ORGANIZAÇÃO POPULAR DA MULHER TIMOR
OPMT
KOMEMORAÇÃO LORON FETO INTERNASIONAL
Atu komemora loron 8 fulan Marsu, OPMT hakarak hato’o felisitasaun ba Feto maluk hotu-hotu iha organizasaun no iha komunidadi, iha Timor-Leste no iha mundu tomak, em espesial ba membru OPMT sira iha fatin hotu-hotu hodi haksolok hamutuk iha loron ida ne’ebe FETO HANESAN SER UMANU, hetan rekoñesimentu ba nia direitu hanesan ho mane iha mundu internasional.
Iha loron 28 fulan Agostu 1975, molok Organizasaun Nasoens Unidas rekoñese direitu ba Feto, FRETILIN hahu harí ona OPMT hanesan Organizasaun Feto Pioneira atu halibur no hakbiit feto timor hotu-hotu hodi defende nia direitu no partisipa diak liu tan, hamutuk ho nia mane maluk sira, iha luta ba libertasaun nasional.
Istória hatudu ona katak Feto Timor, Feto brani no aswain duni ne’ebe hatene asumi nia responsabilidadi iha konjuntura hotu-hotu liu husi dalan ne’ebe naruk no difísil tebes.
Atu fó liu énfaze ba loron ida ne’e, OPMT hakarak atu hato’o komunikadu hanesan tuir mai :
a. Konsidera katak OPMT hanesan organizasaun masa no patrimóniu Partidu FRETILIN nian, fó apoiu tomak ba kandidatu FRETILIN ba eleisaun Prezidenti Repúblika períodu 2012-2017 Kamarada Dr. Francisco Guterres ‘Lú-Olo’
b. Konsidera katak, duranti atividadi kampaña eleisaun prezidensial, OPMT deteta no rejista atitudi, deklarasaun no uzu polítiku husi ema balu ne’ebe lori naran OPMT hodi halo adezaun no fó apoiu ba kandidatu seluk
c. Konsidera mós katak atitudi no hahalok hanesan temi iha alínea b. hanesan atitudi no hahalok ema indivíduo (oknum), la’os organizasaun tanba latuir prinsípiu orientasaun polítika OPMT ne’ebe haktuir ona iha Despaxu Sekretária Jeral OPMT nr. 03/GSG-OPMT/II/2012, loron 8 fulan Fevereiru 2012.
Nune’e, liu husi oportunidadi ida ne’e, Diresaun no Estrutura Nasional OPMT hakarak:
1. Louva Kandidatu Kamarada Dr. Francisco Guterres ‘Lú-Olo’ nia Komprimisu Eleitoral ne’ebe detalladu no forte iha sentidu buka defende no valoriza feto tomak nia direitu no ita nia partisipasaun diak liu tan, hamutuk ho mane maluk sira iha prosesu dezenvolvimentu nasional.
2. Kondena no repudia maka’as atitudi no hahalok ema ne’ebe deit mak halo aproveitamentu polítiku husi organizasaun istóriku ida ne’e ba interese indivíduo ka grupu.
3. Apela ba Estrutura Sub-Nasional no membru OPMT sira tomak atu matan moris neon nain ba manobra polítika hirak ne’ebe hakarak lansa konfuzaun no prejudika ita nia organizasaun iha períodu kampaña.
4. Hametin unidadi hodi reafirma no redobra nia konfiansa polítika ba FRETILIN no servisu maka’as ba susesu Kamarada Dr. Francisco Guterres ‘Lú-Olo’ sai Prezidenti Repúblika ba Povu tomak.
Viva Kamarada Dr. Francisco Guterres ‘Lú-Olo’!
Viva Feto Timor! Viva Feto iha mundu tomak!
A luta kontinua! A vitória é serta!
Dili, 8 Marsu 2012
Sekretária Jeral,
Lourdes Maria Alves Araújo
BA INFORMASAUN ADISIONAL DERE BA AICHA BASSAREWAN IHA 727 0156
No comments:
Post a Comment