DEKLARASAUN POLITIKA
BANCADA PARLAMENTAR FRETILIN
31 May 2010
FRETILIN HUSU KOMANDANTE GERAL PNTL ATU LABELE HALO POVO ERMERA TAUK TAN
Sr Presidenti Parlamento Nasional,
Illustres Deputados,
Povo Maubere tomak.
Bancada FRETILIN hakarak deklara nia preokupasaun relasiona ho polemika ne’ebe mosu iha semana kotuk kona ba lia los situasaun seguransa iha distritu Ermera.
Desde fulan Maiu nia klaran mak ita hotu rona Komandante Geral PNTL nian, Longuinhos Monteiro deklara katak iha problema ho seguransa iha distritu Ermera.
Iha 19 Maiu 2010, Jornal Nasional Diario publika artigu ida tuir entrevista ho Sr Monteiro kona ba existensia grupus armados iha Distritu Ermera, ho titulo “Grupu Armado Illegal Iha Ermera ho Kilat 11”. Iha entrevista nee Sr Monteiro koalia ho konfiansa katak grupu illegal ema 13 mobiliza iha area Siboni, Bobonaro, iha areas rurais izolado. Nia temi katak “sira mos halo manobra politika kampanha oin-oin kona ba sira nia objectivu,” no “grupu ida ilegalmente organizadu halao actividade terrorizmu ho kilat iha liman hodi alkansa sira nia objectivu.” Nia hatutan tan ho konfiansa katak, “ami hatene ona sira iha neebe, ita nia ema agora serku hela sira.”
Bancada FRETILIN lamenta tebes ho deklarasoens alarmistas hirak nee husi Komandante Geral PNTL nian, Sr Longuinhos Monteiro kona ba situasaun seguransa Ermera neebe hamosu preokupasaun no tauk iha komunidade Ermera nia leet. Ho deklarasoens hirak nee Povo sente la hakmatek no preokupa ba sira no sira nia familia nia seguransa.
Maibe laos deit Povo baibain mak preokupa, tamba halo mos deputada husi bloko AMP, Sra Maria Exposto mos hakfodak no fo sai nia no povo Ermera nia preokupasaun iha uma fukun ida nee. Maibe se ita hare ba deklarasoens husi Komandante Geral PNTL nian iha tempo neeba, se mak atu preokupa. Tamba Komandante Geral temi “grupus armados, “grupus ilegalmente organizado”, “manobra politika oin-oin” no “sira halo actividade terrorizmu” entaun razoavel ba ema se se deit atu konklui katak Ermera existe iha perigu laran, liliu iha zona izoladas.
Tuir ami nia hare, kampanha alarmismo nee halao ho intensidade tan tuir mai bainhira Komandante Geral deklara katak iha insidente “tiru malu iha horas tolu nia laran” entre PNTL nia elementus no grupu armado ida.
Iha entrevista neebe publika husi Centro Jornalismu Investigativu Timor-Leste, Komandamnte Geral deklara tan katak: “Grupu ilagais iha material funu nian ne’ebe mai husi kilat ne’ebe forsa Indonezia uja antes de 1999”, no “Ema eis militar 745 ida, reforma tiha ona, nia mak agora lidera grupo armadu ida iha Ermera, sira iha kilat, maibe ami sei aproxima sira.”
Iha tempo neeba bancada FRETILIN hahu kestiona ona deklarasoens neebe Komandante Geral PNTL nian halo. Deputados FRETILIN neebe ba too fatin neeba no iha kontaktu ho Povo iha neeba, ho PNTL iha neeba, no agentes seguransa no defesa estadu RDTL nian, hamutuk ho ema seluk hahu kestiona deklarasoens hirak neeba husi Komandante Geral neebe ita bele dehan opinta scenario de inseguransa e potensial instabildade iha
Distritu Ermera.
Sr Presidenti,
Illustres Deputados.
Ita hotu akompanha kampanha informasaun publika ida nee, no ita mos hahu preokupa kona ba situasaun iha distritu Ermera, tamba ita hotu hakarak mak Povo moris hakmatek no seguru. Liliu ita hotu lakoi Povo Ermera sai fali alvo ba instabilidade no konflitu hanesan grupus balun halo iha 2006, 2007 no 2008. Desde estadu sitio remata iha 2008, situasaun iha distritu Ermera sai estavel no diak ba bebeik.
Iha tinan kotuk mos elesaun suco nian konsegue lao ho diak no iha ambiente politiku livre no tolerante tebes tamba la iha amesa husi grupu ruma hanesan uluk. Tamba nee ita hotu preokupa ho informasaun neebe mosu tamba Povo Ermera merese paz no estabilidade hanesan distritos seluk seluk inklui ita hotu iha Dili.
Maibe iha sexta feira liu ba, loron 28 Maiu 2010, jornal nasional Timor Post publika entrevista ho Komandante PNTL distritu Ermera nian, Mariano Martins Soares, ne’ebe nia rejeita scenario inseguransa neebe Komandanmte Greal PNTL nian pinta iha fulan liu ba nia laran. Nia deklara katak “ilegal sira oin mos hau seidauk hare too ohin loron, tiru malu mos laiha. Keta kama mak nakdoko mak ema iha kapital dehan kilat mak tarutu fali iha Ermera nee.”
Deklarasoens hirak nee klaru tebes no hamosu preokupasaun ba tamba sa mak situasaun tenke lao too iha nee.
Maibe laos deit Komandante Distritu Ermera nian mak rejeita scenario inseguransa neebe Komandante Geral PNTL nian pinta iha fulan liu ba nia laran. Iha sexta feira liu ba Komandante Operasional PNTL, Chefe Superintendente Mateus Fernandes deklara iha Jornal Diario Nasional katak “La iha kilat illegal iha Ermera.”
Nia dehan, “Komunidade halo actividade, hanesan basar faan sira nia sasan, hamnasa sira lasenti hanesan buat neebe ita rona iha Dili, hau husu komandante distritu Ermera maibe nia dehan nia rasik mos la hatene tamba nee mak hau bele dehan situasaun neeba lao didiak tebes.”
Bainhira husu nia kona ba kilat espalha nia dehan: “Hau lakoi koalia buat ida rumores, dala ida tan hau lakoi koalia introduz rumores.”
Admimnistrador sub-distritu Letefoho mos rejeita rumores neebe mosu iha forma de deklarasoens husi Komandante Geral PNTL nian kona ba ema tiru malu ka ema lori kilat ilegal. Nia dehan nune: “Informasaun rumores sira neebe mak ita rona dadauk iha rai laran li-liu Distritu Ermera nee nudar administrador Letefoho hau deklara katak, ida nee hanesan rumores, I ami normal hela, laiha buat ida akontese iha nee.”
Ami no ema seluk barak konkorda totalmente ho elementu responsavel PNTL nian iha distritu rasik nia konfirmasaun katak notisia uluk nee exagerado no alarmista liu. Ita tenke fiar Komandante PNTL distritu nian bainhira nia rejeita totalmente rumores no boatus katak la iha kilat illegal espalha namkari iha distritu Ermera hanesan uluk ema komando geral dehan, no simu nia esklaresimentu katak populasaun keixa
deit mak ema lori katana halo intimidasaun.
Afinal depois de ita rona deklarasoens husi Komandante nai rua iha sexta feira liu ba ita hare katak informasaun neebe Komandante Geral koalia afinal la akontese tuir nia komandante iha distritu no nia komandante operasional rasik nia observasaun iha fatin.
Situasaun hanesan Komandante Distritu no Komandante Operasional PNTL nian deskreve mos bancada FRETILIN konsegue konfirma ho elementus husi orgaun seguransa no defesa estrutura RDTL nian no tuir deputados no lideres FRETILIN nia observasaun iha base.
Tuir Bancada FRETILIN nia hare deklarasoens husi Komandante Geral hatudu irresponsabilidade no attitude ida neebe labele simu husi ema neebe lolos tenke responsavel liu ho informasaun nebee nia fo sai, labele exagera, no tenke sukat lia fuan hodi labele halo povo preokupa no tauk. Lolos nia lia fuan tenke buka maintein seguransa no tulun povo moris halmatek.
FRETILIN preokupa katak alarmismo hanesan ita hotu hare ona kona ba invensaun kazu “ninja” iha distritu Bobonaro no Covalima, neebe hetan kritikas makas husi ONG direitus humanus nian no Provedor Direitus Humanus no Justisa kona ba violasaun ema nia direitus humanus, bele repete fila fali iha Ermera.
FRETILIN preokupa makas ba lalaok ida neebe foin akontese kona ba kazu rumores kilat espalha no tiru malu iha Ermera. Halo ita hanoin fali ba kazu “ninja” nian, tamba hanesan uluk sira hakilar makas ninja namkari hodi justifika operasaun boot no karun tebes iha neeba, resultadu investigasaun no prosesu iha tribunal hatudu katak alarmismo no invensaun ba situasaun inseguransa mak barak liu.
FRETILIN konkorda katak estadu presiza duni halo assaun hasoru kriminal nebe kontra lei, maibe la simu hahalok neebe kria fali paniku boot. Ida nee mak ita tenke kestiona, tamba motivo saida? Tamba Sr Primeiru Ministru de facto atu tuun ba Ermera atu halo kampanha politika iha semana oin ka?
FRETILIN propoen katak Komisaun B tenke solisita presensa membru governu de facto no komandante geral atu bele mai esplika ba Komisaun B situasaun tamba sa mak distritu Ermera bele sai fali alvo ba boatus no rumores iha media internasional husi nivel aas liu iha PNTL nia laran.
Ikus liu Sr Presidenti, informasaun neebe bancada FRETILIN hetan husi nia base iha Distritu Ermera hamosu preokupasaun ho manobras politikas husi elementus balun iha PNTL nia laran. Tuir FRETILIN nia infrormasaun unidades PNTL balun hahu halo reasaun ba fatin neebe FRETILIN mos iha actividade makas. Tuir FRETILIN nia hare, scenario kilat espalhado no grupus armados nee bele fasilmente justifika operasaun seguransa neebe bele hodi halo intimidasaun no preseguisaun politico ba Povo.
FRETILIN preokupa katak kampanha informasaun falsa kona ba kilat espalha no grupus armados illegal bele usa ba intimidasaun politika tamba Sr Monteiro rasik mak temi, katak grupus hirak nee halau “manobras politika oin-oin.”
Iha 2006-2007, Sr Primeiru Ministru de facto publikamente akuza coordenador FRETILIN iha distritu Ermera, Sr Antonio Lima Lima mak fahe kilat. Akuzasoens hirak nee mos sai cruz todan boot ida ba militantes FRETILIN hotu iha distritu Ermera, maske akuzadores sira mak em realidade lori grupus armados ba iha Ermera. Tempo hatudu katak akuzasoens Sr Xanana nia kontra coordenador FRETILIN iha Ermera nee falsu, la los, maibe too ohin loron nia seidauk rekonhese publikamente katak nia aluzasaun sala.
Ho koalia kona ba kilat espalha iha Ermera sempre iha ema neebe temi fali Sr Primeiru Miniostru nia lia fuan neebe uluk nia hodi akuza ami nia Camarada Lima Lima fahe kilat iha Ermera. FRETILIN hanoin katak tempo too ona atu para koalia lia fuan falsu.
FRETILIN hanoin tempo too ona atu Sr Xanana husu desculpa ba Sr Antonio Lima Lima bainhira nia tuun ba halo nia kampanha iha Ermera.
FRETILIN rona dehan Sr Xanana hakarak ba visita abrigu uluk tempo resistensia nian. Abrigu nain ida mak Sr Antonio no abrigu seluk mak iha Sr Durae, Kordenador Komisaun Poliika FRETILIN nian ba Sub-distrital Ermera, Primeiro Ministro de faktu hakarak tama ba abrigu neeb uluk ami nia camaradas sira kehe no harii ho sira nia kosar no terus, maibe husu desculpa tamba hafoir sira nia naran nee labele ka?
Ho deklarasaun ida ami hato’o obrigado wa’in.
Deputado Arsenio Bano
FRETILIN
No comments:
Post a Comment