PARLAMENTO NACIONAL
BANCADA PARLAMENTAR DE FRETILIN
----------------------------------------------------------------------------------
Deklarasaun Politika
Sr Presidente,
Ilustres Deputadus,
Povu Timor-Leste,
Mauberes no Biuberes.
Ohin loron ba dala rua ita tama ba Semana Santa, tempu ba rekolimentu, tempu ba meditasaun no tempu ba reflesaun ema maioria povu TL nebee katoliku hodi prepara aan atu simu loron Ressureisaun Nain nian. Ba refleksaun ita hotu nian no ba komponente tomak Estadu nian, Bankada FRETILIN tau kestaun ida importante ba ita hotu nudar Estadu Direitu no Demokratiku.
Dala ida tan ita hotu iha uma fukun ida nee, uma demokrasia, uma povu nian, ami hanoin ita hotu iha hanoin ida deit hodi preokupa ba atuasaun lamentavel hosi Xefe Governu de facto SE Sr Xanana Gusmao nian.
Atuasaun ida nebee afecta ita nia reputasaun nudar nasaun soberanu, ita nia kapasidade atu defende ita nia soberania no osan povo nian nebee governu kaer. Bancada FRETILIN refere ba buat ida nebee ami konsidera desastre ba prosesu kontratu Construsaun Porto Naval Temporario iha Hera nebee presiza ba ita nia forsa defesa componente naval bele halao nia operasaun nudar defensor ba ita nia soberania no ita nia riku soin nebee iha ita nia tasi laran. Porto Naval nebee iha nesesidade urgente atu harii maibee liu ona tinan ida resin seidauk remata tanba konsekuensia hosi politika “halo lalais, maibee halo laloos”.
Atu hahu deklarasaun ida nee, Bancada FRETILIN hakarak refere ba reportagem iha media nasional, nebee temi SE Sr Xanana Gusmao nia lia fuan rasik.
Notisia iha Jornal Nasional STL nebee publika iha loron 15 Abril ba entrevista nebee SE Xanana Gusmao foo:
"Primeiru Ministru, Kay Rala Xanana Gusmão rekoinese nia sala iha prosesu inisiu ba konstrusaun Portu Hera. Tamba Xefe Governu nee la lee didiak kontratu nebee asina ho Kompania Lifese Ingeneering Australia."
"PM Xanana esplika, iha kontratu nebee asina tuir lei Australia nian dehan loron sanulu resin haat tenki selu ona, maibe see liu prazu entaun tenki multa."
SE Xanana Gusmao nia lia fuan rasik hakerek iha media nee hateten:
“Hau bele dehan katak hau sala uitoan, rekoñese duni. Atu too tribunal ka too iha nebee, hau ba. Kompania Australianu mos atu tau tan hau iha tribunal, hau dehan ba. Bolu ba Sidney mos hau ba. Jakarta mos hau ba ona, sa-tan ba Sidney ida nebee kondisaun diak liu, Direitus Humanus diak liu. Hau kala moris iha kadeia kala diak liu.”
Tuir reportagem nee, SE Xanana Gusmao haktuir ho explikasaun katak problema nee mosu tanba nia la lee kontratu nebee nia assina. Kontratu ida ho valor total liu US$7 milhoens. Hanesan nia rasik explika: “Hau nia Ingles nee ida be, hau hare o, o diak ka lae, nebee hau fiar hela ba tekniku ida nebee maka osan boot, manan liu hau dala hira kedas, nebee ami tau iha STA, nia prepara tiha kontratu nee. Afinal kontratu nee lei Australiana. No fim problema ona, hau haree, lei Australiana.”
Bancada FRETILIN la presiza explika detalhadamente situasaun grave nebee mosu, liu husi SE Sr Xanana nia rekonhesimentu rasik katak nia “la lee kontratu nebee nia assina” no katak iha artigu balu iha kontratu nia laran nebee fo todan boot tebes ba Estadu RDTL no ba Povu Timor-Leste.
Deskulpa, maibee ami hakarak foo hanoin nafatin ba promesa barak SE Xanana Gusmao nian iha kampanha eleitoral kona ba boa governasaun iha governasaun foun, nebee sei domina nia governasaun hanesan “nauk lima pulu cent sai.”
Sr Presidente, ho konfisaun ida nebee SE Sr Xanana halo katak nia maka sala, tamba la lee kontratu nebee nia assina, nee ita bele dehan, Loke Kuak Boot Tebes neebe agora atu taka susar tebes, no sei lori todan boot ba Povu Timor-Leste tamba tenki selu multa boot liu dollar milhaun ida. Nee maka ita bele dehan, loke kuak hatene, maibee taka kuak la hatene.
Maibee SE Sr Xanana ho nia governasaun tomak hanesan baibain la simu responsabilidade nebee tenki simu bainhira sala, buka deit kambing hitam hodi dun sala ba ema seluk hanesan baibain buka kambing hitam atu taka fali kuak nebee SE Sr Xanana maka hatama Estadu no Povu Timor Leste iha laran, tanba hanesan Bankacada FRETILIN dehan beibeik ba politika: “Halo lalais, maibee halo la loos”, hanesan kontratu mos la lee, assina deit.
Ita tenki koalia momoos katak hahalok hosi Xefe Governu ida nee grave no seriu tebes, laos deit atu foti iha Parlamentu Nasional ka iha media, maibee merese hetan sensura formal. Tamba tuir SE Sr Xanana nia lia fuan rasik, sala boot liu bainhira nia assina kontratu basea ba lei Australia nian no foo knar ba Tribunal Australia nian atu hakotu ba kazu ruma.
Nia dehan tan nunee:
“Hau sei dehan, multa nee ita sei diskuti. Sira ameasa dehan, lori ba tribunal, hau dehan lori ba, laos tribunal Dili lae. Tribunal Internasional mai iha nee ami sei koalia, ida ne’e maka hau informa mos ba PR. Se maka sala, hau dehan hau sala duni, tanba hau la lee. Hau fiar tiha hanoin dehan buat nee liu ona, no fim kuandu ema karega fali ita, maka lee didiak fali, mate ona tanba asina sala tiha ona.”
SE Sr Xanana ho nia koalia halimar hodi buka soe rai rahun ba povu nia matan, no atu hetan simpatia dehan atu ba tribunal iha Australia, tama comarca, nee la loos, nee sala. Nee laos kazu penal maibee cazu civil, no iha rain hanesan Australia ema la tama ba Comarca tamba disputa civil kona ba kontratu hanesan ida nee.
Maibee Bancada FRETILIN tenki husu mos nunee ba kontratu ka akordu hirak nebee mak SE Sr Xanana nudar Xefe Governu de facto assina neebe “la lee didiak” no ita seidauk hatene too problema mosu loron ruma, liuliu ba kontratu konstrusaun Sentral Elektriku Olios Pesadus, projetu sosa Roho Patrulha no Projetu rehabilitasaun Ponte Loes nebee kompanhia PT Istaka Karya nebee hetan kontratu, oras nee hetan falensia hasoru hela prosesu iha tribunal Indonesio.
Parlamentu Nasional sei hein resultadu auditoria ba Sentral Olio Pesado nebee Parlamentu Nasional desisi ho resolusaun ida hodi husu ba Governu atu husu auditoria eksterna nebee tenki tama ona iha Parlamentu Nasional iha loron 31 Marsu 2011.
Sr Presidente, tuir informasaun hosi kompanhia sira nebee envolve iha prosesu sosa gerador husi Wartsila hateten estadu Timor-Leste mos tenki selu osan boot liu gerador sira nia folin loloos tamba iha mos komponente multa iha folin laran. Tamba nee mak governu tenki loke ba publiku tomak kona mos ba kontratu sosa gerador foun. Ita labele fiar deit hanesan Sr Xanana Gusmao fiar deit ba acessor no la lee kontratu. Nee labele, tamba nee laos sistema governasaun ida diak ba ita nia Estadu.
Iha ita nia rain agora ita haree katak buat hotu nebee lao sala ho governasaun, ho adminiustrasaun publiku, mudansa klimatika maka sala. Maibee ida nee klaru katak laos mudansa klimatika, maibe resultadu “mudansa politika” nebee lori todan mai rai no povo ida nee.
Sr Xanana Gusmao koko buka taka kuak nebee nia rasik halo maibee loke kuak foun fali. Bainhira nia dehan nunee:
“Ita nia sistema deit foin book. Hau fo ezemplu Kompania Marina Enterprise tinan rua kedas seidauk selu. Ema sira nee dehan 14 dias mak liu, ida nee selu ona multa. Depois sira ba too iha nebaa, tanba problema rai, ita ba iha nebaa. See ita nian karik ita dehan oin nusaa. Agora ema mai ho standar ema nian, ida nebaa impede uitouan nee konta ona hau maka selu. Hau dehan labuat ida pasiensia, nebee hau para, ami sei diskuti selu halo nusaa, hau selu tau fali.”
Bancada FRETILIN hakarak husu mos responsabilizasaun ba “tinan rua mos seidauk selu” ba kompanhia ida nee no kompanhia sira seluk. Ami rona Deputadu balu kestiona katak projetu PDD mos balu seidauk selu. Karik tamba mudansa klimatika maka sira mos la simu too ohin loron.
SE Sr Xanana esklarese mos katak tuir nia haree:
“La iha ida santu ba ida nee. Hau rekoinese sala, tanba hau assina, nudar Ministru Defeza. Hau konfessa hau sala, sala tanba ita fiar nee, ita fiar buat hotu-hotu ita assina tiha maka Desimu Kintu Dia maka ita laselu maka dehan multa, haree ba hau assina tiha ona.”
“Enkuantu buat sira nee la lao, see iha Timor ida hau tenki selu. Nee maka hau dehan too ona. Saida maka hau atu selu nee selu ona ba para, lalika pusing kepala ho ita boot. Material iha nee, atu selu karik dehan selu multa, multa tamba la kumpri prazus.”
Tuir lei kontratui nebee SE Sr xanana assina maibee la lee, Estadu Timor-Leste maka sai kanek. Nee signifika, ita seidauk hatene loloos todan nee oinsa no too iha nebee. Maibee todan ida maka nee, investor sira sei la fiar tan iha ita nudar Estadu. Iha konfiansa katak akordus nebee ita halo ho sira metin ka lae metin. Implikasaun barak maka mosu ona tamba admissaun ida hanesan nee.
Sr Presidente,
Povu Timor-Leste.
Bancada FRETILIN sente preokupadu tebes ho factus nebee mosu katak Estadu Timor-Leste sei simu multa todan liu dollar milhaun ida, tamba deit SE Sr Xanana Gusmao PM de facto la lee termu kontratu, no fiar deit ba acessor.
Bankada FRETILIN apela ba ita hotu idaidak iha Uma Fukun ida nee nia konsiensia politika no ita nia responsabilidade ba Povu no Nasaun, ba aktu ida nebee merese atensaun hosi Uma Fukun Povu nian ida nee, nudar orgaun soberania Estadu nebee simu knar konstituisaun nian atu fiskaliza governu, merese duni hetan posisaun ida makaas hodi halo sensura ida forte ba pratika negligencia hosi SE Sr Xanana Gusmao PM de facto Republika Demokratika Timor Leste nian, nebee lori konsekuensia boot hodi halo todan ba kofre Estadu nian.
Dili, 19 de Abril de 2011
Bancada Parlamentar de FRETILIN,
No comments:
Post a Comment