FRETILIN kestiona kontratu “single source” $7 milloens porto temporario ro'o patrulha F-FDTL ba kompanhia Australiana Lifese Pty Ltd.

FRETILIN

KOMUNIKADU BA IMPRENSA

Dili, 10 Junhu 2010



FRETILIN kestiona kontratu “single source” $7 milloens porto temporario ro'o patrulha F-FDTL ba kompanhia Australiana Lifese Pty Ltd.


Deputadu Bancada FRETILIN no membru komisaun B, Defesa, Seguransa no Relasauns Esterna, Parlamentu Nasional nian Arsenio Bano, foin halo visita ho komisaun B ba porto Hera hodi halo fiskalizasaun ba projetu konstrusaun Porto Provisorio ba ro’o patrulha foun F-FDTL nian, kestiona kontratu ho montante liu US$7 milloens neebe entrega deit ba Kompanhia Australiana maibe seidauk halau too agora.

“Hanesan ita hotu hatene ro'o patrulha rua ba Componente Naval F-FDTL nian, nebe sosa husi China, to'o ona iha Porto Hera maibe, porto Hera sedauk iha kondisaun. Tuir ami nia konesimentu governu fo kontratu ba empreza Australiana, LIFESE Engineering Co, laliu tender, empresa neebe eis assesora Emilia Pires nian Sra. Ines Almeida mos involve iha laran hafoin hakotu nia kontrato hanesan assesora ba Ministerio das
Finansas. Kontratu nee ho total osan US$7 milloens atu halo konstrusaun ba porto provisiorio iha Hera ho luan 120m2 x 6m2, maibe too agora obras sedauk hahu.

“No mos, ami kestiona montante US$7 milloens liu, atu halo deit porto provisorio ida ba ro’o rua nee, agora ro’o to’o mai tiha ona maibe serbisu sedauk hahu.  Ita hakfodak tan bainhira ita halo komparasaun entre obras iha kontratu ida nee tamba reabilitasaun ba porto Dili ho 120m2 X 20m2 nebee halo nudar obras permanente, halo deit ho total osan US$9 milhoes.  Nee halo ita suspeita buat ruma ona, liliu tamba tender la iha, no ema neebe influensia ho bo’ot iha governu de facto ida nee mak hetan kontratu sem iha tender,” Bano kestiona.

Bano dehan mos katak, ezemplo porto Hera hatudu mai ita katak Guvernu De Faktu lahatene duni halo planu, hatene sosa ro'o petrulha ba F-FDTL mas failha atu prepara kondisaun porto nebe to'o ikus hatudu deit Empreza Australiana LIFESE Engineering Co, hodi halo konstrusaun nee. Tuir Bano ida nee hatudu inkapsidade gestaun governu de facto nee nian tamba ro’o rua nee enkomenda tiha ona liu tinan ida ho balun maibe fulan rua liu ba deit mak governu de facto foin hader buka prepara simu ro’o rua nee.

“Nee  mos sai hanesan desastre pakote referendo, no pakote emergensia, no tuir mai disastre neebe hein ita hotu, Pakote Dezenvolvimentu. Hanesan Secretariu Estadu de facto Obras Publikas nian foin confirma, 60% Projeto Pakote Referendu mak la iha kulidade.  Hanesan mos projetu irrigasaun Bebui nian.  Hanesan projetu oleo pesado neebe la lao.  Ida nee most ita hare la lao, no atu gasta osan baral tebes kompara ho obras neebe halo iha porto Dili uluk,” Bano reforsa.

“Ami husu atu governu de facto explika lalais projetu porto Hera nee nia detalhus.  Tenke explika tamba sa mak osan boot hanesan nee, tamba sa mak la halo uluk porto molok ro sira too iha Timor-Leste, tamba sa mak prossesu la liu tender, no tamba sa mak obras seidauk lao hafoin kontrato entrega tiha ona? Nee importante atu ita hotu bele hetan transparensia,” Bano taka.

Ba informasaun tan dere ba Deputadu Arsenio Bano iha 741 9505