FRETILIN konkorda ho PSD: Sr. Xanana halo kampanha politika, laos konsulta publika

FRETILIN

KOMUNIKADU BA IMPRENSA

Dili, 9 Junhu 2010

FRETILIN konkorda ho PSD: Sr. Xanana halo kampanha politika, laos konsulta publika

Vice Presidenti partidu historiku FRETILIN, no deputadu iha Parlamento Nasional, Sr. Arsenio Bano ohin deklara katak FRETILIN konkorda ho deklarasaun husi Deputada PSD nian, Sra. Maria Exposto, katak Sr. Xanana Gusmao nia visita ba suco Aiseo, Distritu Ermera nee laos consulta publika maibe “kampanha partidu ninian rasik.”

Sr Bano dehan katak lia fuan neebe Sra Exposta koalia tuir Jornal Diario Nacional nia reportagem iha edisaun ohin 9 Junhu nian, nee lia los, no hanesan FRETILIN mos koalia ona desde Sr Xanana hahu nia kampanha iha fulan Abril liu ba iha distritu Lautem. 

“Hori nia hahu kedas FRETILIN nia militante iha base, fo hatene mai ami katak Sr. Xanana nia visitas hirak neeba laos consulta publica maibe kampanha politika.  Tamba nee mos ami deklara kedas iha Deklarasaun Politika iha parlamento nasional ami nia preokupasaun katak Sr Xanana lori osan estadu nian, osan Povo nian, hodi halo kampanha politika, maibe hanaran bosok nudar consulta publika,” deklara Bano.

Iha bancada FRETILIN nia deklarasaun politika iha loron 26 Abril 2010, ho Titulu: “Sr. Xanana Abuza Orsamentu Estadu Halo Pre-Kampanha”, bancada FRETILIN dehan:

'Iha semana liu ba ita hotu testemunha espetakulu iha distritu Lautem neebe Sr Primeiru Ministru de facto hanaran “consulta publica” maibe iha liu mak karakter “kampanha politika”.  Maibe hanesan populasaun barak neebe atende dehan, em ves de “consulta publika” sai fali “dictatorial publiku” tamba sorumutuk konsiste ho Sr Primeiru Ministru de facto hakilar ba sira ba horas rua ka tolu, depois tuir mai sira iha deit minutu ida ka rua atu bele fo sai sira nia hanoin, maske sira mak tahan nia kleur liu.'

Tuir Jornal Diario Sra. Maria Exposto dehan kona ba Sr. Xanana nia proposta visita ba Ermera iha loron 12 Junhu oin mai, “Se karik ba halo konsultasaun ba Planu Estrategiku Dezenvolvimentu Nasional (PEDN) entaun ba iha sub-distritu atu envolve povo hotu hotu I povo sei la sente diskriminadu, maibe kuandu ba suku ida, kerdijer ke Primeiru Ministru la ba halo konsultasaun PEDN, maibe ba halo kampanha partidu ninian rasik, ida nee povo nia preokupasaun nos ai hau nia preokupasaun.”

Nia hatutan, “hau nudar representante povo hau preokupa bainhira povo preokupa, nee duni atu ba koalia interese nasional tenki envolve ema hotu hotu iha laran, entidade se deit labele deit konvida deiot husi grupu ida ou partidu ida I konvida diretamente Primeiru Ministru ba individual iha suku ida, ida nee kerdijer ba representa ona Presidenti partidu ida hodi ba koalia interese partidu nian iha suku neeba.”

“FRETILIN konkorda saratus persent ho Sra. Exposto no povo Ermera nia preokupasaun, tamba Sr Xanana hakarak halo kampanha mana simpatia husi povo atu halo pressaun ba ema hotu hotu halo tuir nia hakarak kona ba plano estrategiku, hakarak pressaun muda lei fundu mina rai, gasta osan barak, maibe lakoi loke aan atu hetan consensu nasional.  

"Maibe porblema mak nia lori gasta osan estadu nian boot tebes, tamba ita hare kareta neebe akompanha laos itoan, liu careta 70, polisia mos barak, funsionario publiku mos barak. Tamba ema hotu hotu simu per diem no tenke selu mina no hahan, entaun nee kampanha politika karun tebes ho osan Povo nian.  Tuir ami nia hare nee labele, no ami sei responsabiliza Sr Xanana ba nia hahalok ida nee.  Ami hein deit katak bainhira ami buka responsabiliza Sr. Xanana, partidu balun iha AMP mos sei apoia ami,” Bano dehan.   

BA INFORMASAUN TAN DERE BA DEPUTADO ARSENIO BANO: 741 9505