Timor Post: Monteiro Tama Iha Tim Negosiator, Luta Hamutuk Kestiona Independensia

TIMOR POST


21 Junhu 2010


"Monteiro Tama Iha Tim Negosiator,"

"Luta Hamutuk Kestiona Independensia"

DILI – Luta Hamutuk kestiona independensia Francisco Monteiro hanesan xefe ba asuntu negosiasaun tasi Timor tanba hetan bolsu estudu doutoramentu (S3) husi kompañia Woodside iha universidade Adelaide – Australia.

“Hau hanoin ema bele deskonfia nia (Francisco Monteiro – red) la – independente, “ katak direitór Luta Hamutuk Mericio Akara ba Timor Post, foin lalais ne’e iha Farol. “Tempo ne’ebé hanesan nia mos hetan bolsu de estudu husi Woodside”.

Mericio Akara reafirma, konflitu interese bele mosu tanba Francisco Monteiro tenki obedese ba instituisaun rua, ida hakarak defende direitus Timor oan nian maibe seluk maka simu osan husi ema hodi selu nia eskola.

Tuir nia, atu halo negosiasaun konaba mina no gas kada interministerial diak liu tenki involve mos Ministru Negosio Estranjeiro Zacarias Albano da Costa.

Akara realsa dehan, hakarak ka lakohi diplimata primeiru reprejenta husi Timor maka Ministru Negosio Estranjeiru laos Sekretariu Estadu Rekursu Naturais ho Francisco Monteiro maka halo fali negosiasaun.

Mesmu nune’e, Mericio Akara rekonhese kapasidade Monteiro iha termus tekniku tanba konhesementu estuda iha area geologia.

Luta Hamutuk sujere, atu halo negosiasaun tenki mai husi ema ne’ebé iha konhesementu ba area relasaun internasional no esperensia halo negosiasaun ba kompañia mina no gas nomos esperensia iha area bisnis nian.

Akara hateten, Francisco Monteiro laiha esperensia halo negosiasaun entre nasaun ho kompañia.

Ema ne’ebé iha ona esperensia halo negosiasaun, tuir observasaun Luta Hamutuk mak eis Ministru Rekursu Naturais Jose Texeira atual deputadu husi bankada Fretilin.

Jose Texeira no eis Primeiru Ministru Mari Alkatiri, tuir Akara katak, iha ona esperensia ba negosiasaun Bayu Undan no Greater Sun Rise ne’ebé halo kontratu 50 % ba Timor Leste no 50 % ba Australia.

Tanba ne’e, Mericio Akara afirma hodi husu ba Francisco Monteiro atu lalika bosok ba publiko tanba dadus hatudu momos katak Francisco hasai fotografia woodside apoiu duni atu hasai nia estudu S3 iha Australia. Diak liu Francisco deklara katak hetan duni apoiu husi woodside, “ Akara akresenta tenik.

Akara hatutan dehan, governu TL tenki haforsa tan tim negositor tanba LH pesimista tim negosiator ne’ebé involve Francisco Monteiro sei la – susesu. (imelda mota)