FRETILIN.Media

2010-2020: DECADE OF PEACE, STABILITY & DEVELOPMENT/DEKADA PAZ, ESTABILIDADE NO DEZENVOLVIMENTU

Media service of the FRETILIN party.
Servisu media partidu FRETILIN nian.

Contacts/contactus:

Deputadu Jose Teixeira
Tel. Mobile: +670 728 7080
Email: fretilin.media@gmail.com

Thursday, December 15, 2011

DEKLARASAUN HUSI PRESIDENTI PARTIDU FRETILIN CAMARADA FRANCISCO GUTERRES LU OLO


DEKLARASAUN HUSI PRESIDENTI PARTIDU FRETILIN
CAMARADA FRANCISCO GUTERRES LU OLO
NEEBE TRANSMITE IHA RADIO MAUBERE FM OHIN
TUKU 7:00, Kinta-Feira, 15 Dezembru 2011

Camaradas Biuberes no Mauberes.

Hanesan ita hotu akompanha iha fulan hirak liu ba, iha maluk Timor oan balun neebe deklara aan ona nudar candidato ba Presidenti Republika RDTL nian iha eleisaun tinan oin mai.

Iha espekulasaun barak hori tempo maluk balun hahu deklara aan nudar candidato se mak candidatu neebe FRETILIN nudar partidu bot sei apoia.

Iha reuniaun Comissaun Politica Nasional iha loron 30 Setembru tinan nee, CPN desidi atu deklara katak: “sedu liu atu FRETILIN nudar partidu desidi nia candidatu, no sei foti desizaun bainhira data eleisaun ba Presidenti Republika iha 2012 formalmente iha ona.  Iha tempo neeba mak FRETILIN sei halo nia desizaun no anunsia ba publiku.”

CPN desidi mos atu apela dala ida tan ba kuadrus no militantes atu hein desizaun CPN nian, no atu labele monu ba se se deit nia manobras hodi foti apoiu husi kuadrus no militantes iha base ba candidato ida nee ka ida neeba. Husu kuadrus no militantes hein, tamba presiza tempo mos membrus CPN atu mobiliza ba distritus hodi esklarese desizaun CPN nian no consulta ho estruturas iha distritus kona ba prosesu atu hili candidato FRETILIN nian.

Prosesu consulta ho kuadrus no militantes FRETILIN iha base halau duni, no iha loron 27 Novembru liu ba, Comite Central FRETILIN halau reunaiun alargadu ho estruturas, neebe envolve mos estruturas Komisaun Politika Distrital 13 no coordenadores husi sub-distritais 65. Iha reuniaun ida nee, kuadrus nasionais no kuadrus husi distritus no sub ditritus neebe presente deside atu fo apoiu tomak ba Prezidente FRETILIN Francisco Guterres Lu Olo nudar partidu nian kandidatu ba 
Prezidente RDTL iha eleisaun 2012.

Hanesan hau dehan iha tempo neeba, hau agradese no senti honrado ba apoiu makas neebe hau simu iha tempo neeba husi kuadrus FRETILIN tomak neebe deklara sira nia apoiu ba hau nia Kandidatura ba Prezidente Republika iha enkontru CCF nee.

Maibe hau husu ba CCF no kuadrus no militantes hotuhotu atu fo tempu semana rua ba hau atu pondera, hamutuk ho camarada secretario geral FRETILIN nian, kestoens balun neebe iha relevansia ba interese nasional molok hau anunsia hau nia kandidatura ba Prezidente Republkika iha eleisaun 2012.

Ohin loron 15 Dezembru, Presidenti Republika actual, Dr. Jose Ramos-Horta, halau encontro hodi consulta ho partidus politikus kona ba data eleisaun ba proxima eleisaun ba Presidenti Republika RDTL ba mandatu 2012-2017.

Resultante ba prosesu consulta ho kuadrus no militantes iha base tuir desizaun CPN nian, no mos ba reuniaun CCF nian iha 27 Novembru no reuniaun ohin entre partidus politikus ho Presidenti Republika, Dr. Jose ramos-Horta,hau hola opportunidade ida nee atu informa ba kuadrus no militantes FRETILIN liu husi Radio Maubere uluk nanain, katak, resultante ba kestoens neebe hau temik iha leten, no estatutu partidu FRETILIN nian, hau mak por natureza partidu FRETILIN nia candidatu ba Presidenti Republika RDTL nian ba mandatu 2012-2017 iha eleisaun neebe sei realisa iha tinan oin mai.

Biar nunee, hau no camarada secretariu geral Dr. Mari Alkatiri, sei halau nafatin dialogo ho candidatu seluk neebe ami hahu tiha ona.

Hau sei anunsia hau nia candidatura ofisialmente ba publiku liu husi conferensia imprensa bainhira Presidenti da Republika, Dr Jose Ramos Horta anunsia ofisialmente abertura ba candidatus atu apresenta sira nia candidatura.

Dala ita tan, hau reafffirma katak hau sente honrado tebes ho konfiansa neebe kuadrus no militantes FRETILIN nian, no ema seluk tan, fo mai hau atu candidata aan nudar candidatu ba Presidenti Republika.

Obrigado ba maluk sira nia tempo.

Sede CCF, Comoro, Dili, RDTL.

1 comment:

  1. Excelente comunicacao do Presidente da Fretilin Sr. Francisco Lu Olo, relativamente a sua candidatura a Presidente da Republica de TL. A exposicao cronologica das varias fases do processo que antecedem esta sua ainda nao anuncio oficial de candidatura , embora a de como certa, demonstra uma disciplina de pensamento e accao que muito abonam em seu favor e naturalmente do partido a que preside. Parabens amigo Lu Olo, parabens a Fretilin e parabens ao Ze Teixeira pela boa apresentacao do orgao informativo do vosso partido.
    Joao V Carrascalao

    ReplyDelete