inkonsistensia uitoan iha sira nia opiniaun ka desizaun konaba materia hanesan. Iha parte ida sira preokupa ho situasoens ne’ebe eventualmente bele hamosu inkonstitusionalidade, iha parte seluk, Tribunal ida ne’e duni ho juises hanesan, ba situasaun hanesan pronuncia buat seluk fali.

Sr. Presidente,

Distintus Deputadus,

Povu Timor-Leste tomak,

Tuir prinsipiu konaba dever de responsabilizasaun ne’ebe gestor tomak  iha fatin hotu-hotu hahi’I, katak membros orgauns ne’ebe hola desizaun iha obrigasaun tomak atu presta kontas no responsabiliza ba sira nia hahalok gestionariu, inklui mos wainhira buat ruma lao lalos, simu sansaun pekuniaria no hola responsabilidade politika.

Se Governu aponta falhannsu no frakezas ne’ebe Tribunal indentifika ona, no implementa rekomendasoens iha Conta Geral 2009 nian, Governu bele halo prestasaun kontas 2010 ho kualidade diak liu, no ajuda Governu hadia diak liu gestaun osan povu nian. Nune’e bele evita maximu mal gastus, gasta arbiru, korupsaun, no ikus bele hetan resultadu diak liu tuir nesesidade povu nian. Maibe, hanesan tribunal hatete ona, situasaun la melhora ka nafatin hela.

Se hanesan ne’e, Se maka bele assume responsabilidade ba situasaun hirak ne’e se laos Sua Exelencia Sr. Xanana Gusmao ho nia Ministra Finansas.

Antes hakotu, hau hakarak hatete, katak Bankada FRETILIN simu relatoriu hosi Komisaun C Parlamentu Nasional nian, no apoia nia rekomendasoens tomak, no sei buka atu aumenta rekomendasoens liu hosi resolusaun ruma ne’ebe ami prepara ona, no tuir mai sei apresenta ba meja atu hetan diskusaun molok hakotu debate ohin loron nian. Tanba ami hanoin katak iha buat barak ne’ebe Tribunal de Recurso no auditoria identifika, ne’ebe presiza duni atensaun maka’as no iha  nia segimentu.

Mak ne’e deit.

Obrigadu!!!

Aniceto Guterres, Chefe da Bancada