KOMUNIKADU: Estrutura Partidu FRETILIN tomak apoia Lu Olo ba Presidenti RDTL

FRETILIN

KOMUNIKADU BA IMPRENSA

Dili, 27 Novembru 2011

Estrutura Partidu FRETILIN tomak apoia Lu Olo ba Presidenti RDTL

Enkontru Comite Central FRETILIN nian neebe halau ohin iha fatin Madres Canossianas nian iha Becora, ho partisipasaun husi estruturas Komisaun Politika Distrital 13 no coordenadores husi sub-distritais 65, deside atu fo apoiu tomak ba Prezidente FRETILIN Francisco Guterres Lu Olo nudar partidu nee nia kandidatu ba Prezidente RDTL iha eleisaun 2012, dehan Adjuntu Secretariu Geral FRETILIN nian Jose Reis.

“Prezidente Lu-Olo agradese no senti honrado ba apoiu makas neebe nia simu ohin husi kuadrus FRETILIN tomak neebe deklara sira nia apoiu ba nia Kandidatura ba Prezidente Republika iha enkontru CCF nee. Maibe Prezidente Lu-Olo husu ba CCF no militantes no kuadrus hotuhotu atu fo tempu semana rua ba nia atu pondera, hamutuk ho secretario geral FRETILIN nian, kestoens balun neebe iha relevansia ba interese nasional molok nia anunsia ninian kandidatura ba Prezidente Republkika iha eleisaun 2012,” Reis affirma.

“Reuniaun CCF ohin desidi mos, no lideransa FRETILIN hakarak kuadrus tomak FRETILIN neebe partisipa iha reuniaun CCF nian nee atu realsa ba militantes FRETILIN hotuhotu iha base, katak se se deit mak atu sai candidato FRETILIN nian iha eleisaun ba presidenti republika iha 2012 sei lori bandeira FRETILIN nian,” nia hatutan.

Ba informasaun tan dere ba Jose Reis, Adjunto Secretario Geral FRETILIN  iha 734 1505.